18 Ñnyeñidem amaanam mme awo ke ini ammọ ekekịtte aduma ye akebkeb, enyʌñ ekop uyom adukpoñ, ye nsʌñikañ ke abod. Ammọ emaeda nsan-nsan 19 ebo Moses, "Tañ ikọ ke idem mfo inọ ñnyịn, ndin ñnyịn iyaikpañ utọñ unọ fiin. Ado kuuyak Abasi atañ ikọ inọ ñnyịn, mbaak ñnyịn idikpañña."
20 Moses amaabo ammọ ate, "Ikiifeghe ndịk. Abasi adi adidomo ndufo nse, nọ uteeñe Abasi aba ye ndufo, mbaak ndufo idikaiso inam idiọọkñkpọ."
21 Mbon awo ekesʌk eda nsan-nsan, ado Moses amaasaña akpere ukañ akpọsọñ ekịm, itie A-Abasi akebaaha.
Mme Usọsọi Ñkpọ ye Mme Akpokoro Uwa
22 Akema, Abọọñ amaabo Moses ate, "Dọkkọ nditọ Isrel ate: ‘Ndufo emekịt ke idem ndufo ke ami mmetie ke anyọñ ntañ ikọ inọ ndufo: 23 Ikiibot mme abasi indian miin; ikiibot abasi a-silfa me abasi a-kold.’ "
24 " ‘Inam itieukpono ke ntanisọñ innọ miin, inyʌñ inam ufọfọb uwa ke ndo ye uwa ewuana, iwa mme edọñ, ebod ye ufene ndufo. Itie akeedodo a-ami nnịmme nọ adikpono anyịñ mmi, ami ñyaadidiọñ ndufo ke ndo. 25 Adieke ndufo ebọppọ akpokoro uwa ke itiad ennọọ miin, ikiikama itiad e-ediọññọdiọñ ibọp, sia ndufo eyaesappa anye adieke ekamake ñkpọutom ediọñ anye. 26 Ñko ikiisaña ke mme utọukod idọọk akpokoro uwa mmi, mbaak idifʌkkọ ifed ndufo.’ "