కీర్తనలు 82

ఆసాపు కీర్తన.

1 దేవుడు గొప్ప సభలో నిలబడి ఉన్నారు;

ఆయన దైవముల మధ్య తీర్పు ఇస్తారు:

2 "మీరు ఎంతకాలం అన్యాయాలను సమర్థిస్తారు

దుష్టులకు పక్షపాతం చూపిస్తారు? సెలా

3 బలహీనులు, తండ్రిలేనివారి పక్షం వహించండి;

పేదలకు అణచివేయబడిన వారికి న్యాయం చేయండి.

4 బలహీనులను అవసరతలో ఉన్నవారిని కాపాడండి;

దుష్టుల చేతి నుండి వారిని విడిపించండి.

5 "వారికి ఏమి తెలియదు, వారు ఏమి గ్రహించరు.

వారు చీకటిలో తిరుగుతారు;

భూమి పునాదులు కదిలిపోయాయి.

6 " ‘మీరు "దేవుళ్ళు";

మీరంతా మహోన్నతుని కుమారులు.’

7 అయితే మీరు ఇతర మనుష్యుల్లా చస్తారు;

ఇతర పాలకుల్లా మీరు కూలిపోతారు, అని నేనన్నాను."

8 ఓ దేవా, లేవండి, భూమికి తీర్పు తీర్చండి,

ఎందుకంటే అన్ని దేశాలు మీ వారసత్వంగా ఉన్నాయి.