1 Ami ado adidiọñ ake Moses awo Abasi akediọññọ mbon Isrel mbemiso anye akpa. 2 Anye amaabo:

"Abọọñ aketo Sainai

adisoobo ye ammọ ato Sei;

anye amaayama ato Abod Paran.

Anye akesaña ye udịm mme ndisana awo

e-eketooho usuuk, ke mme usuuk abod amọ.

3 Ke akpanikọ ado afo ama ubon awo;

afịd mme ndisana ibon usịne fiin ke ubọk.

Afịd ammọ esuuk iwuod ke ukod mfo,

ebọ item uto fiin,

4 mbed ake Moses akinọọhọ ñnyịn,

inie afe mbono Yekọb.

5 Anye akedo adidem ke Yesurun

ke ini mme ñkpisọñ emaekeboho,

ye mme esiin Isrel.

6 "Yak Rubịn adu uwem, yak akuukpa,

ñko yak mbon amọ ekuusịp ke ibad."

7 Ndin se anye aketañ abaña Yuda ado ami:

"Abọọñ, kpañ utọñ nọ aseeme Yuda;

ben anye bịne mbon amọ.

Anye akama ubọk amọ anwana anyaaña idem amọ.

Mbọk, do unwam amọ baña mme asua amọ.

Ye ubọk amọ anye anwana anyaaña idem amọ.

Mbọk, do unwam amọ baña mme asua amọ!"

8 Ke abaña Lifai anye amaabo:

"Tumịm ye Urim mfo enie

anam akpanikọ awo utom mfo.

Afo amaadomo anye ke Masa;

amaatọhọ ye anye ke mmọọñ Meriba.

9 Anye amaatañ abaña ete ye eka amọ,

‘Nnieghe ukpono nnọ ammọ.’

Anye ikidiọọñọke nditọeka ideen amọ

me adidiọọñọ kpa nditọ amọ,

ado anye amaakpeme ikọ mfo

anyʌñ akpeme edioomo mfo.

10 Anye akpeep Yekọb mme item mfo

anyʌñ akpeep Isrel mbed mfo.

Anye awa insensi unọ fiin

ye ayọhọ ufọfọb uwa ke itieukpono mfo.

11 Abọọñ, diọñ afịd ukeme amọ,

nyʌñ nem esịd ke ubọkutom amọ.

Sobo mbon se idakka ida inam mfịna ye anye,

mme asua amọ tutu ammọ idakkake ida aba."

12 Ke abaña Benyamin anye amaabo:

"Yak awoima Abọọñ aba ke ifuuro ke anye,

sia anye adịp anye afịd usen,

anye A-Abọọñ amaaha anyʌñ abọ nduọkadudu ke afara amọ."

13 Ke abaña Yosef anye amaabo:

"Yak Abọọñ adiọñ isọñ amọ

ye eti mbara a-aduọkkọke ato hefịn

ye ntotəño mmọọñ a-asịneke ke esịd isọñ;

14 ye afịd se ifọn ikan se utịn anie

ye se iyaiya ikan se afiọñ akama;

15 ye ataa nti mme enọ e-etooho mme ñkaan ñkpoon abod

ye nseghe mfịd a-atooho mme nsi-nsi abod;

16 ye ataa nti enọ se iyọhọ ke iso isọñ

ye mfọn anye a-akedʌññọ ke ikọd a-akesakka ikañ.

Yak afịd ami edoro ke iwuod Yosef,

ke akpọiso ayịn adidem ke atu nditọ ete amọ.

17 Ke uku anye atie nte akpa ayaaraenañ;

nnʌk amọ atie nte nnʌk abaakenañ ikọd.

Anye adiikama ado ituak mme idịd,

tutu awuọ mbon e-ebaaha ke mme utịd ekondo.

Ntoro ke ado ye mme tọsịn mbon Ifrem duob;

ntoro ke ado ye mme tọsịn mbon Manase."

18 Ke abaña Sebulọn anye amaabo:

"Daara, Sebulọn, ke adiwuọ mfo,

Isaka, afo ñko, ke mme atayad mfo.

19 Ammọ eyaekoot mme awo edi ke ekamba abod,

ke ndo eyaenam mme uwa adinen awo;

ammọ eyaedia usọrọ ke mme uwak ñkpọ e-etooho akpainyañ,

ke mme ñkpọuto e-edịbeke ke ntan."

20 Ke abaña Kad anye amaabo:

"Afọfọn anọ awo a-anamma Kad atara!

Kad adʌñ do nte ekpe,

awai ubọk me iwuod.

21 Anye amaamek eti isọñ anọ idem amọ;

udeeme adadusʌñ ekenịm enọ anye.

Ke mme ñkpisọñ emaekebono,

anye amaanam nnekke-nnekke uduak Abọọñ,

ye mme ubiideikpe amọ a-abañake Isrel."

22 Ke abaña Daan anye amaabo:

"Daan ado ñyịn ekpe,

a-asakkake ato Basan."

23 Ke abaña Naftali anye amaabo:

"Naftali ayọhọ ye mfọn Abọọñ

anyʌñ ayọhọ ye adidiọñ amọ;

anye adinie usuuk ke ukañ isuọ."

24 Ke abaña Asaa anye amaabo:

Andinie mfọn ñkan ke atu nditọ ideen ado Asaa;

yak anye akịt mfọn ato nditọete amọ ideen,

ndin yak anye ayie ukod amọ ke adan.

25 Mme ekọb ke mme inuaatob mfo ediido ukwak ye brọns,

ndin adudu mfo adiido ukem ye usen mfo.

26 "Ibaaha anditie nte Abasi Yesurun,

a-awatta akaaña mme hefịn adunyaaña fiin

ye ke ntọñanyọñ ke uku amọ.

27 Nsi-nsi Abasi ado itie udịbe mfo,

ndin ke idak ado mme nsi-nsi ubọk.

Anye ayaabịne mme asua mfo ke iso mfo,

ate, ‘Isobo ammọ!’

28 Ndin Isrel ayaadʌñ ke ifuuro;

Yekọb ayaadʌñ ke emem

ke isọñ abakpa ye ufa ukọd,

ke itie a-mme hefịn eduọkkọ mbara.

29 Afọfọn inọ ndufo, Isrel!

Anie atie nte ndufo,

mbon A-Abọọñ anyaañake?

Anye ado atuekọñ ye unwam ndufo

ye akañkañ ubọọñ ndufo.

Mme asua ndufo ediinyeenyeñ ke iso ndufo,

ndin ndufo eyaesaña esọnnọ mme ñkoñ-ñkoñ itie ammọ."