ସିର୍ମାରାଃ ଜମେୟାଃ ମାନ୍ନା
1 ଏନ୍ତେ ଇସ୍ରାଏଲ୍ ସାମାଜ୍ରେନ୍ ସବେନ୍କ ଏଲିମ୍ତାଃଏତେ ହରାସେନ୍କେଦାକ, ଓଡ଼ୋଃ ମିସାର୍ ଦିଶୁମ୍ଏତେ ଅଡଙ୍ଗ୍ୟାନ୍ ତାୟମ୍ତେ ବାର୍ ମାହିଁନାରାଃ ଗେଲ୍ ଉପୁନିୟା ହୁଲାଙ୍ଗ୍ରେ ସବେନ୍ ଇସ୍ରାଏଲ୍ ହଡ଼କ ଏଲିମ୍ ଓଡ଼ୋଃ ସିନାଇରାଃ ଥାଲାରେ ତାଇକାନ୍ ସିନ୍ ନୁତୁମ୍ ବିର୍ତାଃରେ ସେଟେର୍ୟାନାକ। 2 ଏନ୍ତାଃରେ ଇସ୍ରାଏଲ୍ ସାମାଜ୍ରେନ୍ ସବେନ୍ ହଡ଼କ ମୁଶା ଓଡ଼ୋଃ ହାରୁନ୍ଆଃ ବିରୁଧ୍ରେ କୁରୁମ୍ଡୁରୁମ୍ୟାନାକ। 3 ଓଡ଼ୋଃ ଇସ୍ରାଏଲ୍ ହଡ଼କ ଇନ୍କିନ୍କେ କାଜିକେଦ୍କିନାକ, "ଆଲେ ଚିମ୍ତାଙ୍ଗ୍ ମିସାର୍ ଦିଶୁମ୍ରେ ମାସ୍ ହାଣ୍ଡିଆ ହେପାଦ୍ରେ ତାଇନ୍କେଦ୍ତେ ଲାହିଦ୍ ପେରେଃ ଜମ୍ ତାଇକେନାଲେ, ଇମ୍ତା ଆଲେ ମିସାର୍ ଦିଶୁମ୍ରେ ପ୍ରାଭୁଆଃ ତିଃଇରେ ଗନଏଃ ହବାକାନ୍ତେୟାଃ ରେଦ ବୁଗିନ୍ ହବାକାନ୍ତେୟାଃ। ମେନ୍ଦ ଆବେନ୍ ଆଲେ ସବେନ୍କକେ ବିର୍ରେ ରେଙ୍ଗେଃତେ ଗଏଃ ନାଙ୍ଗ୍ ଅଡଙ୍ଗ୍ ଆଉକାଦ୍ଲେୟାବେନ୍।"
4 ଏନ୍ତେ ପ୍ରାଭୁ ମୁଶାକେ କାଜିକିୟା, "ଆଇଙ୍ଗ୍ ଆପେ ନାଙ୍ଗ୍ ସିର୍ମାଏତେ ଜମେୟାଃ ଗାମାୟାଇଙ୍ଗ୍। ହଡ଼କ ବାହାରି ସେନ୍କେଦ୍ତେ ମିପିଦ୍ ହୁଲାଙ୍ଗ୍ରେ ଜମ୍ ଦାଡ଼ି ଲେକା ଜମେୟାଃ ହୁଣ୍ଡିକେଦ୍ତେ ଦହେକାକ। ଏନ୍ ଲେକାତେ ଇନ୍କୁ ଆଇଙ୍ଗ୍ ଆଚୁକାଦ୍ ଲେକା ସେସେନାକଚି କାହା, ଏନା ଆଇଙ୍ଗ୍ ଇନ୍କୁକେ ବିଡ଼ାଅକଆଇଙ୍ଗ୍। 5 ତୁରିୟା ହୁଲାଙ୍ଗ୍ରେ ଇନ୍କୁ ଅକ୍ନାଃ ଆଉୟାକ, ଏନାକେ ଆନ୍ଦାଃଲେରେ ମିପିଦ୍ ହୁଲାଙ୍ଗ୍ ଅକ୍ନାଃ ହୁଣ୍ଡିୟାକ, ଏନା ବାର୍ଗୁନା ହବାଅଃଆ।"
