ଯୋଷେଫ୍ରାଃ କୁମୁ
1 ଏନ୍ ଦିପିଲିରେ ଯାକୁବ୍ରାଃ ଆପୁତେ ଅକ କିନାନ୍ ଦିଶୁମ୍ରେ ତାଇନଃ ତାଇକେନା, ଏନ୍ ଠାୟାଦ୍ତେ ଯାକୁବ୍ ସେନଃୟାନ୍ଲଃ ତାଇନ୍ୟାନାଏ। 2 ନେଆଁ ହବାଅଃତାନା ଯାକୁବ୍ଆଃ ଅଡ଼ାଃରେନ୍କଆଃ କାଜି,
ଯୋଷେଫ୍କେ ସାତ୍ରାଃ ବାରାଷ୍ ହବାଅଃ ତାଇକେନ୍ ଇମ୍ତା, ଇନିଃ ଆୟାଃ ହାଗାକଲଃ ଗୋଟ୍ରେନ୍ ମିଣ୍ଡି ଓଡ଼ୋଃ ମେରମ୍ ଗୁପି ସେନାକାନ୍ ତାଇକେନାକ। ଏନ୍ ହାଗାକ ଆପୁତେୟାଃ ହିରୁମ୍ ବିଲ୍ହା ଓଡ଼ୋଃ ସିଲ୍ପାରାଃ ହନ୍କ ତାଇକେନା। ଯୋଷେଫ୍ ଆୟାଃ ହାଗାକଆଃ କା ଠାଉକାନ୍ କାଜିକାମିକ ଆପୁତେକେ ଉଦୁବ୍ ତାଇକେନା।
3 ଇସ୍ରାଏଲ୍, ଯୋଷେଫ୍କେ ଆୟାଃ ହାଗାକତାଃଏତେ ପୁରାଃଗି ଦୁଲାଡ଼ି ତାଇକେନା, ଚିୟାଃଚି ଇନିଃ ଆୟାଃ ହାଡ଼ାମ୍ ଦିପିଲିରେ ଜାନାମାକାନ୍ ତାଇକେନା ଓଡ଼ୋଃ ଇନିୟାଃ ନାଗେନ୍ତେ ରାକାମ୍ ରାକାମ୍ ରାଙ୍ଗ୍ରେୟାଃ କୁର୍ତା ବାଇକେଦ୍ତେ ଏମାକାଇ ତାଇକେନା। 4 ମେନ୍ଦ ଆପୁତେ ଯୋଷେଫ୍କେ ପୁରାଃଗି ଦୁଲାଡ଼୍କିଃ ହରାତେ ଆୟାଃ ହାଗାକ ଇନିଃକେ ହିସିଙ୍ଗାକିୟାକ ଓଡ଼ୋଃ ଇନିଃକେ ଦୁଲାଡ଼୍ରେୟାଃ କାଜି କାକ କାଜିକିୟା।
5 ଏନ୍ତେ ଯୋଷେଫ୍ ନୁବାଃରେ ମିଆଁଦ୍ କୁମୁ ନେଲ୍କେଦାଏ ଓଡ଼ୋଃ ଏନ୍ କୁମୁ ଆୟାଃ ହାଗାକକେ ଉଦୁବାଦ୍କଆ, ଏନାରେ ଇନ୍କୁ ଇନିୟାଃ ଚେତାନ୍ରେ ପୁରାଃଗି ଖିସ୍ୟାନାକ। 6 ଚିୟାଃଚି ଇନିଃ ଇନ୍କୁକେ କାଜିକେଦ୍କଆଏ, "ଦାୟାକେଦ୍ତେ, ଅକ କୁମୁ ନେଲାକାଦାଇଙ୍ଗ୍, ଏନା ଆୟୁମେପେ। 7 ନେଲେପେ, ଆବୁ ସବେନ୍କ ଲୟଙ୍ଗ୍ରେ ବିଡ଼ା ତଲ୍ ତାଇକେନାବୁ ଓଡ଼ୋଃ ଆଇଁୟାଃ ବିଡ଼ା ଥାଲାରେ ତିଙ୍ଗୁୟାନା ମେନ୍ଦ ଆପେୟାଃ ବିଡ଼ାକ ଚାରିଅସାଃରେ ଅମ୍ବାକେଦ୍ତେ ଆଇଁୟାଃ ବିଡ଼ାକେ ଜହାର୍କେଦା।"
8 ଏନ୍ତେ ଇନିୟାଃ ହାଗାକ ଇନିଃକେ କାଜିକିୟାକ, "ଚିୟାଃ ସାର୍ତିଗି ଆମ୍ ଆଲେୟାଃ ରାଜା ହବାଅଃଆମ୍, ଓଡ଼ୋଃ ଆଲେୟାଃ ଚେତାନ୍ରେ ରାଇଜ୍ ରିକାଏୟାମ୍ ?" ଏନାମେନ୍ତେ ଇନ୍କୁ ଇନିୟାଃ କୁମୁରେୟାଃ କାଜି ନାଗେନ୍ତେ ଇନିଃକେ ପୁରାଃଗି ଖିସ୍ୟାନାକ।
