1 Ami ado mme item, mme ewʌhọ ye mme mbed A-Abọọñ Abasi ndufo abooho yak ami ikpeep ndufo nọ enam ke isọñ a-ndufo ekaañake Yọdan edidat nnie, 2 mbaak ndufo, nditọ ndufo ye nditọ ammọ eteeñe Abọọñ Abasi ndufo adaña nte ndufo eduuho uwem ke edinịm mme ewʌhọ ye mme item a-ami inọọhọ ndufo, nọ ndufo edu anyan uwem. 3 Kop, Isrel, nyʌñ kpeme adikop item mmi nọ afọn ye ndufo nọ enyʌñ etọt eti-eti ke isọñ a-afiọọrọke ye mmọọñeba ye adanakwọọk, kpa naña Abọọñ, Abasi mme eteete ndufo, akenwọñọ inọọ ndufo.

4 Kop, O Isrel: Abọọñ Abasi ñnyịn, Abọọñ ado keed.* Abasi ñnyịn ado Abọọñ; me Abọọñ ado Abasi ñnyịn, Abọọñ ado keed; me Abọọñ ado Abasi, Abọọñ ikpọọñ 5 Ima Abọọñ Abasi ndufo ke afịd esịd ndufo ye ke afịd ukpọñ ndufo ye ke afịd adudu ndufo. 6 Mme mbed se ami inọọ ndufo mfịn ami ana aba ke esịd ndufo. 7 Inam nditọ ndufo ediọọñọ mme mbed ami. Itañ ibaña mme mbed ami ke ini a-ndufo etieghe ke ufọk ye ke ini a-ndufo esañake ke usʌñ, ke ini a-ndufo enaahana ye ke ini a-ndufo edemmeke. 8 Itobo ammọ nte idiọọñọ ke ubọk ndufo inyʌñ idian ammọ ke akpọiso ndufo. 9 Iwet ammọ ke itịm usʌñufọk ndufo ye ke atob ndufo.

10 Abọọñ Abasi ndufo amaidat ndufo akewuọ isọñ a-anye akenwọñọke anọ mme ete ndufo, anọ Ebraham, Aisik ye Yekọb, adinọ ndufo, isọñ a-ayọhọke ye mme ikpọ mfọọn abio, a-ndufo imiikibọppọ, 11 ufọk a-ayọhọke ye afịd nti ñkpọ a-ndufo imiikibonoke, ube mmọọñ a-ndufo imiikitịppeke, inwañ fain ye inwañ ọlif a-ndufo imiikitọọhọ, ndin ndufo imaidia ñkpọ inyʌñ ikop uyʌkkọ, 12 ikpeme ke ndufo ifreke Abọọñ, a-akesioho ndufo akpọñ isọñ Iyib, asio ke isọñ ufʌn.

13 Iteeñe Abọọñ Abasi ndufo, inam ñkpọ inọ anye ikpọọñ inyʌñ idat unwọñọ ke anyịñ amọ. 14 Ikiikeene mme abasi mfen, mme abasi mbon e-edʌññọ ikanna ndufo ekʌk; 15 sia Abọọñ Abasi ndufo, a-abaaha ye ndufo, ado Abasi ufịb, ndin iyadesịd amọ ayaakpon eti-eti, ndin anye ayaisobo ndufo asio ke iso isọñ. 16 Ikiidomo Abọọñ Abasi ndufo idomo kpa naña ekenam ke Masa. 17 Ikịt ibo ke emenịm mbed Abọọñ Abasi ndufo ye mme ewʌhọ ye mme item a-anye inọọhọ ndufo. 18 Inam se inen ye se ifọn ke iso Abọọñ, nọ afọn ye ndufo, nọ ndufo enyʌñ ekaa ekedat eti isọñ se Abọọñ akenwọñọ ke unwọñọ anọ mme eteete ndufo, 19 abịne afịd mme asua ndufo asio, kpa naña Abọọñ akebo.

20 Ke ini iso, ayịn mfo amaubịp fiin, "Nsoo ke mme item, mme ewʌhọ ye mme mbed se Abọọñ Abasi ñnyịn akinọọ ndufo ewuọñọ?" 21 Dọkkọ anye: "Ñnyịn ikido ifʌn inọ Fero ke Iyib, ado Abọọñ amaisio ñnyịn ke Iyib ke akpọsọñ ubọk. 22 Ke iso ñnyịn Abọọñ amaadọñ mme idiọọñọ ye mme utịppeñkpọ, ñkpoon ye mme aniendịk, ke Iyib ye Fero ye afịd ufọk amọ. 23 Ado anye amaiben ñnyịn asio do anyʌñ iben ñnyịn adisịn, anyʌñ inọ ñnyịn isọñ a-anye akenwọñọke anọ mme eteete ñnyịn. 24 Abọọñ amainọ ñnyịn ewʌhọ ate inịm afịd mme mbed ado inyʌñ iteeñe Abọọñ Abasi ñnyịn, nọ ato do ñnyịn iforo afịd ini inyʌñ idu uwem, kpa naña ado mfịn ami. 25 Ndin adieke ñnyịn inekkeke inịm mme mbed ami ke iso Abọọñ Abasi ñnyịn, kpa naña anye abo inam, ado adiido adinenido ñnyịn."