1 ଓଡ଼ୋଃ ପ୍ରାଭୁ ମୁଶାକେ କାଜିକିୟା, "ଆମ୍‌ ସିଦାରାଃ ଦିରି ପାଟା ଲେକା ନାୱା ଓଡ଼ୋଃ ବାରିୟା ଦିରି ପାଟା ବାଇୟେମେ, ଆମ୍‌ ରାପୁଦାକାଦ୍‌ ସିଦାରାଃ ବାରାନ୍‌ ଦିରି ପାଟାରେ ଅକ୍‌ନାଃ ଅଲାକାନ୍‌ ତାଇକେନା, ଏନା ଆଇଙ୍ଗ୍‌ ନେ ବାରାନ୍‌ ଦିରି ପାଟାରେ ଅଲେୟାଇଙ୍ଗ୍‌। 2 ସେତାଃ ଇଦାନ୍‌ରେ ସେକାଡ଼େନ୍‌ମେ ଓଡ଼ୋଃ ସିନାଇ ବୁରୁ ଚୁଟି ସେନ୍‌ କେଦ୍‌ତେ ଆଇଁୟାଃ ଆୟାର୍‌ରେ ତିଙ୍ଗୁନ୍‌ମେ। 3 ଆମ୍‌ ଏସ୍‌କାର୍‌ଗି ହିଜୁଃମେ ଓଡ଼ୋଃ ବୁରୁ ଚେତାନ୍‌ତେ ଜେତାଏ ଆଲକାକ ହିଜୁଃକା ଚାଏ ଗୋଟ୍‌ରେନ୍‌ ମିଣ୍ଡି, ମେରମ୍‌ ଓଡ଼ୋଃ ଉରିଃକ୍‌ ହଗି ଆଲକାକ ତାଇନ୍‌କା।" 4 ଏନ୍ତେ ମୁଶା ସିଦାରାଃ ଦିରି ପାଟା ଲେକା ବାରିୟା ବାଇକେଦାଏ ଓଡ଼ୋଃ ପ୍ରାଭୁଆଃ କାଜିଲେକା ଇଦାନ୍‌ରେ ବାରାନ୍‌ ଦିରି ପାଟା ସାବ୍‌କେଦ୍‌ତେ ସିନାଇ ବୁରୁତେ ରାକାବ୍‌ୟାନା।

5 ପ୍ରାଭୁ ରିମିଲ୍‌ଲଃ ଆଡ଼୍‌ଗୁୟାନାଏ ଓଡ଼ୋଃ ଇନିଃଲଃ ତିଙ୍ଗୁକେଦ୍‌ତେ ଆୟାଃ ନୁତୁମ୍‌କେ ହାକାଅକେଦା। 6 ପ୍ରାଭୁ ମୁଶାରାଃ ଆୟାର୍‌ରେ ସେନ୍‌ତାନ୍‌ଲଃ କାଜିକେଦାଏ, "ଆଇଙ୍ଗ୍‌ ପ୍ରାଭୁ ତାନିଙ୍ଗ୍‌, ପ୍ରାଭୁ ପାର୍‌ମେଶ୍ୱାର୍‌ ଲିବୁୟାନ୍‌ନିଃ ଓଡ଼ୋଃ ଦାୟାନିଃ, ସୁଆଏତେ ଖିସ୍‌ନିଃ, ଦୁଲାଡ଼୍‌ନିଃ ଓଡ଼ୋଃ ସାର୍‌ତିତେ ପେରେୟାକାନ୍‌ନିଃ ତାନିଙ୍ଗ୍‌। 7 ଆଇଙ୍ଗ୍‌ ହାଜାର୍‌ ହାଜାର୍‌ ପିଢ଼ି ଜାକେଦ୍‌ ଦାୟା ରିକାନିଃ, ଏତ୍‌କାନାଃକ ଛାମାନିଃ, ପାପ୍‌କ ଛାମା ଏମଃନିଃ ଓଡ଼ୋଃ ଗୁହ୍ନାଁ କା ରିକାନିଃକେ ସାଜାଇ କା ଏମ୍‌ନିଃ ତାନିଙ୍ଗ୍‌, ମେନ୍‌ଦ ଆଇଙ୍ଗ୍‌ ଗୁହ୍ନାଁ ରିକାନିଃକେ ସାର୍‌ତିଗି ସାଜାଇ ଏମାଃଇଙ୍ଗ୍‌, ଆପୁକଆଃ ପାପ୍‌ ନାଗେନ୍ତେ ଆପି ଉପୁନ୍‌ ପିଢ଼ି ଜାକେଦ୍‌ ଆକଆଃ ହନ୍‌ ଓଡ଼ୋଃ ଜାଇ ହନ୍‌କକେ ସାଜାଇ ଏମାଃଇଙ୍ଗ୍‌।"

