1 Ndufo imaidʌk isọñ A-Abọọñ Abasi ndufo inọọhọ ndufo nte udeemeñkpọ inyʌñ iben inie inyʌñ idʌk idʌñ ke esịd, 2 idat mme akpa mfịd afịd ñkpọ inwañ ke isọñ A-Abọọñ Abasi ndufo inọọhọ ndufo inyʌñ idọñ ke akpan. Ndin ikaa itie A-Abọọñ Abasi ndufo adiimek nte itie idʌñ inọ Anyịñ amọ 3 ndin idọkkọ aku a-abaaha ke utom ini ado, "Ami mmebo Abọọñ Abasi mfo mfịn ami ke mmedi ke isọñ A-Abọọñ akenwọñọke anọ mme eteete ñnyịn adinọọ ñnyịn." 4 Aku ayaibọ ndufo akpan ayaak anịm ke iso akpokoro uwa Abọọñ Abasi ndufo. 5 Ndin ndufo eyaebo ke iso Abọọñ Abasi ndufo: "Ete mmi akedo ñyooñ awo Aram, ndin anye amaakaa Iyib ye akpọ awo ifañ anyʌñ adʌñ do akappa ekamba idịd, akop uko anyʌñ awak. 6 Ado mbon Iyib emaifʌnnọ ñnyịn enyʌñ enam ñnyịn ibọ ufen ke akpọsọñ utom. 7 Ndin ñnyịn imaitua iseeme inọ Abọọñ, Abasi mme eteete ñnyịn, ndin Abọọñ amaakop uyio ñnyịn anyʌñ akịt ukuud, ufen ye ufiik ñnyịn. 8 Ndin Abọọñ amaisio ñnyịn ke Iyib ke akpọsọñ ubọk ye ñnyanna ubọk, ye ekamba ndịk ye mme idiọọñọ ye mme utịppeñkpọ. 9 Anye akiben ñnyịn adi isọñ ami, isọñ a-afiọọrọke ye mmọọñeba ye adanakwọọk; 10 ndin idahami ami mmeben akpa mfịd a-atooho isọñ a-afo, Abọọñ annọọhọ miin." Nịm akpan ado ke iso Abọọñ Abasi mfo nyʌñ tuak iwuod nọ anye. 11 Ndin afo ye mme Lifai ye mme adidʌñ e-edʌññọ ke atu ndufo eyaedaara ke afịd nti ñkpọ se Abọọñ Abasi ndufo unọọ fiin ye ufọk mfo.

12 Ke ini ndufo emaesio mbaak keed ke itie duob afịd mbunwịm ndufo ke ayọhọ isua ita, isua mbaak keed ke itie duob, ndufo eyaenọ mme Lifai, mme adidʌñ, mme nditọakpa ye mme ebekpa, nọ ammọ enie se edia ke mme abio ndufo enyʌñ ekop uyʌkkọ. 13 Ndin bo Abọọñ Abasi mfo: "Ami mmesio adisana udeeme ke ufọk mmi ndin mmenọ mme Lifai, mme adidʌñ, mme nditọakpa ye mme ebekpa, akeene afịd se afo aketemme. Ami ñwọññọke ñkpọñ mme ewʌhọ mfo ñnyʌññọ mfre ammọ ndomokeed. 14 Ami ñkidiaha adisana ndidia ndomokeed idahami ñkebaaha ke mfʌhọ, ñkinyʌññọ nsio ndomokeed idaha a-ami mmiikisanake, me adiben ndomokeed nnọọ akpañkpa. Ami mmekop item Abọọñ Abasi mmi; ami mmenam afịd ñkpọ se afo akebo yak nnam. 15 Tie ke hefịn, adisana itie idʌñ mfo, suuk anyen se, nyʌñ diọñ mbon mfo Isrel ye isọñ a-afo inọọhọ ñnyịn kpa naña akenwọñọ anọọ mme eteete ñnyịn, isọñ a-afiọọrọke ye mmọọñeba ye adanakwọọk."

16 Abọọñ Abasi ndufo iwuuk ndufo mfịn ami ate, ikeene mme ewʌhọ ye mme mbed ami; inekke ikpeme ammọ ke afịd esịd ndufo ye ke afịd ukpọñ ndufo. 17 Ndufo emebo ke usen mfịn ami ke Abọọñ ado Abasi ndufo ndin ke ndufo eyaesaña ke ñkobitem enọ anye, ke ndufo eyaenịm mme ewʌhọ, mme item ye mme mbed amọ, ke eyaekpañ utọñ enọ anye. 18 Ndin Abọọñ atañ anwa-anwa mfịn ami ke ndufo edo mbon amọ, ñkpọuto inie amọ kpa naña anye akenwọñọ, ndin yak ndufo enịm mme item amọ. 19 Anye a-abo ke imọ iyainọ ndufo itooro, uwuọetob ye ukpono akponno akan afịd mme idịd se anye akebot ndin ke ndufo ediido mme ndisana ibon inọ Abọọñ Abasi ndufo, kpa naña anye akenwọñọ.