1 Ikiidat abaakenañ me edọñ a-anieghe ndo inam uwa inọọ Abọọñ Abasi ndufo, sia adiido mbubiam inọ anye.

2 Adieke ekịtte naña awodeen me awonwaan a-adʌññọ ke atu ndufo ke abio ndufo keed A-Abọọñ inọọhọ ndufo, anamma idiọọkñkpọ ke iso Abọọñ Abasi ndufo ke adibiat mme edioomo amọ, 3 awọññọ akpọñ item mmi, akpono mme abasi mfen, atuak iwuod anọ mme udịmanyọñ e-edooho utịn me afiọñ me ntantaafiọñ ke ikpaanyọñ, 4 ndin enam ndufo ediọọñọ, ana ndufo enekke eduuñọ eti-eti. Akpedo akpanikọ ndin enyʌñ ewọt ke e-enam mbubiam adinam ami ke Isrel, 5 iben awodeen me awonwaan a-anamma idiọọkñkpọ ami ikaa inuaatob abio inyʌñ ikitọọñ anye ke itiad tutu anye akpa. 6 Ke ntiense awo iba me ita ke ana nte ewot awo, ado inaaha ewot awo ndomokeed ke ntiense awo keed kpọd. 7 Ana ubọk mme ntiense edo akpa adiwot awo ado, ndin mbon mfen ediana. Ana ndufo esio idiọọkñkpọ ado ke atu ndufo.

8 Adieke ebenne mme ikpe esọññọ ikan ndufo edikpe edi ke mme ufọkesob ndufo, me uwodawo, utọk me anwan, iben ammọ ikaa itie A-Abọọñ Abasi ndufo adiimek. 9 Ikaa ibịne mme aku Lifai ye abiideikpe a-abaaha ke utom idaha ado. Ibịp ammọ, ndin ammọ eyainọ ndufo ubiideikpe. 10 Ana ndufo enam ekeene se ammọ ebiere ke itie se Abọọñ adiimek. Ikpeme edinam afịd se ammọ ebo ndufo enam. 11 Inam ikeene se adodo a-ammọ ikpeebe ye mme ubiere a-ammọ enọọhọ. Ikiiwọññọ ikpọñ se ammọ itemme, ke nnasia me ke ufiin. 12 Ana ewot awo akeedodo a-amiommo abiideikpe me aku a-adaaha anam utom anọ Abọọñ Abasi ndufo. Ana esio idiọọkñkpọ ado ke Isrel. 13 Afịd awo eyaekop enyʌñ enie ndịk ebaña, inyʌññọ inam emiom aba.

14 Ndufo emaedʌk isọñ A-Abọọñ Abasi ndufo inọọhọ inyʌñ idat inie ndin edʌñọ ke esịd amọ, ndin ndufo ete, "Yak ñnyịn inie adidem se ikara ñnyịn kpa naña mme idịd ikannake ñnyịn ekʌk enie," 15 ikịt ibo ke ememek adidem A-Abọọñ Abasi ndufo amekke. Ana anye ado awo Isrel. Ikiinịm asenawo nọ ikara ndufo, awo i-imiidooho awo Isrel. 16 Ñko, adidem ado inaaha anie uwak-uwak enañmbakara ke idem amọ me anam ndufo etịmme eka Iyib ekekoono uwak-uwak enañmbakara mfen, sia Abọọñ Abasi ndufo i-idọkkọ ndufo, "Inaaha ndufo etịmme eka usʌñ ado aba." 17 Inaaha anye adọ uwak ibaan, imiidooho esịd amọ ayaatịmede. Inaaha anye anie uwak-uwak silfa ye kold.

18 Anye amaadọọk ebekpo ubọọñ amọ, ana anye awet anọ idem amọ ke ñwed mfen mme mbed ami, a-atooho mme aku Lifai. 19 Ana aba ye anye, ndin ana anye akoot anye afịd ayio uwem amọ nọ anye akpeep aditeeñe Abọọñ Abasi amọ anyʌñ anekke akeene afịd ikọ mbed ye mme ewʌhọ ami 20 inyʌññọ ikịt idem amọ nte imifọn ikan emọ-emọ mbon Isrel, ñnyʌñ ñwọññọ ñkpọñ mbed ñkaa nnasia me ufiin. Ndin anye ye ubon amọ eyaekara ke anyan isua ke ebekpo amọ ke Isrel.