8 ଏନ୍ତେ ମୁଶା ଅତେରେ ବହଃ ତିରୁବ୍‌ କେଦ୍‌ତେ ଜହାର୍‌କିୟା। 9 ଇନିଃ କାଜିକିୟାଏ, "ହେ ପ୍ରାଭୁ, ଆଇଙ୍ଗ୍‌ ଆମାଃ ନେପେଲ୍‌ରେ ଲିବୁଇ ନାମାକାଦ୍‌ ରେଦ, ବିନ୍ତିମେ ତାନାଇଙ୍ଗ୍‌, ପ୍ରାଭୁ ଆମ୍‌ ଆଲେଲଃ ସେନ୍‌ହରାଏମେ। ଚିଆଃଚି ନେ ହଡ଼କଦ କେଟେଃଦ୍‌ ମନ୍‌ରେନ୍‌ ଓଡ଼ୋଃ କାଜି କା ମାନାତିଙ୍ଗ୍‌ ହଡ଼କ ତାନ୍‌କ, ଏନ୍‌ରେୟ ଆମ୍‌ ଆଲେୟାଃ ପାପ୍‌ ଓଡ଼ୋଃ ଗୁହ୍ନାଁକ ଛାମାକେଦ୍‌ତେ ଆମାଃ ଆକ୍‌ତେୟାର୍‌ ହବାଅଃ ଲେକା ଆଲେକେ ବାଇଲେମ୍‌।"

10 ଏନ୍ତେ ପାର୍‌ମେଶ୍ୱାର୍‌ କାଜିକେଦା, "ଆଇଙ୍ଗ୍‌ ମିଆଦ୍‌ ରାଜିନାମା ବାଇୟା ଓଡ଼ୋଃ ଆପେ ସବେନ୍‌ ହଡ଼କଆଃ ଥାଲାରେ ନେ’ଲେକା ଆକ୍‌ଦାନ୍ଦାଅ କାମି ରିକାୟା ଅକ୍‌ନାଃ ଗଟା ଅତେ ଦିଶୁମ୍‌ରେ ଚାଏ ଜେତାନ୍‌ ଝୁଣ୍ଡ୍‌ରେ ଚିଉଲାହ କା ହବାକାନା, ପ୍ରାଭୁଆଃ ଏନ୍‌ କାମି ନେଲେୟା, ଅକନ୍‌ ହଡ଼କ ଆମାଃ ଥାଲାରେ ମେନାକଆ, ଚିଆଃଚି ଆମାଃ ଥାଲାରେ ଆଇଙ୍ଗ୍‌ ଅକ୍‌ନାଃ ରିକାୟା ଏନା ବରୱାନ୍‌ଗି ତାନା। 11 ତିସିଙ୍ଗ୍‌ ଆଇଙ୍ଗ୍‌ ଆମ୍‌କେ ଅକନ୍‌ ଆନ୍‌ଚୁ ଏମାମେୟା ଏନା ମାନାତିଙ୍ଗ୍‌ମେ, ଆଇଙ୍ଗ୍‌ ଇମୋରିୟ, କିନାନିୟ, ହିତ୍ତିୟ, ପିରିଷିୟ, ହିବ୍ବୀୟ ଓଡ଼ୋଃ ଯିବୁଷିୟ ହଡ଼କକେ ଆମାଃ ଆୟାର୍‌ ହେତେ ଅଡଙ୍ଗ୍‌କଆ। 12 ଚିର୍ଗାଲ୍‌ଗି ତାଇନ୍‌ମେ, ଆମ୍‌ ଅକନ୍‌ ଦିଶୁମ୍‌ତେ ସେନଃ ତାନାମେ ଏନ୍‌ ଦିଶୁମ୍‌ରେନ୍‌ ହଡ଼କଲଃ ଜେତାନ୍‌ ରାଜିନାମା ଆଲମ୍‌ ରିକାଏୟା, କା’ରେଦ ଏନା ଆମାଃ ନାଗେନ୍ତେ ଫାଁସ୍‌ରି ଲେକା ହବାଅଃଆ। 13 ମେନ୍‌ଦ ଆପେ ଇନ୍‌କୁଆଃ ବେଦିକେ ହାଦୁଡ଼େପେ ଓଡ଼ୋଃ ଇନ୍‌କୁଆଃ ଦିରିରାଃ ବାଇୟାକାନ୍‌ ତେୟାଃକେ ରାପୁଦେପେ ଓଡ଼ୋଃ ଇନ୍‌କୁଆଃ ଆଶେର୍‌ ମୁରୁତ୍‌କେ ମାଆଃତାଇପେ।

