1 Ima Abọọñ Abasi ndufo inyʌñ inam se anye ayem, mme ewʌhọ amọ, mme mbed amọ ye mme item amọ afịd ini. 2 Itoiyo mfịn ke idooho nditọ ndufo ekekịt enyʌñ ebọ ntʌnọ Abọọñ Abasi ndufo: uku amọ, akpọsọñ ubọk amọ, adinyanna ubọk amọ; 3 mme idiọọñọ ye mme ñkpọ a-anye akenamma ke esịd Iyib, ye Fero adidem Iyib ye afịd idịd amọ, 4 se anye akenam udịmekọñ Iyib, tutu akewuọ mme enañmbakara ye mme sariọd, naña anye akefuuk ammọ ye mmọọñ Ndad-Ndad Akpainyañ idaha a-ammọ ekibịneke ndufo, ñko naña Abọọñ akesobo ammọ ke nsi-nsi. 5 Idooho nditọ ndufo ekekịt se anye akenam ke anaan tutu ndufo edisịm itie ami, 6 ndin se anye akenam Datan ye Abiram, nditọ ideen Eliab awo ubon Rubịn, ke ini isọñ akekpịkkeke ke ufọọd afịd iso Isrel anyʌñ amen ammọ ye afịd ufọk ammọ, mme atayad ammọ ye afịd ñkpọ se inie uwem e-ekedooho ake ammọ. 7 Ado anyen ndufo akekịt afịd mme ñkpoon ñkpọ se Abọọñ anam.

8 Ke ntoro ikpeme afịd item a-ami inọọhọ ndufo mfịn ami, nọ ndufo enie adudu adika ñkedat isọñ a-ndufo ekaañake Yọdan adikiben nnie, 9 ñko nọ ndufo edu anyan uwem ke isọñ A-Abọọñ akenwọñọke adinọ mme eteete ndufo ye mme ubon ammọ, isọñ a-afiọọrọke ye mmọọñeba ye adanakwọọk. 10 Isọñ a-ndufo edʌkkọ adikidat ibaaha nte isọñ Iyib, a-ndufo etooho edi, a-ndufo eketọọhọ ñkpasi ndufo enyʌñ ekama ukod eduọk mmọọñ nte inwañ mfañ afere. 11 Ado isọñ a-ndufo eyemme edikaaña Yọdan mboiyo ñkedat nnie ado abod-abod isọñ ye abedeñ a-asideppe edịm ato anyọñ. 12 Ado isọñ A-Abọọñ Abasi ndufo akereke ñkpọ abaña; anyen Abọọñ Abasi ndufo asʌk awʌhọ do tọọñọ ke ntọọñọ isua tutu utịd.

13 Adieke ndufo enekkeke enịm mme item a-ami inọọhọ ndufo mfịn ami, adima Abọọñ Abasi ndufo ñnyʌñ nnam ñkpọ nnọọ anye ke afịd esịd ndufo ye afịd ukpọñ ndufo, 14 ndin ami ñyaanam edịm adep ke isọñ ndufo ke akemini amọ, akpa edịm ye akpeedem edịm, nọ ndufo edọk idọk abakpa ndufo, ufa ukọd ye adan ọlif. 15 Ami ñyaanọ mme enañ ndufo mbid, ndin ndufo eyaedia enyʌñ ekop uyʌkkọ.

16 Ado ikpeme mbaak editap ndufo nọ ewọññọ ekekpono enyʌñ etuak iwuod enọ mme abasi mfen. 17 Ndin iyadesịd Abọọñ ayaawọññọ ise ndufo, ndin anye ayaasiit anyọñ mbaak edịm adidep, ndin isọñ idiinwịmme mfịd, ndufo eyaenyʌñ etak ke eti isọñ A-Abọọñ inọọhọ ndufo. 18 Inekke itʌm isịn mme ikọ mmi ami ke esịd ye akikere ndufo; itobo ammọ nte idiọọñọ ke ubọk ndufo, inyʌñ ibọp ammọ ke akpọiso ndufo. 19 Ikpeep nditọ ndufo mme mbed ami, itañ ibaña mme mbed ami ke ini ndufo etieghe ke ufọk ye ke ini ndufo esañake ke usʌñ, ke ini ndufo enaahana ye ke ini ake ndufo edemmeke. 20 Iwet ke mme abọbọọk anyenusʌñ ufọk ndufo ye ke mme inuaatob ndufo, 21 nọ usen uwem ndufo ye ake nditọ ndufo ewak ke isọñ A-Abọọñ akenwọñọke adinọ mme eteete ndufo, kpa naña mme usen a-mme anyọñ ekoñño ekan isọñ.

22 Adieke ndufo enekkeke ekpeme edinịm mme item a-ami inọọhọ ndufo, adima Abọọñ Abasi ndufo, esaña ke ñkobitem amọ, enyʌñ efat anye ekama, 23 Abọọñ ayaabịne afịd mme idịd ami asio inọ ndufo, ndin ndufo eyaebọ mme idịd se ikpon inyʌñ ikop uko ikan ndufo itie enie. 24 Afịd itie se ndufo edot ukod adiido ake ndufo: efaak ndufo ayaatọọñọ ke Lebanọn, ye Inyañ Yufretis akewuọ Inyañ Mediterenia. 25 Awo ndomokeed idiikanna ida ndufo ke iso. Abọọñ Abasi ndufo, kpa naña anye akenwọñọ inọọ, ayaanam ammọ ekop ndịk enyʌñ ibaak ndufo ke afịd isọñ a-ndufo ekaahaka.

26 Kap se, ami mmenịm adidiọñ ye isuuñọ ke iso ndufo, 27 adidiọñ adieke ndufo ekoppo mme item Abọọñ Abasi ndufo a-ami inọọhọ ndufo mfịn ami; 28 isuuñọ adieke ndufo etreke adikop mme item Abọọñ Abasi ndufo enyʌñ ewọññọ ekpọñ usʌñ a-ami iwuuhọ ndufo mfịn ami ekekeene mme abasi mfen, a-ndufo imiidiọọñọke. 29 Abọọñ Abasi ndufo amaisio ndufo idisịn ke isọñ a-ndufo edʌkkọ adidat nnie, ana ndufo esọọñọ mme adidiọñ ado ke Abod Kerisịm, ye mme isuuñọ ado ke Abod Ebal. 30 Kpa naña ediọọñọ, mme ñkpoon abod ami eba ke edem Yọdan, ke usobutịn, ekpere mme ñkpoon eto Mọre, ke efaak mbon Kenan e-edʌñọke ke Araba ekpere Kilkal. 31 Ndufo eyaekaaña Yọdan edʌk enyʌñ edat isọñ A-Abọọñ Abasi ndufo inọọhọ ndufo. Ke ini ndufo emaekedat anye enie enyʌñ edʌñọ do, 32 ikịt ibo ke emenịm afịd ewʌhọ ye mme mbed a-ami nnịmme ke iso ndufo mfịn ami.