9 ଏନ୍ତେ ଯୋଷେଫ୍ ଆଡଃମିଆଦ୍ କୁମୁ ନେଲ୍କେଦ୍ତେ ହାଗାକକେ ଉଦୁବ୍କେଦ୍କଆ, "ନେଲେପେ, ଆଇଙ୍ଗ୍ ଆଡଃମିଆଦ୍ କୁମୁ ନେଲାକାଦାଇଙ୍ଗ୍, ସିଙ୍ଗି, ଚାଣ୍ଡୁଃ ଓଡ଼ୋଃ ଗେଲ୍ମିଆଁଦ୍ ଇପିଲ୍ ଆଇଙ୍ଗ୍କେ ଅମ୍ବାକେଦ୍ତେ ଜହାର୍କେଦିୟାଁକ।"
10 ମେନ୍ଦ ଇନିଃ ଆୟାଃ ଆପୁତେ ଓଡ଼ୋଃ ହାଗାକଆଃ ଆୟାର୍ରେ ନେ କାଜି କାଜିକେଦ୍ ଇମ୍ତା ଆପୁତେ ଧାମ୍କାଅ କେଦ୍ତେ କାଜିକିୟା, "ଆମ୍ ନେ’ଲେକା ଚିଲ୍କାନ୍ କୁମୁମ୍ ନେଲ୍କେଦା ? ଆଇଙ୍ଗ୍, ଆମାଃ ଉମା ଓଡ଼ୋଃ ହାଗାମ୍ତାମାଃକ, ଚିନାଃ ଆମ୍କେ ଇକ୍ଡ଼ୁମ୍କେଦ୍ତେ ଜହାର୍ ନାଗେନ୍ତେ ଆମାଃତାଃ ହିଜୁଃଆଲେ ?" 11 ଏନ୍ତେ ଇନିୟାଃ ହାଗାକ ଇନିଃକେ ହିସିଙ୍ଗାକିୟାକ, ମେନ୍ଦ ଆପୁତେ ଇନିୟାଃ କାଜିକେ ମନ୍ରେ ଉଡ଼ୁଃତାନ୍ଲଃ ଦହକେଦା।
ଯୋଷେଫ୍କେ ଆଖ୍ରିଙ୍ଗ୍ ଓଡ଼ୋଃ ମିସାର୍ତେ ଇଦିୟଃ
12 ମୁସିଙ୍ଗ୍ ଯୋଷେଫ୍ଆଃ ହାଗାକ ଆପୁତେୟାଃ ଗୋଟ୍ରେନ୍ ମିଣ୍ଡିକକେ ଗୁପି ନାଗେନ୍ତେ ଶିଖିମ୍ତେ ସେନଃୟାନାକ। 13 ଇସ୍ରାଏଲ୍ ଯୋଷେଫ୍କେ କାଜିକିୟା, "ଆମାଃ ହାଗାକ ମିଣ୍ଡି ଗୁପି ନାଙ୍ଗ୍ ଶିଖିମ୍ତେ ସେନାକାନାକ, ଜୁ ସେନଃମେ।"
ଯୋଷେଫ୍ କାଜିରୁହାଡ଼୍କିୟାଏ, "ଆଇଙ୍ଗ୍ ସେକାଡ଼୍କାନାଇଙ୍ଗ୍।"
14 ଏନ୍ତେ ଇନିୟାଃ ଆପୁତେ ଇନିଃକେ କାଜିକିୟା, "ଆମ୍ ସେନଃମେ ହାଗାମ୍କ ଓଡ଼ୋଃ ଗୋଟ୍ରେନ୍ ମିଣ୍ଡିକ ବୁଗିନ୍ ମେନାକଆ ଚି କାହା, ଏନା ନେଲ୍କେଦ୍ତେ ଆଇଁୟାଃତାଃ କାଜି ଆଉୱେମେ।" ନେଆଁ କାଜିକେଦ୍ତେ ଇନିଃ ହେବ୍ରୋଣ୍ ପିଡ଼ିଏତେ ଯୋଷେଫ୍କେ କୁଲ୍କିୟା।
ଓଡ଼ୋଃ ଯୋଷେଫ୍ ଶିଖିମ୍ତେ ସେଟେର୍ୟାନା। 15 ବିର୍ରେ ଇନିଃ ନେତେହେନ୍ତେ ହନର୍ବାଡ଼ାତାନ୍ ଇମ୍ତା ମିଆଁଦ୍ ହଡ଼ ଇନିଃକେ ନେଲ୍କେଦ୍ତେ କୁଲିକିୟା, "ଚିନାଃ ଦାଣାଁତାନାମ୍ ?"