14 "ଜେତାଏ ଏଟାଃ ମାହାପୁରୁକେ ଆଲପେ ଜହାରିୟା, ଚିଆଃଚି ଆଇଙ୍ଗ୍‌ ଆଇଁୟାଃ ମାନାରାଙ୍ଗ୍‌ ବାଞ୍ଚାଅ ନାଙ୍ଗ୍‌ ହିସିଙ୍ଗା ପ୍ରାଭୁ ପାର୍‌ମେଶ୍ୱାର୍‌ ତାନିଙ୍ଗ୍‌। 15 ଚିର୍ଗାଲ୍‌କାନ୍‌ ତାଇନ୍‌ପେ, ଏନ୍‌ ଦିଶୁମ୍‌ରେନ୍‌ ହଡ଼କଲଃ ଜେତା ରାଜିନାମା ଆଲପେ ରିକାଏୟା, ଏନ୍‌ଲେକା ରିକାଲେରେ ଇନ୍‌କୁ ଆକଆଃ ମାହାପୁରୁକଆଃ ସେୱା ରିକାକେଦ୍‌ତେ ଆପାନ୍‌କେ ଆପାଙ୍ଗିର୍‌ କାମି ରିକାଏୟାକ, ଓଡ଼ୋଃ ଇନ୍‌କୁଆଃ ଉଦ୍ଦେଶ୍‌ରେ ଦାଣେଁ ରାକାବ୍‌କେଦ୍‌ତେ ଆପେକେ ନେଅଁତାଃପେୟାକ ଇମ୍‌ତା ଇନ୍‌କୁ ଦାଣେଁ ରାକାବାକାନ୍‌ ଜିନିଷ୍‌ ଜମ୍‌ ନାଙ୍ଗ୍‌ ବିଡ଼ାଅରେ ଉୟୁଃ ସାକଅଃଆକ। 16 ଆପେ ଇନ୍‌କୁଆଃ ହନ୍‌କୁଡ଼ିକକେ କିମିନ୍‌କଆପେ ଓଡ଼ୋଃ ଏନ୍‌ କୁଡ଼ିକ ଆକଆଃ ମାହାପୁରୁକକେ ସେୱାତାନ୍‌ଲଃ ଆପାଙ୍ଗିର୍‌ କାମିକ ରିକାଏ ରେଦ, ଆପେୟାଃ ହନ୍‌କଡ଼ାକକେ ହଗି ଆପାଙ୍ଗିର୍‌ କାମି ରିକା ଇଚିକଆକ।

