1 Adieke ekịtte naña ewot awo ke ikọd ke isọñ Abọọñ Abasi ndufo inọọhọ ndufo edat enie, ado awo idiọọñọke andikiwod, 2 mme ñkpisọñ ye mme abiideikpe ndufo eyaekaa ekedomo unyọọñ tọọñọ ke itie nte akpo awo ado ana tutu awuọ mme abio se ikanna akpo ado ikʌk. 3 Ndin mme ñkpisọñ e-edooho mme adaaha abio se ikpere akpo ado ikan eyaedat ñyịn umanenañ a-awo imiidatta inam utom akpa inyʌññọ ikọñọ akpọnọ akpa 4 ndin mme adaaha abio ado eyaedat anye ekaa abedeñ a-adooho akenam awo ifʌññọ inyʌññọ itọ, ake idịm a-afegheke anyʌññọ aba. Ke abedeñ ado yak mme adaaha ebuuñ itọñ ñyịn umanenañ ado. 5 Mme aku ubon Lifai eyaewuọ eda, sia Abọọñ Abasi ndufo amek ammọ adinam ñkpọ ñnyʌñ nnọọ adidiọñ ke anyịñ Abọọñ ñnyʌñ mbiere afịd ikpe se ibaña eniin ye afai. 6 Ndin afịd mme ñkpisọñ ke abio a-akpereke akpo ado eyaeyie ubọk eduọk ñyịn umanenañ a-akebuuñọ itọñ ke abedeñ do, 7 ndin ammọ eyaebo: "Ubọk ñnyịn ikiduọkkọ iyiib ami, anyen ñnyịn ikinyʌññọ ikịt idaha ekenamma. 8 Bọ uwa ami ke iwuod mbon mfo Isrel, a-afo afakka, Abọọñ, kuunyʌñ udat ke ñnyịn imidue ke uduọk iyiib awo i-imiidueghe." Ndin eyaefeen uduọkiyiib ado, 9 ntom ke ndufo ediifak idem ndufo isio ke uduọk iyiib awo i-imiidueghe, sia emenam se inen ke iso Abọọñ.

10 Imaikaa ekọñ ye mme asua ndufo ndin Abọọñ Abasi ndufo ayaak ammọ isịn ndufo ke ubọk ndin ndufo enyʌñ edat mbuodekọñ, 11 adieke afo akịtte uyaiya awonwaan a-afo amaaha, ke atu mbon e-emʌmmọ amekeme adidat anye nte anwaan mfo. 12 Dat anye dʌk ufọk mfo ndin nam anye akwaat ided iwuod amọ, akpok mbara amọ 13 ndin asịññe afọñidem a-anye akesịneke idaha ekemʌmmọ anye. Anye amaadʌñ ke ufọk mfo anyʌñ afʌhọ ete ye eka amọ ke afịd afiọñ keed, afo ndin amekeme adidọ anye ndin anye ado anwaan mfo. 14 Adieke afo umuunemme esịd ye anye, yak anye aka nte anye ama. Kuunyam anye, kuunyʌñ udat anye nte afʌn, sia afo amaasappa anye.

15 Adieke awodeen adọọhọ ibaan iba, ndin anye ama keed ado imaaha anye ako, ado naña iba eman nditọ ideen enọ anye, ado akpan amọ ado ayịn anwaan usua, 16 anye amaadeeme ñkpọ anọ nditọ ideen amọ, inaaha anye aben unen akpan anọ ayịn anwaan ima ke itie akpan amọ, ayịn anwaan usua. 17 Ana anye adiọọñọ ayịn anwaan usua amọ nte akpan anyʌñ anọ anye udeeme ke itie iba ke atu afịd inie se anye anie. Akpan ado ado akpa idiọọñọ adudu ete amọ. Unen akpan anie anye.

18 Adieke awo anieghe ayịn awodeen a-asọññọ iwuod anyʌñ asọñ aboditọñ, inyʌññọ ikop item inọ ete ye eka amọ, inyʌññọ ikpañ utọñ inọ ammọ ke ini emaetʌnọ anye, 19 ete ye eka amọ eyaeben anye ekaa ke iso mme ñkpisọñ ke atob abio amọ. 20 Ammọ eyaebo mme ñkpisọñ abio, "Ayịn awodeen ñnyịn ami a-asọñ iwuod anyʌñ asọñ aboditọñ. Anye ikoppo item ñnyịn. Anye ado awo idiọọkitọñ anyʌñ ado awo inaam ukọd." 21 Ndin afịd ideen ke abio amọ ana etọọñ anye ke itiad ewot. Ana esio mbubiam unyọñ ke atu ndufo. Afịd Isrel eyaekop enyʌñ enie mbaak.

22 Adieke ewotto awo a-anamma akpan idiọọkñkpọ ndin ekọọñ akpo amọ ke eto, 23 inaaha akpo ado akọñọ tutu ayio asiere. Ana ebuuk anye kpa usen ado, sia awo akeedodo e-ekọọñọ ke eto aba ke isuuñọ Abasi. Inaaha esappa isọñ A-Abọọñ Abasi ndufo inọọhọ nte udeemeñkpọ.