1 Ikpeme edikeene afịd item se ami inọọ ndufo mfịn ami, nọ ndufo edu enyʌñ etọt ndin enyʌñ edʌk edat isọñ A-Abọọñ akenwọñọke adinọ mme ete ndufo. 2 Itoiyo naña Abọọñ Abasi ndufo akidat ndufo tọọñọ ke anaan ke isua aba ami, adinam ndufo esuuhọ idem anyʌñ idomo ndufo nọ anye adiọọñọ se isịne ke esịd ndufo, me ndufo eyaenịm me idiinịmme mme item amọ. 3 Anye amaisuuhọ ndufo anịm, anam ndufo ekop abiọọñ ndin anye inọ ndufo mana edia, a-adooho ndufo ye mme eteete ndufo ikidiọọñọke, nọ ikpeep ndufo ke awo iduuho uwem ke uyo ikpọọñ ado ke afịd ikọ se ito inua Abọọñ iwuọ. 4 Afọñ ndufo ikitahake, ñko ukod ndufo ikifuudo ke isua aba ami. 5 Idiọọñọ ndin ke esịd ndufo ke kpa naña ete atʌnọ ayịn amọ, kpa ntoro ke Abọọñ Abasi ndufo itʌnọ ndufo.

6 Ikpeme mme item Abọọñ Abasi ndufo, isaña ke ñkobitem inyʌñ iteeñe anye. 7 Sia Abọọñ Abasi ndufo ayaiben ndufo adisịn ke eti isọñ, isọñ mmọọñ, idịm, ye mmọọñ a-asakkake akedʌk mme abedeñ ye mme abod; 8 isọñ a-anieghe abakpa ye baali, fain ye mme eto fik, mme pomekrened, adan ọlif ye adanakwọọk; 9 isọñ a-adooho uyo idinanake ndin ndufo idiinanake ñkpọ ndomokeed; isọñ a-adooho mme itiad edo ukwak ndin ndufo emekeme idọk kọpa nsio ke mme abod.

10 Ndufo imaidia inyʌñ ikop uyʌkkọ, itooro Abọọñ Abasi ndufo ke eti isọñ a-anye inọọhọ ndufo. 11 Ikịt ibo ke ndufo ifreke Abọọñ Abasi ndufo, itreke edinam mme item, mme mbed ye mme ewʌhọ amọ a-ami inọọhọ ndufo mfịn ami. 12 Imiidooho ntoro, imaidia inyʌñ ikop uyʌkkọ, ibọp mme mfọọn ufọk inyʌñ idʌñọ, 13 ndin ke mme ufene ndufo emaekpoon ndin mme silfa ye kold ndufo ewak ndin afịd se ndufo enie etọt, 14 ndin esịd ndufo eyaetọọñọ edikịt idem ndin ndufo efre Abọọñ Abasi ndufo, akisioho ndufo ke Iyib, asio ke isọñ ufʌn. 15 Anye akidat ndufo asaña ke akpa ye aniendịk anaan, isọñ unana mmọọñ ye nsaditọñ, ye ndiọi udʌkikọd ye mme ikpeyen. Anye akesio mmọọñ ke nsaad itiad inọọ ndufo. 16 Anye inọ ndufo mana nọ eta ke anaan, ñkpọ se mme eteete ndufo imiikidiọọñọke, adinam ndufo esuuhọ idem anyʌñ idomo ndufo ase nọ ato do ke utịd anye adiifọn ye ndufo. 17 Ndufo emekeme edibo idem ndufo ete, "Adudu mmi ye ukeme ubọk mmi anwana inie ami annọọ miin." 18 Ado itoiyo Abọọñ Abasi ndufo, sia anye ado andinọọ ndufo ukeme edinwana ñkpọ, anyʌñ asọọñọ edioomo a-anye akenwọñọke anọ mme ete ndufo, kpa naña ado mfịn.

19 Adieke ndufo efreke Abọọñ Abasi ndufo ndin ekeene mme abasi mfen enyʌñ ekpono enyʌñ etuak iwuod enọ ammọ, ami mmedo ntiense inọ ndufo mfịn ami mbo ke akpanikọ eyaisobo ndufo. 20 Kpa naña Abọọñ akesobo mme idịd e-ekebaaha mbemiso ndufo, kpa ntoro ke ediisobo ndufo ke editre edikop item Abọọñ Abasi ndufo.