Yenesis 26

Aisik ye Abimelek

1 Idaha ntoro akañ amaaba ke isọñ, adian ye anye a-akebaaha ke ini Ebraham, ndin Aisik amaakaa abịne Abimelek adidem Filistia ke Kera. 2 Ndin Abọọñ amaayaara idem anọ Aisik anyʌñ abo, "Kuusọiyọ ukaa ke Iyib; dʌñ ke isọñ a-ami mbooho afo adʌñ. 3 Dʌñ ke isọñ ami ke ibio-ibio ini, ndin ami ñyaaba ye afo, ñyaanyʌñ udiọñ fiin. Sia ami ñyaunọ fiin ye afịd ubon mfo afịd isọñ ami, ñyaanyʌñ nsọọñọ enwọñọ añkenwọñọke nnọ ete mfo Ebraham. 4 Ñyaanyʌñ nnam ubon mfo awak nte ntantaafiọñ ke ikpaanyọñ, ñnyʌñ nnọ afịd ammọ isọñ ami. Ndin ayaato ke mfịdidịb mfo afịd mme idịd ke ederimbod ebọ adidiọñ, 5 sia Ebraham amaakop item annọ miin anyʌñ anam afịdñkpọ se ami ñkeyem anye anam, anịm mme ewʌhọ mmi, mme mbed ye mme item mmi." 6 Ndin Aisik amaadʌñ ke Kera.

7 Ke ini ideen ke idʌñ ado ekebịppe anye ebaña anwaan amọ, anye amaabọọrọ ate, "Anye ado ayịneka mmi awonwaan," sia ndịk amaanam anye adibo, "Anye ado anwaan mmi." Anye amaakere abo, "Ideen idʌñ ado ekeme ediñwot miin ke iwuod Ribeka, sia anye a-ayaiyake."

8 Ke ini Aisik amaakedʌñ do akpeene, Abimelek adidem Filistia amaasuuk anyen ke ubenafịm anyʌñ akịt Aisik naña abre mbre ima ye Ribeka.