1 Adieke akịtte naña abaakenañ me edọñ emọ-emọ awo Isrel atịn usʌñ, kuuboiyo ukpọñ, ado kịt bo ke imiben isọk andinie. 2 Akpedo ammọ idʌññọ ukpere fiin me udiọọñọke andinie, ben nyọñ ufọk mfo kenịm tutu andinie adiyem anye. Ndin yaak nọ andinie. 3 Nam ukem-ukem ado adieke afo akịtte dọñki me afọñ me ñkpọ ammọ ndomokeed mfen a-asoppo. Kuuboiyo ukpọñ.

4 Adieke afo akịtte naña dọñki me abaakenañ emọ-emọ awo Isrel aduọ ke usʌñ, kuusaña uboiyo. Nwam andinie nam nọ anye adakka ada.

5 Awonwaan inaaha asịne afọñ awodeen, awodeen ñko inaaha asịne afọñ awonwaan, sia Abọọñ Abasi ndufo a-asua awo se inam ntom.

6 Adieke afo akịtte efọk inuen ke mben usʌñ, me ke eto me ke isọñ, me naña eka inuen akʌbọ ke ñyịn me ke ñkwa, kuuben eka ye ñyịn. 7 Amekeme adiben ñyịn, ado kịt bo ke ameyaak eka nọ anyọñ, nọ afọn ye afo, afo anyʌñ anie anyan uwem.

8 Afo umaubọp ufa ufọk, bọp akọ kanna akọm mfo mbaak ududue isob uwodawo ke awo akpediañña ato akọm ado.

9 Ikiitọ utọ ñkpasi iba ke inwañ fain ndufo; adieke ndufo etọọhọ, ñkpọinwañ ye mfịd fain idiidooho adisana.

10 Ikiiyịt ayaaraenañ ye dọñki ikama ifʌñ isọñ inikeed.

11 Ikiisịne afọñ e-ewuaha idededọñ ye linen enam.

12 Inam ñyeriye ke naña inuuk inaañ afọñ se ndufo esịne.

13 Adieke awodeen adọọhọ anwaan ndin ke anye amaakenie ewuana ye anye, adisua anye 14 anyʌñ adot anye ikọ ndin abiat anyịñ amọ, ate, "Ami mmaadọ awonwaan ami, ado ñkenie ewuana ye anye, ñkịtte uwọdñkpọ mboppo ke idem amọ," 15 ndin ete ye eka ayịn abọikpa ado eyaeben uwọdñkpọ ke anye ado mboppo ediwọt mme ñkpisọñ abio. 16 Ete amọ ayaabo mme ñkpisọñ ate, "Ami ñkenọ ete ami ayịn awonwaan mmi ke ndọ, ado anye imaaha anye. 17 Idahami anye a-abiat anyịñ amọ anyʌñ abo, ‘Ayịn awonwaan mfo idooho mboppo.’ Ado se uwọdñkpọ mboppo ayịn mmi mi." Ndin ete ye eka eyaewọt mme ñkpisọñ abio ado afọñ ado, 18 ndin mme ñkpisọñ abio ado eyaemia awodeen ado ufen. 19 Eyaedia anye isob udomo sekel* silfa ikie enọ ete ayịn awonwaan ado, sia ete ado anọ mboppo Isrel idiọọk anyịñ. Anye ayaakaa iso ado anwaan amọ; inaaha anye asio anye ndọ adaña nte anye aduuho uwem.

20 Adieke ikọ ami adooho akpanikọ ndin uwọdñkpọ mboppo ayịn awonwaan ibaaha, 21 eyaeben anye ekaa anyenusʌñ ufọk ete amọ ndin ideen abio amọ eyaetọọñ anye ke itiad ewot. Anye a-anam abʌd-abʌd ñkpọ ke Isrel ke adisaña akpara ke ini anye asʌkkọ aba ke ufọk ete amọ. Ana esio mbubiam ke atu ndufo.

22 Adieke emʌmmọ awodeen naña anie ewuana ye anwaan awo mfen, ana awodeen ado ye awonwaan ado ekpa. Ana esio mbubiam ke atu Isrel.

23 Adieke awodeen akịtte mboppo e-emaekenyịmme ndọ ye awodeen mfen ke abio ndin anye akenie ewuana ye mboppo ado, 24 ana ndufo eben naña ammọ iba eka inuaatob abio ado enyʌñ etọọñ ammọ ke itiad tutu ammọ ekpañña, abọikpa ado sia anye akeba ke abio inyʌññọ isio ñkpo iyem unwam, awodeen ado sia anye amaasappa anwaan awo mfen. Ana esio mbubiam ke atu ndufo.

25 Ado akpedo awodeen akekịt mboppo e-ekenyịmmeke ndọ ke inwañ ndin anye anaa anye ke ñkanubọk, awodeen ado kpọd ana akpa. 26 Ikiinam awonwaan ado ñkpọ ndomokeed; anye inamma idiọọkñkpọ ndomokeed inyʌññọ idot ñkpa. Ikpe anyem atie nte awo adiwot mbọhọidʌñ amọ, 27 sia awodeen ado akekịt ayịn awonwaan ado ke inwañ, ndin akpesʌkado awonwaan ado amaabọñ ñkpo, ikibaaha awo se inwam anye.

28 Adieke awodeen akịtte mboppo a-awo imiinyịmmeke ndọ ado anaa anye ke ñkanubọk ndin enyʌñ emʌm ammọ, 29 awodeen ado ana akpe ete amọ udomo sekel* silfa aba mme duob. Ana anye adọ ayịn awonwaan ado, sia anye a-asappa anye. Inaaha awodeen ado asio awonwaan ado ndọ adaña nte awodeen ado aduuho uwem.

30 Awodeen inaaha adọ anwaan ete amọ; inaaha anye asuenne ñkpana* ete amọ.