1 Mme ewʌhọ ye mme mbed a-anaaha ndufo enekke enịm ke isọñ A-Abọọñ, Abasi mme eteete ndufo, inọọhọ ndufo edat enie, adaña nte ndufo edʌñọke ke isọñ ado ado ami. 2 Ibiat ataa afịd-afịd mme itie ke mme anyọñ ikpọabod, ke ntək abod ye ke idak ntatara eto, a-mme idịd andufo ebọọhọ ammọ isọñ esikamake ekpono mme abasi ammọ. 3 Iwuut mme itieukpono ammọ, iboom mme itiad uwa ammọ, inyʌñ ifọọmọ mme abai Asera ammọ ke ikañ; ikpok usọsọi ñkpọ mme abasi ammọ, ndin isọọk mme anyịñ ammọ isio ke mme itie ado.

4 Inaaha ndufo ekpono Abọọñ Abasi ndufo ke usʌñ naña ammọ ekpono. 5 Ado ana ndufo eyem itie se Abọọñ Abasi ndufo adiimek ke atu afịd mme esiin ndufo adinịm Anyịñ Amọ ke ndo nte itie idʌñ. Itie ado ke ana ndufo eka; 6 ikoono mme ufọfọb enọ ye mme uwa, mme enọ mbaak keed ke itie duob ye mme asaña-asaña enọ, se enwọñọ adinọ ye mme enọ imaesịd, ye akpa uman ye ufene ndufo idi itie ado. 7 Ndo, ke iso Abọọñ Abasi ndufo, ndufo ye ufọk ndufo eyaedia enyʌñ edaara ke afịd ñkpọ se esịn ubọk ndufo enam, sia Abọọñ Abasi ndufo idiọñ ndufo.

8 Inaaha ndufo enam naña ñnyịn inam mfịn ami, a-adooho afịd awo enam naña ema, naña ekere ebo ke a-anen, 9 sia ndufo iwuọhọ itie nduọkadudu ye udeemeñkpọ A-Abọọñ Abasi ndufo inọọhọ ndufo. 10 Ado ndufo eyaekaaña Yọdan enyʌñ edʌñ ke isọñ A-Abọọñ Abasi inọọhọ ndufo nte udeemeñkpọ, ndin anye ayainọ ndufo nduọkadudu ke ubọk mme asua ndufo e-ekannake ndufo ekʌk nọ ndufo edʌñ ke ifuuro. 11 Ndin itie A-Abọọñ Abasi ndufo adiimek nte itie idʌñ inọ Anyịñ Amọ, ke ndo ke ndufo ediikoono afịd ñkpọ se mbo ndufo enam: mme ufọfọb enọ ye mme uwa, mme enọ mbaak keed ke itie duob ye mme asaña-asaña enọ se enwọñọ adinọ Abọọñ. 12 Ndin ke itie ado idaara ke iso Abọọñ Abasi ndufo, ndufo, nditọ ideen ye nditọ ibaan ndufo, nditọufọk ideen ye nditọufọk ibaan ndufo, ye mme Lifai ke mme abio ndufo ammiinieghe ubakka me udeemeñkpọ ake ammọ. 13 Inekke ikpeme, ikiinam ufọfọb enọ ndufo ke itie nte emama. 14 Inam uwa ke itie nte A-Abọọñ adiimek ke atu esiin ndufo, ke ndo, inam afịd se ami mbo yak ndufo enam.