17 "ଆମ୍‌ ଆମାଃ ନାଗେନ୍ତେ ଜେତାନ୍‌ ଛାଞ୍ଚ୍‌ତେ ମାହାପୁରୁ ଆଲମ୍‌ ବାଇୟା।

18 "ଆମ୍‌ ସାବାଃ ହଲଙ୍ଗ୍‌ରେୟାଃ ପାରାବ୍‌ ମାନାତିଙ୍ଗ୍‌ମେ ଓଡ଼ୋଃ ଆବିବ୍‌ ମାହିନାରାଃ ଅକନ୍‌ ଦିପିଲିରେ ଆମ୍‌କେ ରିକା ନାଗେନ୍ତେ ଆଚୁଲେକା ଏୟା ଦିନ୍‌ ଜାକେଦ୍‌ ସାବାଃ ହଲଙ୍ଗ୍‌ ଜମେମେ, ଚିଆଃଚି ଏନ୍‌ ଆବିବ୍‌ ମାହିନାରେ ଆମ୍‌ ମିସାର୍‌ ଦିଶୁମ୍‌ହେତେ ଅଡଙ୍ଗ୍‌ ଲେନା।

19 "ଆପେୟାଃ ମୁତ୍‌କୁଲ୍‌ କଡ଼ାହନ୍‌ ଓଡ଼ୋଃ ମିଣ୍ଡି ଗୋଟ୍‌ରେନ୍‌ ଚାଏ ଉରିକ୍‌ ଗୋଟ୍‌ରେନ୍‌ ଓଡ଼ୋଃ ଏଟାଃ ଆସୁଲ୍‌ ଜାଁତୁକଆଃ ମୁତ୍‌କୁଲ୍‌ ହନ୍‌ ଆଇଁୟାଃ ତାନିଃ। 20 ଆମ୍‌ ମିଣ୍ଡିହନ୍‌ ଏମ୍‌କେଦ୍‌ତେ ମୁତ୍‌କୁଲ୍‌ ଗାଧାହନ୍‌କେ ରାଡ଼ା ଇଦିମେ, ମେନ୍‌ଦ କାମ୍‌ ରାଡ଼ା ଇଦିରେ ଇନିୟାଃ ହଟଃକେ ହଣେଁୟାଦିମେ। ଆମାଃ ସବେନ୍‌ ମୁତ୍‌କୁଲ୍‌ ହନ୍‌କଆଃ ଗନଙ୍ଗ୍‌ ଏମ୍‌କେଦ୍‌ତେ ମୁକ୍‌ଲାଅକମେ।

"ଓଡ଼ୋଃ ଜେତାଏ ସାମା ତିଃଇ ଆଇଁୟାଃ ଆୟାର୍‌ତେ ଆଲକାକ ହିଜୁଃକା।

21 "ଆମ୍‌ ତୁରିୟା ହୁଲାଙ୍ଗ୍‌ ଜାକେଦ୍‌ ଆମାଃ ସୁନୁସାର୍‌ କାମି କାମିମେ ମେନ୍‌ଦ ଏୟା ହୁଲାଙ୍ଗ୍‌ରେ ରୁଡ଼ୁନ୍‌ମେ, ସିହୁଃ ଓଡ଼ୋଃ ଇରଃ ଦିପିଲିରେ ହଗି ରୁଡ଼ୁନ୍‌ମେ।

22 "ଆମ୍‌ ହାପ୍ତାରେୟାଃ ପାରାବ୍‌ ମାନାତିଙ୍ଗ୍‌ମେ, ଏନାଦ ଗହମ୍‌ ଇରଃ ସିଦା ଜ ଓଡ଼ୋଃ ବାରାଷ୍‌ରେୟାଃ ଟୁଣ୍ଡୁ ଦିପିଲିରେ ଜ’ହୁଣ୍ଡିରେୟାଃ ପାରାବ୍‌ ମାନାତିଙ୍ଗ୍‌ମେ।

