* 1 Awodeen e-emaekesio anye asio ke unuanuak me ke ukpekpịkke inaaha adʌk esob Abọọñ.

2 Me ayịn esiin a-amanake ato ndọ i-imiibọọhọ unyịmme* me awo a-atooho utọ ubon ado inaaha adʌk esob Abọọñ, akpọkọm ado ayọhọ emana duob.

3 Awo Amọn me awo Mọb me ubon ammọ ndomokeed inaaha adʌk esob Abọọñ, akpọkọm awuọ ayọhọ emana duob. 4 Sia ammọ ikiwuọhọ idi ye uyo ye mmọọñ idinọ ndufo idaha a-ndufo ekekpọññọ isọñ Iyib, ndin ammọ emaekpe Balaam ayịn Beo a-aketooho Petọ ke Aram Naharaim* ate isuuñọ ndufo. 5 Ado Abọọñ Abasi ndufo ikikpañña utọñ inọ Balaam ado awọññọ isuuñọ ado akappa inọ ndufo nte adidiọñ, sia Abọọñ Abasi ndufo ima ndufo. 6 Ikiidʌk edioomo ufan ye ammọ adaña nte ndufo eduuho uwem.

7 Ikiise awo Edọm ke mbio, sia ammọ edo imaan ndufo. Ikiinyʌñ isịn awo Iyib ke mbio, sia ndufo emaedʌñọ nte mme adidʌñ ke idịd ammọ. 8 Ayọhọ emana ita nditọ emanna enọ ammọ ekeme edidʌk esob Abọọñ.

9 Ndufo imaiba ke itie nnaaekọñ ibaña mme asua ndufo, isio idem ikpọñ ñkpọ se imiisanake. 10 Adieke keed ke atu ideen ndufo imiisanake ato ke se iwuọñọ anye ke idem ke akonayio, yak anye aba ke anwa. 11 Ado amaakpere ndubiayio ana anye ayie idem amọ, ndin ke usobutịn anye akeme adinyọñ ñkaa itie nnaaekọñ.

12 Isio itie inịm ke anwa nnaaekọñ nte itie ukeñidem. 13 Ana enie ñkpọ se ekama edọk isọñ ke atu ñkpọ se ekama, ndin emaekeñ idem ndufo, itịppe adudu ifʌk ikọd ndufo. 14 Sia Abọọñ Abasi ndufo asasaaña ke itie nnaaekọñ adikpeme ndufo ñnyʌñ ñyaak mme asua ndufo inọọ ndufo. Ana itie nnaaekọñ ndufo ado adisana, mbaak anye adikịt ke atu ndufo ndek-ndek ñkpọ ndin anye akpa edem iwọt ndufo.

15 Adieke afʌn adutʌmọke fiin, kuuyak anye unọọ eteufọk amọ. 16 Yak ammọ edʌñ ke atu ndufo ke itie nte ammọ emama ke abio a-ammọ emekke. Ikiifʌnnọ ammọ.

17 Awodeen me awonwaan Isrel ndomokeed inaaha ado akpara ñwommo. 18 Inaaha eben inie akpara awonwaan me ake akpara awodeen* ndomokeed edʌk ufọk Abọọñ Abasi ndufo edikama ñkpe akaaña, sia Abọọñ Abasi ndufo asua ammọ iba.

19 Ikiibọọ emọ-emọ awo Isrel udod, me ke akʌk me ke ndidia me ke ñkpọ mfen akeedodo e-ekemeke edibọ udod. 20 Emekeme edibọ asenawo udod, ado idooho emọ-emọ awo Isrel, nọ Abọọñ Abasi ndufo idiọñ ndufo ke afịd ñkpọ se ubọk ndufo atuuk ke isọñ a-ndufo ekaaha edidat nnie.

21 Adieke enamma akaaña enọọ Abọọñ Abasi ndufo, ikiikpeene edisio anye, sia Abọọñ Abasi ndufo ayaibịp ndufo, ndin ndufo eyaedue isob idiọọkñkpọ. 22 Ado adieke ndufo imiinamma akaaña, ndufo idiidueghe isob idiọọkñkpọ. 23 Se inua ndufo etañ ke eyaenam, ana ekịt ke emenam, sia ekenam akaaña ado ke imaesịd enọ Abọọñ Abasi ndufo ke inua ndufo.

24 Adieke ndufo edʌkkọ inwañ fain mbọhọidʌñ ndufo, emekeme edidia afịd mfịd kreb se ndufo eyem, ado ikiisịn ndomokeed ke ekpad ndufo iben idakka. 25 Adieke ndufo edʌkkọ inwañ abakpa mbọhọidʌñ ndufo, emekeme editañ ñkwa ke ubọk ndufo, ado inaaha ndufo ekama akọbọ ekpeeñe abakpa se idudak adudak.