15 Kpayeado, ndufo emekeme ediyọọk mme unam ndufo ke abio ndufo akeedodo enyʌñ eta unam ado naña ndufo emama edita, nte akpedooho edob me ebed, akeene adidiọñ se Abọọñ Abasi ndufo inọọ. Mbon se isana ye mbon se imiisanake ekeme edita anye. 16 Ado inaaha ndufo eta iyiib ado; yak eduọk iyiib ado ke isọñ nte mmọọñ. 17 Ke mme abio a-ndufo inaaha edia mme mbaak keed ke itie duob abakpa ye ufa ukọd ye adan ọlif, me akpa uman mme ufene ndufo, me ñkpọ akeedodo a-ndufo enwọñọke edinọ, me mme enọ imaesịd me mme asaña-asaña enọ. 18 Utu ke ado, ana ndufo edia mme ñkpọ ado ke iso Abọọñ Abasi ndufo ke itie A-Abọọñ Abasi ndufo adiimek: ndufo, nditọ ideen ye nditọ ibaan ndufo, nditọufọk ideen ye nditọufọk ibaan ndufo, ye mme Lifai ke mme abio ndufo; ndin ana ndufo edaara ke iso Abọọñ Abasi ndufo ke afịd ñkpọ se ndufo enam. 19 Inekke ikpeme mbaak ndufo idifre mme Lifai adaña nte ndufo edʌñọke ke isọñ ndufo.

20 Ke ini Abọọñ Abasi ndufo amaatat adaña ndufo kpa naña anye akenwọñọ, ndin ndufo ewʌrọ unam enyʌñ ebo, "Ami ñkpaama unam," ndin ndufo emekeme edita naña eyem. 21 Adieke itie A-Abọọñ Abasi ndufo amekke adiwet Anyịñ amọ anyọọñọ usʌñ ikpọñ ndufo abọhọ, ndufo emekeme ediwot mme unam eto atu udịmenañ ye udịmedọñ A-Abọọñ inọọhọ ndufo, kpa naña ami itemme ndufo, ye ke mme abio ndufo emekeme edita naña ndufo ekpeyeyem edita. 22 Ita ammọ naña ekpeta edob me ebed. Mbon awo se imiisanake ye mbon se isana ekeme edita. 23 Ado ikịt ibo ke ndufo itaaha iyiib, sia iyiib ado uwem, ndin inaaha ndufo edian uwem eta ye unam. 24 Ndufo ñko inaaha eta iyiib; iduọk anye ke isọñ nte mmọọñ. 25 Ikiidia anye, nọ afọn ye ndufo ye nditọ ndufo, sia ke ntoro ndufo eyaenam se ifọn ke anyen Abọọñ.

26 Ado iben mme ndisana ñkpọ ndufo ye mme ñkpọ akeedodo a-ndufo enwọñọke edinọ, ndin ikaa ke itie se Abọọñ adiimek. 27 Iben mme ufọfọb enọ ndufo, abʌkunam ye iyiib, ikaa ke itieukpono Abọọñ Abasi ndufo. Ana eduọk iyiib mme uwa ndufo ke mben itieukpono Abọọñ Abasi ndufo, ado emekeme edita unam ado. 28 Inekke ikpeme edinam afịd mme item a-ami inọọhọ ndufo, nọ afọn ye ndufo afịd ini ye nditọ ndufo, sia ndufo ediinam se inen ye se ifọn ke anyen Abọọñ Abasi ndufo.

29 Abọọñ Abasi ndufo ayaasobo mme idịd se ndufo ediikan ubọk inyʌñ idat isọñ ammọ inie. Ado ndufo imaibịne ammọ isio idʌñọ ke isọñ ammọ, 30 ndin ke imaikisobo ammọ, ikpeme mbaak edimʌm ndufo ke afia ke ini ebịppe ebaña mme abasi ammọ, ete, "Mme idịd ami ekpono die mme abasi ammọ? Ñnyịn ñko iyainam ukem ado." 31 Inaaha ndufo ekpono Abọọñ Abasi ndufo naña ammọ ekpono, sia ke edikpono mme abasi ammọ, ammọ enam mme mbubiam ido A-Abọọñ asuaha. Ammọ efọp nditọ ideen ye nditọ ibaan ammọ ke ikañ nte mme uwa enọ mme abasi ammọ.

32 Ikịt ibo ke ndufo emenam afịd se ami iwuuk ndufo adinam; ikiidadian, ikiinyʌñ isosio ifep.*