Isaías 8

ईशायाह गूरो शोहरू हुअ लोगा लै नछ़ैण

1 बिधाता बोलअ मुल्है इहअ, "एक बडी तगती च़क संघा लिख तेथ बडै-बडै आखरा इहअ, ‘झ़टपटै लुट, छ़ेक्‍कै च़ोर।’ 2 आप्पू संघै निंऊं दूई शुचै-पाक्‍कै मणछ उरियाह प्रोहत अर जेबरेक्यो शोहरू जकर्या ताकि तिंयां ऐहा गल्‍ले शाजत होए।"

3 थोल़ै धैल़ै बाद हुई मेरी लाल़ी सुंदी। ज़ांऊं म्हारअ शोहरू हुअ, बिधाता बोलअ मुल्है इहअ, "एऊ नाअं डाह, ‘झ़टपटै लुट, छ़ेक्‍कै च़ोर।’ 4 किल्हैकि ज़ेतरी अह शोहरू ‘ईजा-बाबा’ बोल्दअ हणअ, तेतरी हेरनी राज़धानी दमिश्क अर सामरी*8:4 दमिश्क अर सामरी मतलब सिरीया अर इज़राईल नगरीए धन-माया अश्शूरी राज़ै आप्पू संघै लुटी निंईं।"

अश्शूर देशो राज़अ आसा एछणैं आल़अ

5 बिधाता किई मुंह संघै भिई गल्‍ला। 6 तेऊ बोलअ मुल्है इहअ, "ईंयां लोग समझ़ा शिलोहे गाडा ज़ाईरू पाणीं बृथा! ईंयां आसा रेमले शोहरू पेका अर राज़ै रसीना बाखा फिरै दै। 7 ऐबै छ़ाडणअ मुंह थारै मालक बिधाता अश्शूर देशो राज़अ अर तेऊए सैना यहूदा देशा संघै जुधा लै। तिन्‍नां पल़णअ इना लै इहै चुटी ज़िहअ फरात दरैअ एछी बाढा प्रैंदी बगा। 8 तिन्‍नें सैना भर्हनीं यहूदा देशै एही ज़िहअ दरैओ हर्हल एछी गल़ै तैणीं भर्हिया।"

पर मालक आसा हाम्हां संघै तेऊ करनीं आपणैं फैंख फुआरी म्हारै सारै देशे फाज़त।

9 देशा-देशे लोगो! तम्हैं लागा जुधा लै कठा हंदै! तम्हैं पृथूईए पुंझ़ा तैणीं ज़ेतरै आसा, शूणां, तम्हैं लागा जुधा लै तैर्हदै पर तम्हैं हणैं खतम। 10 तम्हैं सोठा च़ाऐ केतरी तरकिबा! पर तिंयां निं सफल हणीं। तम्हैं बोलअ च़ाऐ किछ़ बी, पर तिंयां गल्‍ला हणीं सोभ बृथा! किल्हैकि हाम्हां संघै आसा परमेशर आप्पै।✝8:10 रोम. 8:31; सैणीं. 31:30

बिधाता दैनी गूरा लै चतैनगी

11 बिधाता दैनी मुल्है आपणअ महान ज़ोर रहैऊई चतैनगी कि तैहा बाता निं डेऊई ज़ेथ ईंयां होर लोग डेओआ। बिधाता बोलअ, 12 "ज़ेता लै ईंयां द्रोह खोज़ा, तेता निं तूह मनी अर ज़हा गल्‍ला करै ईंयां डरैऊआ, तेता का निं तूह डरदअ लागी। 13 तूह डाहै ऐहा गल्‍ला आद कि हुंह आसा स्वर्गे सारी सैनो मालक बिधाता, तूह मनै मुंह ई पबित्र अर मेरी डअर अर कदर करै। 14 तूह लऐ मुंह सेटा शरण। हुंह आसा एही टोल्हा ज़िहअ ज़ेथ यहूदा अर इज़राईला दुही ठोहल़ लागणीं अर ज़ेथ तिन्‍नें हाडकै चुटणैं। हुंह आसा एही फाही ज़ुंण एरुशलेम नगरीए लोगा लै पल़णीं।✝8:14 रोम. 9:32-33 15 खास्सै लागणीं ठोहल़, तिंयां बधल़णैं धरनीं संघा हणैं हक्‍क। तिंयां ढाकणैं खल़ाक्‍की करै।"✝8:15 मोत्त. 21:14

मणशाण झ़ैऊंणे बारै चतैनगी

16 तम्हैं ज़ुंण मेरै च़ेल्‍लै आसा, तम्हैं डाहा तिन्‍नां चतैनगी अर शाजती च़फल़ी ज़ुंण परमेशरै मुखा खोज़ी। 17 बिधाता आसा याकबे आद-लुआदा बाखा पिठ डाही दी फरेऊई, पर मुंह डाहणअ बिधाता दी भरोस्सअ, मुंह करनअ सबर संघा रहणअ तेऊ न्हैल़ै लागी।✝8:17 मिक. 3:4; भज. 27:14

18 हुंह आसा इधी आपणैं लान्हैं-सुन्हैं संघै ज़ुंण मुल्है बिधाता दैनै। स्वर्गे सारी सैनो मालक बिधाता ज़सरी राज़गाद्दी सियोन धारा आसा, तेऊ आसा हाम्हैं इज़राईला लै ज़िऊंदै समादे रुपै छ़ाडै दै।✝8:18 इब्रा. 2:13

19 लोग सका इहअ बोली, "च़ेल्‍लै अर मणशाण झ़ैऊंणै आल़ै सेटा डेओआ पुछ़दै च़ाऊंडा बोला अर खाखा भितरी सुलै-सुलै गल्‍ला करा।" तेभै बोलै तम्हैं इहअ, "परज़ा लागा आपणैं परमेशरा ई सेटा पुछ़दै डेऊणअ, ज़िऊंणां लै कै मूंऐं दै मणछा पुछ़दै लागा डेऊणअ?"✝8:19 मोत्त. 21:44

20 तम्हैं करै तिन्‍नां संघै बिधाते बधाने बारै ज़बाब दैई! ज़ुंण बिधाते बधाने साबै गल्‍ला नांईं करे, सह आसा पठी न्हैरै दी।

खरीओ बगत

21 लोगा पल़णीं खास्सी खरी, तिंयां हणैं खास्सै भुखै अर रोश्शै लागणै तिंयां आपणैं राज़ै अर आपणैं परमेशरा लै फिटक दैंदै संघा लागणै उझै सरगा बाखा भाल़ै, 22 घल़ी लागणै धरनीं भाल़ै कि तिन्‍नां किधी तिन्‍नें खरी लै मज़त भेटे, पर तिन्‍नां का शुझणीं आफ़त अर न्हैरअ ई, इहअ नटिप्प न्हैरअ ज़ेथ तिंयां डेऊणैं।✝8:22 सप. 1:14-15