6 ଏନାମେନ୍ତେ ମୁଶା ଓଡ଼ୋଃ ହାରୁନ୍ ଇସ୍ରାଏଲ୍ ହଡ଼କକେ କାଜିକେଦ୍କଆକିନ୍, "ପ୍ରାଭୁ ପାର୍ମେଶ୍ୱାର୍ ଆପେକେ ମିସାର୍ ଦିଶୁମ୍ଏତେ ଅଡଙ୍ଗ୍ ଆଉକାଦ୍ପେୟା, ଏନା ଆପେ ସିଙ୍ଗିହାସୁର୍ ଇମ୍ତା ସାରିୟାଃପେ। 7 ଓଡ଼ୋଃ ସେତାଃ ଇମ୍ତା ଆପେ ପ୍ରାଭୁ ପାର୍ମେଶ୍ୱାର୍ଆଃ ମାନାରାଙ୍ଗ୍ପେ ନେଲେୟା। ଇନିଃ ଆପେୟା କୁର୍ବୁରାଅ ତେୟାଃ ଆୟୁମ୍ କାଦା। ଆଲିଙ୍ଗ୍ ଅକଏ ତାନ୍ଲିଙ୍ଗ୍ ? ଆପେୟା ସବେର୍ କୁର୍ବୁରାଅ ଆଲିଙ୍ଗ୍କେ କାଗି ପାର୍ମେଶ୍ୱାର୍କେପେ ରିକାତାନା।" 8 ଏନ୍ତେ ମୁଶା କାଜିକେଦା, "ସିଙ୍ଗିହାସୁର୍ରେ ଆପେକେ ମାସ୍ ଓଡ଼ୋଃ ସେତାଃରେ ହଲଙ୍ଗ୍ ଲାହିଦ୍ ପେରେଃ ଜମ୍ ଏମାପେୟା। ଆପେୟାଃ କୁର୍ବୁରାଅତେୟାଃ ଆୟୁମ୍କାଦା। ଆଲିଙ୍ଗ୍ ଅକଏ ତାନ୍ଲିଙ୍ଗ୍ ? ଆପେୟାଃ ସବେନ୍ କୁର୍ବୁରାଅ ଆଲିଙ୍ଗ୍କେ କାଗି ପ୍ରାଭୁକେପେ ରିକାତାନା।"
9 ଓଡ଼ୋଃ ମୁଶା ହାରୁନ୍କେ କାଜିକିୟା, "ଆମ୍ ଇସ୍ରାଏଲ୍ ହନ୍କଆଃ ସବେନ୍ ସାମାଜ୍କକେ କାଜିକମେ, ଆପେ ପ୍ରାଭୁ ପାର୍ମେଶ୍ୱାର୍ଆଃ ନାଡ଼େଃତେ ହିଜୁଃପେ, ଚିଆଃଚି ଇନିଃ ଆପେୟା କୁର୍ବୁରାଅ ଆୟୁମ୍କାଦା।" 10 ଏନ୍ତେ ହାରୁନ୍ ଇସ୍ରାଏଲ୍ ହନ୍କଆଃ ସବେନ୍ ସାମାଜ୍କକେ ନେଆ କାଜିତାନ୍ ଇମ୍ତାଙ୍ଗ୍ ଇନ୍କୁ ବିର୍ସାଃ ନେଲେ ଚି ପ୍ରାଭୁ ପାର୍ମେଶ୍ୱାର୍ଆଃ ମାନାରାଙ୍ଗ୍ ରିମିଲ୍ରେ ଉଦୁବ୍ୟାନା। 11 ଓଡ଼ୋଃ ପ୍ରାଭୁ ପାର୍ମେଶ୍ୱାର୍ ମୁଶାକେ କାଜିକିୟା, 12 "ଆଇଙ୍ଗ୍ ଇସ୍ରାଏଲ୍ ହନ୍କଆଃ କୁର୍ବୁରାଅ ତେୟାଃ ଆୟୁମ୍ କାଦା, ଆମ୍ ଇନ୍କୁକେ କାଜିୟାକମ୍, ଆପେ ସିଙ୍ଗିହାସୁରଃ ଇମ୍ତାଙ୍ଗ୍ ମାସ୍ ଜମେୟାଁପେ ଓଡ଼ୋଃ ସେତାଃରେ ଲାହିଦ୍ ପେରେଃ ହଲଙ୍ଗ୍ ଜମେୟାଁପେ, ଏନାରେ ଆପେ ସାରିୟା ଜେ ଆଇଙ୍ଗ୍ ଆପେୟା ପ୍ରାଭୁ ପାର୍ମେଶ୍ୱାର୍ ତାନିଙ୍ଗ୍।"
