1 యెహోవాను స్తుతించండి.*

యథార్థవంతుల సభలో సమాజంలో

నేను హృదయమంతటితో యెహోవాను స్తుతిస్తాను.

2 యెహోవా కార్యాలు గొప్పవి;

వాటిలో ఆనందించే వారందరు వాటి గురించి ధ్యానిస్తారు.

3 ఆయన క్రియలు కీర్తనీయమైనవి ప్రభావవంతమైనవి,

ఆయన నీతి నిరంతరం ఉంటుంది.

4 మనుష్యులకు జ్ఞాపకముండేటట్లు ఆయన అద్భుతాలు చేస్తారు;

యెహోవా దయామయుడు. కనికరం గలవారు.

5 భయభక్తులు గలవారిని పోషిస్తారు.

ఆయన తన నిబంధన ఎప్పుడూ జ్ఞాపకం చేసుకుంటారు.

6 తన ప్రజలకు ఇతర దేశాలను వారసత్వంగా ఇచ్చి,

తన క్రియలలోని బలప్రభావాలను వారికి వెల్లడించారు.

7 ఆయన చేతుల పనులు విశ్వసనీయమైనవి న్యాయమైనవి;

ఆయన కట్టడలు నమ్మదగినవి.

8 అవి శాశ్వతంగా స్థాపించబడ్డాయి,

నమ్మకత్వంతో యథార్థతతో అవి చేయబడ్డాయి.

9 ఆయన తన ప్రజలకు విమోచన సమకూర్చారు;

ఆయన తన ఒడంబడికను శాశ్వతంగా నియమించారు,

ఆయన నామం పరిశుద్ధమైనది భీకరమైనది.

10 యెహోవాయందు భయం జ్ఞానానికి మూలం;

ఆయన కట్టడలను పాటించేవారు మంచి గ్రహింపు కలిగి ఉంటారు.

స్తుతి నిత్యం ఆయనకే చెందును.