23 "ବାରାଷ୍‌ରେ ଆପିସା ସବେନ୍‌ ହଡ଼କ ଇସ୍ରାଏଲ୍‌ରେନ୍‌ ପ୍ରାଭୁ ପାର୍‌ମେଶ୍ୱାର୍‌ ଆୟାର୍‌ରେ ହିଜୁଃକା। 24 ଆଇଙ୍ଗ୍‌ ଆମାଃ ଆୟାର୍‌ଏତେ ଏଟାଃ ଦିଶୁମ୍‌ରେନ୍‌ ହଡ଼କକେ ହାର୍‌ ଅଡଙ୍ଗ୍‌କେଦ୍‌ତେ ଆମାଃ ଦିଶୁମ୍‌କେଇଙ୍ଗ୍‌ ପାସ୍‌ରାଅୟା ଓଡ଼ୋଃ ଆମ୍‌ ବାରାଷ୍‌ରେ ଆପିସା ପ୍ରାଭୁ ପାର୍‌ମେଶ୍ୱାର୍‌ଆଃ ଆୟାର୍‌ରେ ହିଜୁଃରେଦ ଆମାଃ ଅତେକେ ଜେତାଏ କାକ ରେଃକ୍‌ ଇଦିୟା।

25 "ଆମ୍‌ ଆଇଁୟାଃ ଦାଣେଁରାଃ ମାୟୋମ୍‌ ରାନୁଆକାନ୍‌ ହଲଙ୍ଗ୍‌ଲଃ ଦାଣେଁ ଆଲମ୍‌ ରାକାବେ ଓଡ଼ୋଃ ପାସ୍‌କା ପାରାବ୍‌ ରେୟାଃ ରାକାବ୍‌ ତେୟାଃକକେ ସେତାଃ ଜାକେଦ୍‌ ଆଲମ୍‌ ଦହୟା।

26 "ପ୍ରାଭୁ ପାର୍‌ମେଶ୍ୱାର୍‌ରାଃ ଅଡ଼ାଃତେ ଆମାଃ ଅତେରାଃ ସିଦା ଜ ଆଉୱେମେ ଓଡ଼ୋଃ ମେରମ୍‌ହନ୍‌କେ ଆୟାଃ ଏଙ୍ଗାରାଃ ତୱାରେ ଆଲମ୍‌ ଇସିନେ।"

27 ଓଡ଼ୋଃ ପ୍ରାଭୁ ମୁଶାକେ କାଜିକିୟା, "ଆମ୍‌ ନେ ସବେନ୍‌ ବାଚାନ୍‌କ ଅଲେମେ, ଚିଆଃଚି ନେ ସବେନ୍‌ ବାଚାନ୍‌କ ଆମାଃଲଃ ଓଡ଼ୋଃ ଇସ୍ରାଏଲ୍‌ଲଃ ରାଜିନାମା ବାଇୟାକାଦା।" 28 ମୁଶା ପ୍ରାଭୁଲଃ ବାର୍‌ ହିସି ନିଦା ସିଙ୍ଗି ଏନ୍‌ ଠାୟାଦ୍‌ରେ ତାଇକେନା ଓଡ଼ୋଃ ଇନିଃ ଜମ୍‌ ନୁଁ କାଏ ରିକା। ଇନିଃ ଏନ୍‌ ବାରାନ୍‌ ଦିରି ପାଟାରେ ରାଜିନାମାରାଃ ବାଚାନ୍‌ ଚାଏ ଗେଲେୟା ଆନ୍‌ଚୁ ଅଲ୍‌କେଦାଏ।