13 ସିଙ୍ଗିହାସୁର୍ୟାନ୍ଚି ଭାଟୋଇ ଅଡ଼େକ ହିଜୁଃ କେଦ୍ତେ ଡେରା ଠାୟାଦ୍କେ ହାରୁବ୍କେଦା, ଓଡ଼ୋଃ ସେତାଃ ଇମ୍ତାଙ୍ଗ୍ ଡେରା ଠାୟାଦ୍ ସବେର୍ ସାଃ ସିସିର୍ ଦାଃଆ ଉୟୁଃୟାନା। 14 ଚିମ୍ତାଙ୍ଗ୍ ସିସିର୍ ଦାଃଆ ରହଡ଼୍ୟାନା ବିର୍ରେୟାଃ ଅତେରେ ହୁପୁଡିଙ୍ଗ୍ ହୁପୁଡିଙ୍ଗ୍ ଏଣ୍ଡାଗାକାନ୍ ତାଇକେନା। 15 ଇସ୍ରାଏଲ୍ ହଡ଼କ ଆକ ଆକରେ ନେପେଲ୍କେଦ୍ତେ କାଜିକେଦା, "ନେଆ ଚିନାଃ ତାନା ?" ମେନ୍ଦ ଇନ୍କୁ ଏନା କାକ ସାରିଦାଡ଼ିୟାନା।
ଏନ୍ତେ ମୁଶା କାଜିକେଦା, "ନେଆ ଜଜମ୍ ତେୟାଃ ତାନା ଆପେ ଜମେୟାଃପେ ମେନ୍ତେ ପ୍ରାଭୁ ଏମାକାଦାଏ। 16 ଅକ୍ନାଃ ପ୍ରାଭୁ ପାର୍ମେଶ୍ୱାର୍ ଆଚୁକାଦା ଏନା ନେଆ ଜେ, ଆପେ ଆପେୟା ଜମ୍ ଦାଡ଼ିଲେକା ହୁଣ୍ଡିପେ। ଆପେୟା କୁମ୍ବାରେ ଚିମିନ୍ ମେନାକଆ, ମିମିଆଦ୍ ହଡ଼ ନାଗେନ୍ତେ ମିଦ୍ ଓମାର୍ ହୁଣ୍ଡିପେ।"
17 ଇସ୍ରାଏଲ୍ ହଡ଼କ ଏନ୍ଲେକା ରିକାକେଦା। ଚିମିନ୍କ ଥିମ୍ବାଗି ଓଡ଼ୋଃ ଚିମିନ୍କ ହୁଡିଙ୍ଗ୍ଲେକା ହୁଣ୍ଡିକେଦା। 18 ଇନ୍କୁ ଓମାର୍ ଅଜାନ୍ ଲେକା ହୁଣ୍ଡିୟାକାଦ୍ ତାଇକେନାକ, ଏନାମେନ୍ତେ ଜେତାଏ ପୁରାଃଗି ହୁଣ୍ଡିକେଦା, ଇନିୟାଃ କା ବାଚାଅୟାନା, ଓଡ଼ୋଃ ଜେତାଏ କାଟିଃଗି ହୁଣ୍ଡିକେଦା, ଇନିୟାଃ କା ଜାଞ୍ଜିୟାନା। ଚିଆଃଚି ଇନ୍କୁ ମିମିଆଦ୍ ହଡ଼ଲେକା ହୁଣ୍ଡିୟାକାଦ୍ ତାଇକେନାକ। 19 ଏନ୍ତେ ମୁଶା ଇନ୍କୁକେ କାଜିକେଦ୍କଆଏ, "ଆପେ ଜେତାଏ ସେତାଃ ଜାକେଦ୍ ଜେତ୍ନାଃ ଆଲପେ ଦହୟା।" 20 ଇମିନ୍ରେହ ଚିମିନ୍କ ମୁଶାରାଃ କାଜି କାକ ଆୟୁମ୍ କେଦ୍ତେ ସେତାଃ ଜାକେଦ୍ ଦହକେଦା। ମେନ୍ଦ ଏନାରେ ତିଜୁ କେଦ୍ତେ ସହାନ୍ୟାନା। ଏନାମେନ୍ତେ ମୁଶା ଇନ୍କୁଆ ଚେତାନ୍ରେ ରିସ୍ମିୟାନାଏ। 21 ନେଲେକା ଇନ୍କୁ ସବେର୍ ହୁଲାଙ୍ଗ୍ ସେତାଃ ଆପାନ୍ ଆପାନ୍ ଜମ୍ ଲେକା ହୁଣ୍ଡି ତାଇକେନାକ, ମେନ୍ଦ ପୁରାଃ ସିଙ୍ଗି ନାଗେନ୍ତେ ଏନା ସେର୍କେନଃ ତାଇକେନା।
