1 Mme aku ubon Lifai, kpa ye afịd esiin Lifai inaaha enie udeemeñkpọ ye Isrel. Ammọ ediidu uwem ke mme enọ mbunwịm e-enọọhọ Abọọñ, sia anye ado ado udeemeñkpọ ammọ. 2 Ammọ idiinieghe udeemeñkpọ ke atu emọ-emọ mbon Isrel; Abọọñ ado udeemeñkpọ ammọ, naña anye akenwọñọ anọ ammọ.

3 Anyem ado udeeme a-anieghe mme aku a-atooho mbon se iwa ayaaraenañ me edọñ: afara, mme ñkpọ esịd idịb ye unam a-atooho iwuod. 4 Ana enọ ammọ mme akpa mfịd abakpa ndufo, ufa ukọd ye adan ọlif, ye akpa ided e-efatta eto edọñ ndufo, 5 sia Abọọñ Abasi ndufo a-amek ammọ ye ubon ammọ ke atu mme esiin ndufo edida nnam ñkpọ ke anyịñ Abọọñ afịd-afịd ini.

6 Adieke awo Lifai akpọññọ abio nte keed ke Isrel a-anye akebaaha, adidi ke afịd esịd akpanikọ itie A-Abọọñ adiimek, 7 anye akeme adinam utom ke anyịñ Abọọñ Abasi amọ kpa naña mme emọ-emọ Lifai enam utom do ke iso Abọọñ. 8 Ana anye akeene awuana ukem-ukem ke mme ñkpọ e-enọọhọ ammọ, akpọkọm anye amaabọ akʌk ato ke adinyam ñkpọ ufọk amọ.

9 Imaikidʌk isọñ A-Abọọñ Abasi ndufo inọọhọ ndufo, ikiikpeep mme mbubiam eduuwem mme idịd ke udo. 10 Inaaha ekịt awo ndomokeed ke atu ndufo a-awaaha ayịn awodeen me ayịn awonwaan amọ ke ikañ, a-anamma utom abiaidiọñ me abiamfa, a-akappake ñkukịd, a-abreke ifọd, 11 me a-atọọhọ awo ñkpeñanyeñ, akịdñkukịd me abiaekpo. 12 Awo akeedodo a-anamma mme edinam ami atek Abọọñ esịd; kpa ke ntak mme mbubiam ido ami ke Abọọñ Abasi ndufo adiibịne mme idịd ado isio ke iso ndufo. 13 Ana ndufo enana ndo ke iso Abọọñ Abasi ndufo.

14 Mme idịd se ndufo idiibịn isio ekpañ utọñ enọ mbon se ibre idiọñ me useñkpọ. Ado amaado ndufo, Abọọñ Abasi ndufo inyịmmeke ndufo enam ntoro. 15 Abọọñ Abasi ndufo ayaasio prọfed a-abaaha nte ami ke atu ndufo, emọ-emọ awo Isrel. Ana ndufo ekpañ utọñ enọ anye. 16 Sia se ndufo ekebeeñe Abọọñ Abasi ndufo ke Họreb ke usen mboho idaha a-ndufo ekebooho, "Yak ñnyịn ikiikop uyio Abọọñ Abasi ñnyịn, ikiinyʌñ ikịt ekamba ikañ ami aba, imiidooho ñnyịn iyaikpa."

17 Abọọñ amambo miin: "Se ammọ etañ a-afọn. 18 Ami ñyaasio prọfed a-abaaha nte afo ke atu mbon Isrel nnọ ammọ, ndin ami ñyaasịn mme ikọ mmi ke inua amọ. Anye ayaadọkkọ ammọ afịd ñkpọ se ami ñwuuk anye mbo atañ. 19 Ami ke idem mmi ñyaabịp awo i-imiikpañña utọñ ikop mme ikọ se prọfed ado atañ ke anyịñ mmi. 20 Ado prọfed a-akamake anyịñ mmi atañ se ami mmentemmeke, me prọfed a-adatta anyịñ mme abasi mfen atañ, ana ewot anye."

21 Ndufo emekeme edibo idem ndufo ete, "Ñnyịn idiinam die idiọọñọ ini e-etob imiitooho Abọọñ?" 22 Adieke se prọfed atañ ke anyịñ Abọọñ imiitịppeke inyʌññọ ido akpanikọ, idooho Abọọñ anọ etob anye ado. Prọfed anye ado atañ ikọ idem amọ, ke ntoro ikiiyak idem inyeñ.