1 Ke ini Abọọñ Abasi ndufo amaasobo mme idịd e-enieghe isọñ a-anye adiinọ ndufo, ndin ndufo imaibịne ammọ isio inyʌñ idʌñ ke mme abio ye mme ufọk ammọ, 2 idiañña abio ita inịm ke isọñ ado A-Abọọñ Abasi ndufo inọọhọ edat enie. 3 Idiọọñọ naña isọñ edunyọñ inyʌñ ibakka isọñ A-Abọọñ Abasi ndufo inọọhọ nte udeemeñkpọ ke itie ita, nọ ato do awo a-awotto awo akeme ifeghe akedịbe ke keed ke atu mme abio ado.

4 Mbed a-abañake awo akeedodo a-awotto awo ndin afeghe akpọñ ndo nọ abọkkọ ado ami, awo ndomokeed i-imiifiọkọfiọk iwot mbọhọidʌñ amọ, itooho ke idiọọkesịd a-amaakebaba. 5 Nte uwọdñkpọ, awo akeme isaña ye mbọhọidʌñ amọ edʌk akai edikikpịkke eto, ndin naña anye afʌñ ubọk adikpịkke eto ado ke ekịd, iwuod ekịt a-akeme ifakka awuọ aketọ mbọhọidʌñ amọ awot. Awo ado a-akeme adifeghe ñkaa abio keed ke atu ado adinyaaña uwem amọ. 6 Imiidooho ntoro asiousiene iyiib a-akeme adibịne anye ke ifiobesịd, abọhọ anye ke usʌñ akpenyọọñ abọhọ adikiwuọ abio udịbe, anyʌñ awot anye akpesʌkado anye idotto ñkpa, sia anye ikinieghe akaan idiọọkesịd ibaña mbọhọidʌñ amọ. 7 Ami ado ntak a-ami ibooho ndufo yak ediañña abio ita enịm enọ idem ndufo.

8 Adieke Abọọñ Abasi ndufo anamma adaña ndufo atara, naña anye akenwọñọ anọ mme eteete ndufo, anyʌñ inọ ndufo afịd isọñ a-anye akenwọñọke anọ ammọ, 9 sia ndufo emenekke enịm mme mbed a-ami inọọhọ ndufo mfịn ami adima Abọọñ Abasi ndufo ñnyʌñ nsaña ke ñkobitem nnọọ anye, ndin ana ndufo emaana ediañña abio ita mfen enịm. 10 Inam ami mbaak iyiib awo i-imiidueghe adiduọkkọ ke isọñ ndufo, A-Abọọñ Abasi ndufo inọọhọ nte udeemeñkpọ, ñko mbaak ndufo edidue ke uduọk iyiib.

11 Ado akpeto ke usua awo akedịbe, atịm anyʌñ awot mbọhọidʌñ, ndin anye afeghe akaa keed ke atu mme abio udịbe ado, 12 mme ñkpisọñ ana edọñ ekoot awodawo ado, eben anye eto ke abio ado edi, enyʌñ eyaak anye enọ asiousiene iyiib nọ awot anye. 13 Ikiitua mbọm. Ana esio idiọọkñkpọ uduọkiyiib awo i-imiidueghe ke Isrel, nọ afọn ye ndufo.

14 Ikiisịkke adaña mbọhọidʌñ ndufo e-emaekewuuk tọọñọ ke ayio esed ke udeemeñkpọ ndufo ebọọhọ ke isọñ A-Abọọñ Abasi ndufo inọọhọ ndufo enie.

15 Ntiense keed ikemme adidat mbiom awo ikpe ke idiọọkñkpọ akeedodo awo anamma. Ana ntiense iba me ita esọọñọ ikọ ndin ebiom awo ikpe.

16 Adieke ntiense nsu adaaha abo ke awo a-anam idiọọkñkpọ, 17 mbon iba e-enieghe ikọ ado ana eda ke iso Abọọñ ke iso mme aku ye mme abiideikpe e-ebaaha ke utom ke ini ado. 18 Mme abiideikpe ana enam nduuñọ ayọhọ-ayọhọ, ndin adieke ntiense ado adooho asʌhọ nsu, a-atieghe ntiense nsu abaña emọ-emọ awo Isrel, 19 ana enam ye ntiense nsu ado kpa naña anye akeyem adinam ye awo anye ako. Ana esio idiọọkñkpọ ke atu ndufo. 20 Mbon mfen eyaekop enyʌñ efeghe ndịk, ndin utọ idiọọkñkpọ ado idiitịppeke aba ke atu ndufo. 21 Ikiitua mbọm: uwem akaa ke uwem, anyen akaa ke anyen, eded akaa ke eded, ubọk akaa ke ubọk, ukod akaa ke ukod.