22 ତୁରିୟା ହୁଲାଙ୍ଗ୍ରେ ଇନ୍କୁ ବାର୍ଗୁନା ହୁଣ୍ଡିକେଦାକ ଓଡ଼ୋଃ ମିମିଆଦ୍ ହଡ଼ ବାର୍ ଓମାର୍ ଜମେୟାଁ ହୁଣ୍ଡିକେଦାକ, ଏନାରେ ସାମାଜ୍ରେନ୍ ଆଗୁଆଇକ ମୁଶାତାଃ ହିଜୁଃକେଦ୍ତେ କାଜିକିୟାକ। 23 ମୁଶା ଇନ୍କୁକେ କାଜିକେଦ୍କଆ, ନେ’ଲେକା ରିକା ନାଗେନ୍ତେ ପ୍ରାଭୁ କାଜିକାଦା, "ଗାପା ମେୟାଙ୍ଗ୍ ରୁଡ଼ୁନ୍ ହୁଲାଙ୍ଗ୍ ତାନାଃ। ପ୍ରାଭୁଆଃ ନାଗେନ୍ତେ ପାବିତାର୍ ରୁଡ଼ୁନ୍ ହବାଅଃଆ। ଏନାମେନ୍ତେ ଆପେଏତେ ଜେତାଏତାଃରେ ଆତାତେୟାଃ ତାଇନଃ ରେଦ, ଆତାଏକା ଓଡ଼ୋଃ ଇସିନ୍ତେୟାଃ ତାଇନଃ ରେଦ ଇସିନେକାଏ। ମେନ୍ଦ ଚିମିନ୍ ସାରେଜ୍କଆଃ, ଏନାକେ ସେତାଃ ଜାକେଦ୍ ମାଣ୍ଡାଅକାପେ।" 24 ଏନାମେନ୍ତେ ଇନ୍କୁ ମୁଶାରାଃ କାଜିଲେକା ସେତାଃ ଜାକେଦ୍ ଚିମିନ୍ ମାଣ୍ଡାଅକାଦ୍ ତାଇକେନାକ ଏନା କା ସହାନ୍ୟାନା ଚି କା ତିଜୁୟାନା। 25 ଏନ୍ତେ ମୁଶା କାଜିକେଦା, "ତିସିଙ୍ଗ୍ ନେଆଁକେ ଜମେପେ ଚିଆଃଚି ତିସିଙ୍ଗ୍ଦ ପ୍ରାଭୁଆଃ ରୁଡ଼ୁନ୍ ହୁଲାଙ୍ଗ୍ ତାନାଃ। ଏନାମେନ୍ତେ ତିସିଙ୍ଗ୍ ଆପେ ପିଡ଼ିରେ କାପେ ନାମେୟା। 26 ଆପେ ତୁରିୟା ହୁଲାଙ୍ଗ୍ ଜାକେଦ୍ ହୁଣ୍ଡିପେ, ଏୟା ହୁଲାଙ୍ଗ୍ ରୁଡ଼ୁନ୍ ହୁଲାଙ୍ଗ୍ ତାନାଃ, ଏନ୍ ହୁଲାଙ୍ଗ୍ରେ ଏନା କାପେ ନାମେୟା।"
27 ଇମିନ୍ରେଅ ଚିମିନ୍କ ଏୟା ଦିନ୍ରେ ପିଡ଼ିତେ ହୁଣ୍ଡି ନାଗେନ୍ତେ ସେନ୍କେନା ମେନ୍ଦ ଇନ୍କୁକେ ଜେତ୍ନାଃ କାକ ନାମ୍କେଦା। 28 ଏନ୍ତେ ପ୍ରାଭୁ ମୁଶାକେ କାଜିକିୟା, "ଚିମିନ୍ ଦିନ୍ ଜାକେଦ୍ ଆମାଃ ହଡ଼କ ଆଇଁୟାଃ କାଜି ଓଡ଼ୋଃ ଆନ୍ଚୁ କାକ ମାନାତିୟାଁଃ ? 