29 ମୁଶା ଗାୱା ଲେକା ବାରାନ୍‌ ଦିରି ପାଟାରେ ଅଲାକାନ୍‌ ଆନ୍‌ଚୁକେ ସାବ୍‌କେଦ୍‌ତେ ସିନାଇ ବୁରୁହେତେ ଆଡ଼୍‌ଗୁଃ ତାଇକେନା, ଇମ୍‌ତା ପ୍ରାଭୁଲଃ ଜାଗାର୍‌ ତାଇକେନ୍‌ ହରାତେ ଆୟାଃ ମେଦ୍‌ମୁହାଡ଼୍‌ ହିଚିର୍‌ ଲେକା ନେଲଃ ତାଇକେନା, ଏନା ଆଇଃକ୍‌ କାଏ ସାରି ତାଇକେନା। 30 ଚିମ୍‌ତାଙ୍ଗ୍‌ ହାରୁନ୍‌ ଓଡ଼ୋଃ ଇସ୍ରାଏଲ୍‌ ହନ୍‌କ ମୁଶାକେ ନେଲ୍‌କିୟା, ଇମ୍‌ତାଙ୍ଗ୍‌ ଆୟାଃ ମେଦ୍‌ ମୁହାଡ଼୍‌ ମାସ୍‌କାଲ୍‌ ନେଲ୍‌ କେଦ୍‌ତେ ବର କେଦା। 31 ମେନ୍‌ଦ ମୁଶା ଇନ୍‌କୁକେ କେଡ଼ାକେଦ୍‌କ ହରାତେ ହାରୁନ୍‌ ଓଡ଼ୋଃ ସାମାଜ୍‌ରେନ୍‌ ଆଗୁଆଇକ ଆୟାଃତାଃ ସେନଃୟାନାକ ଏନ୍ତେ ମୁଶା ଇନ୍‌କୁଲଃ ଜାଗାର୍‌କେଦାଏ। 32 ଏନ୍ତେ ଇସ୍ରାଏଲ୍‌ ହନ୍‌କ ଆୟାଃ ନାଡ଼େଃ ହିଜୁଃ ତାନା ଓଡ଼ୋଃ ପ୍ରାଭୁ ମୁଶାକେ ସିନାଇ ବୁରୁରେ ଅକନ୍‌ ଆନ୍‌ଚୁ ଏମ୍‌ଲିୟାଏ, ଏନା ଇନ୍‌କୁକେ କାଜିକେଦ୍‌କଆ। 33 ଓଡ଼ୋଃ ମୁଶା ଇନ୍‌କୁଲଃ ଜାଗାର୍‌ ଚାବା କେଦ୍‌ତେ ଆୟାଃ ମେଦ୍‌ ମୁହାଁଡ଼୍‌କେ ଲିଜାଃତେ ହାରୁବ୍‌କେଦା। 34 ମେନ୍‌ଦ ମୁଶା ପ୍ରାଭୁଲଃ ଜାଗାର୍‌ ନାଙ୍ଗ୍‌ ଭିତାର୍‌ତେ ନେପେଲ୍‌ୟାନ୍‌ଲଃ ବାହାରିତେ ଆଉରି ହିଜୁଃ ଜାକେଦ୍‌ ଏନ୍‌ ଲିଜାଃକ ହଲେଃକ୍‌କେଦା ଓଡ଼ୋଃ ଅକନ୍‌ ଆନ୍‌ଚୁ ନାମ୍‌କେଦା ଏନା ଅଡଙ୍ଗ୍‌କେଦ୍‌ତେ ଇସ୍ରାଏଲ୍‌ ହନ୍‌କକେ କାଜିକେଦ୍‌କଆ। 35 ମୁଶାରାଃ ମେଦ୍‌ମୁହାଡ଼୍‌ ମାସ୍‌କାଲ୍‌ଗିୟାଃ ଏନା ଇସ୍ରାଏଲ୍‌ ହନ୍‌କ ଆୟାଃସାଃ ନେଲ୍‌କେଦା, ମୁଶା ଚିମ୍‌ତାଙ୍ଗ୍‌ ସାନ୍‌ତେ ପାର୍‌ମେଶ୍ୱାର୍‌ଲଃ ଜାଗାର୍‌ ନାଗେନ୍ତେ ଭିତାର୍‌ତେ ଆଉରି ସେନ୍‌ ଜାକେଦ୍‌ ମେଦ୍‌ମୁହାଁଡ଼୍‌କେ ଲିଜାଃତେ ହାରୁବ୍‌ କେଦାଏ।