1 Ke ini ado Abọọñ amaambo miin ate, "Kap itiadñwed iba mfen kpa naña mme akpa ako ekeba ndin dọọk mbịne ke abod. Ñko nam akebe edioomo eto. 2 Ami ñyaawet ke itiadñwed mme ikọ se ikiwere ke mme akpa itiadñwed a-afo akeboomo. Ndin ana afo akoono ammọ adọñ ke akebe edioomo."

3 Ndin ami mmaakama eto akasia ndiọñ akebe edioomo ñnyʌñ ñkap itiadñwed iba nte mme akpa ado, ñnyʌñ ñkedọọk ekamba abod ye mme itiadñwed iba ado ke ubọk mmi. 4 Abọọñ amaawet ke itiadñwed se anye akewet akpa, mme Item Duob a-anye aketañña inọọ ndufo ke abod, ke ikañ ke usen mbono. Ndin Abọọñ amaayaak ammọ annọ miin. 5 Ndin ami mmaasọiyọ ke abod ñnyʌñ nsịn mme itiadñwed ado ke akebe edioomo añkekappa, kpa naña Abọọñ akentemme, ndin ammọ mmọdo edọñọ tutu idahami.

6 (Mbon Isrel emaesaña eto ke ube Bene Yaakan tutu ke Mosera. Erọn amaakpa ke ndo emaenyʌñ ebuuk anye, ndin Eliasa ayịn amọ amaadat itie amọ nte aku. 7 Tọọñọ ke ndo ammọ emaenam isañ ekaa Kudkoda, ndin eboiyo ekaa Yọtbata, isọñ ye mme idịm mmọọñ. 8 Ke ini ado Abọọñ amaasio esiin Lifai asaña-asaña anịm nọ eben akebe edioomo Abọọñ, edida ke iso Abọọñ enam ñkpọ enọ Abọọñ enyʌñ enọ adidiọñ ke anyịñ amọ, kpa naña esʌk enam tutu mfịn. 9 Ado ado ntak ubon Lifai inieghe udeeme me udeemeñkpọ ke atu mbon Isrel; Abọọñ ado udeemeñkpọ ammọ, naña Abọọñ Abasi ndufo akedọkkọ ammọ.)

10 Ndin ami mmaaba ke abod usen aba ye akonayio aba, kpa naña ñkenam ke akpa ini, ndin Abọọñ amaakpañ utọñ annọ miin ke ini ami ñko. Ikidooho uduak amọ adisobo ndufo. 11 Abọọñ amambo miin, "Kaa, ndin dat mbon ami usʌñ, nọ ammọ ekedʌk edat isọñ a-ami ñkenwọñọke nnọ mme eteete ammọ adinọ ammọ enie."

12 Ndin idahami, Isrel, nsoo ke Abọọñ Abasi ndufo ayem ito ndufo akan aditeeñe Abọọñ Abasi ndufo, adisaña ke ñkobitem nnọọ anye, adima anye, adinam ñkpọ nnọọ Abọọñ Abasi ndufo ke afịd esịd ndufo ye ke afịd ukpọñ ndufo, 13 ñnyʌñ nnịm mme item Abọọñ ye mme ewʌhọ a-ami inọọhọ ndufo mfịn ke ufọn ndufo?

14 Abọọñ Abasi ndufo anie mme hefịn, ataa mme ñkoññkan hefịn, ederimbod ye afịd se idọñọ ke esịd. 15 Ado Abọọñ amaama mme eteete ndufo, anye amaimek ndufo, mme ubon ammọ, akan afịd mme idịd mfen, kpa naña ado mfịn ami. 16 Ndin ikappa esịd ikeene Abasi ndufo ke adinịm mme mbed ammọ, ikiinyʌñ isọñ iwuod aba. 17 Sia Abọọñ Abasi ndufo ado Abasi mme abasi ye Abọọñ mme mbọọñ, akwa Abasi, akpon anyʌñ anie ndịk, Abasi i-imiiwọttọ ubakka, inyʌññọ ibọ ubọk edem. 18 Anye anwana ekọñ iwuod nditọakpa ye ake ebekpa, anyʌñ ama asenawo a-adʌññọ ye ndufo, anọ ammọ ndidia ye afọñ. 19 Ndin ana ndufo ema mme adidʌñ, sia ndufo emaedo adidʌñ ke Iyib. 20 Iteeñe Abọọñ Abasi ndufo inyʌñ inam ñkpọ inọ anye. Isọñ ubọk imʌm anye ikama inyʌñ idat unwọñọ ndufo ke anyịñ amọ. 21 Anye ke ana etooro; anye ado Abasi ndufo, akenamma mme ikpọ ye utịppeñkpọ a-ndufo ekekịtte ke anyen ndufo. 22 Mme eteete ndufo e-ekekaaha Iyib ekedo ata mme duob, ndin idahami Abọọñ Abasi ndufo anam ndufo emewak nte ntantaafiọñ ke ikpaanyọñ.