29 ନେଲେପେ ଆପେକେ ପ୍ରାଭୁ ରୁଡ଼ୁନ୍ ଦିନ୍ ଏମାକାଦ୍ପେୟା, ଏନାମେନ୍ତେ ତୁରିୟା ଦିନ୍ରେ ବାର୍ସିଙ୍ଗ୍ରାଃ ଜମେୟାଁ ଏମାପେତାନା। ଏନା ନାଗେନ୍ତେ ଆପେ ରୁଡ଼ୁନ୍ ହୁଲାଙ୍ଗ୍ରେ ଜାହାଁତାଃତେ କା ସେନ୍ କେଦ୍ତେ ଆପ୍ନାଃ ଆପ୍ନାଃ ଠାୟାଦ୍ରେ ତାଇନଃପେ।" 30 ଏନ୍ତେ ଏୟା ହୁଲାଙ୍ଗ୍ରେ ହଡ଼କ ରୁଡ଼ୁୟାନା।
31 ଇସ୍ରାଏଲ୍ ହଡ଼କ ଏନ୍ ଜମେୟାଃକେ ମାନ୍ନା ନୁତୁମ୍କେଦାକ। ଏନା ଧାନିଆଁ ଲେକା ପୁଣ୍ଡି ତାଇକେନା ଓଡ଼ୋଃ ହୁରୁମ୍ସୁକୁରେ ବାଇକାନ୍ ହଲଙ୍ଗ୍ ଲେକା ହେଡ଼େମ୍ ତାଇକେନା। 32 ଏନ୍ତେ ମୁଶା କାଜିକେଦା, "ପ୍ରାଭୁ ନେ ହୁକୁମ୍ ଏମାକାଦାଏ ଜେ ଆପେ ଆପେୟା କିଲିରେନ୍ ହନ୍କଆଃ ନାଗେନ୍ତେ ମିଆଦ୍ ଓମାର୍ ମାନ୍ନା ମାଣ୍ଡାଅ କାପେ। ଏନାରେ ଇନ୍କୁ ସାରିୟାକ ଜେ ପ୍ରାଭୁ ଆପେକେ ମିସାର୍ ଦିଶୁମ୍ ହେତେ ଅଡଙ୍ଗ୍ କେଦ୍ତେ ଚିଲ୍କା ବୁରୁରେ ଜଜମା ଏମାଦ୍ପେୟା।" 33 ମୁଶା ହାରୁନ୍କେ କାଜିକିୟା, "ଆମ୍ ମିଆଦ୍ ଚାଟୁ ଇଦିକେଦ୍ତେ ଏନାରେ ମିଦ୍ ଓମାର୍ ଅଜାନ୍ ମାନ୍ନା ପେରେଃ କେଦ୍ତେ ପ୍ରାଭୁଆଃ ଆୟାର୍ରେ ଦହଏମେ, ଏନା ଆମାଃ ପିଢ଼ିକଆଃ ନାଗେନ୍ତେ ଦହଅଃଆ।" 34 ଚିଲ୍କା ମୁଶାକେ ପ୍ରାଭୁ ଆଚୁକାଇ ତାଇକେନା, ଏନ୍ଲେକା ହାରୁନ୍ ରାଜିନାମାରେୟାଃ ବାକ୍ସା ଆୟାର୍ରେ ଦହକେଦା। 35 ଇସ୍ରାଏଲ୍ ହଡ଼କ ଆକଆଃ ତାଇନଃ ଠାୟାଦ୍ କାକ ସେଟେର୍ ଜାକେଦ୍ ଗେଲ୍ ହିସି ବାରାଷ୍ ଜାକେଦ୍ ମାନ୍ନା ଜମ୍ତାଇକେନାକ। ଇନ୍କୁ କିନାନ୍ ଦିଶୁମ୍ରାଃ ଗେନା ଆଉରି ସେଟେର୍ ଜାକେଦ୍ ମାନ୍ନା ଜମ୍ତାଇକେନାକ। 36 ମିଆଦ୍ ଓମାର୍ରେ ଗେଲ୍ କେଜି ହବାଅଃଆ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)