16 ଇନିଃ କାଜିକିୟାଏ, "ଆଇଙ୍ଗ୍ ଆଇଁୟାଃ ହାଗାକକେ ଦାଣାଁତାନାଇଙ୍ଗ୍, ଇନ୍କୁ କତାଃରେ ମିଣ୍ଡିକକେ ଗୁପିତାନାକ, ଏନା କାଜିଦାଣିୟାମ୍ ଚି ?"
17 ଏନ୍ ହଡ଼ କାଜିକିୟାଏ, "ଇନ୍କୁ ନେତାଃଏତେ ସେନଃୟାନାକ, ଚିୟାଃଚି ଇନ୍କୁ ଦୋଥନ୍ତେ ସେନାଃଲେ ମେନ୍ତେ ଜାଗାର୍ତାନ୍ ଆୟୁମ୍କାଦ୍କ ତାଇକେନାଇଙ୍ଗ୍।" ଏନ୍ତେ ଯୋଷେଫ୍ ଆୟାଃ ହାଗାକକେ ଦୟା ଦୟା ଅତଙ୍ଗ୍କେଦ୍ତେ ଦୋଥନ୍ରେ ନେଲ୍ ନାମ୍କେଦ୍କଆଏ।
18 ଏନ୍ତେ ଇନ୍କୁ ଇନିଃକେ ସାଙ୍ଗିନ୍ଏତେ ନେଲ୍କିୟାକ, ଓଡ଼ୋଃ ଇନିଃ ଇନ୍କୁତାଃରେ ସେଟେର୍ ସିଦାରେ ଇନ୍କୁ ଇନିଃକେ ଗଗଏଃ ନାଗେନ୍ତେ ଉହାଟ୍କେଦାକ। 19 ଇନ୍କୁ ମିହୁଡ଼୍ ଆଡଃମିହୁଡ଼୍ଲଃ ଜାଗାର୍ୟାନାକ, "ନେଲିପେ, କୁମୁ ନେଲାକାଦ୍ ଗମ୍କେ ହିଜୁଃତାନାଏ। 20 ଦଲା ଇନିଃକେବୁ ଗଜିୟା ଓଡ଼ୋଃ ଦାଆଃ କା ତାହିନ୍ ମିଆଁଦ୍ ମାରାଙ୍ଗ୍ କୁଆଁରେ ଉୟୁଃତାଇୟାବୁ, ଓଡ଼ୋଃ ଜେତାନ୍ ବିର୍ରେନ୍ ଜାଁତୁ ଇନିଃକେ ଜମ୍କିୟା ମେନ୍ତେବୁ କାଜିୟା, ଏନ୍ତେ ଇନିୟାଃ କୁମୁ ଚିଲ୍କାତେ ପୁରାଅଃଆ ଏନା ନେଲେଆବୁ।"
21 ନେ କାଜି ଆୟୁମ୍କେଦ୍ତେ, ରୁବେନ୍ ଯୋଷେଫ୍କେ ଇନ୍କୁଆଃ ତିଃଇଏତେ ବାଞ୍ଚାଅ ନାଙ୍ଗ୍ କାଜିକେଦ୍କଆଏ, "କାଗି, ଇନିୟାଃ ଜୀଉ କାବୁ ଇଦିୟା।" 22 ଓଡ଼ୋଃ ରୁବେନ୍ ଇନ୍କୁଆଃ ତିଃଇଏତେ ଇନିଃକେ ବାଞ୍ଚାଅକେଦ୍ତେ ଆପୁତାଃ କୁଲ୍ରୁହାଡ଼୍ ନାଙ୍ଗ୍ ସାନାଙ୍ଗ୍କେଦ୍ତେ କାଜିକେଦ୍କଆ, "ଆପେ ଇନିଃକେ ଆଲପେ ଗଜିୟା। ନେ ବିର୍ରେୟାଃ କୁଆଁରେ ଉୟୁଃତାଇପେ, ମେନ୍ଦ ଇନିୟାଃ ଚେତାନ୍ରେ ତିଃଇ ଆଲପେ ଉଠାଏୟା।" 23 ଯୋଷେଫ୍ ହାଗାକତାଃ ସେଟେର୍ୟାନ୍ ଇମ୍ତା, ଇନ୍କୁ ଇନିଃ ତୁସିୟାଁକାନ୍ ରାକାମ୍ ରାକାମ୍ ରାଙ୍ଗ୍ରେନ୍ ଲିଜାଃକେ ଆୟାଃ ହଡ଼୍ମଏତେ ତାହିଦ୍ ଇଦିକେଦାକ 24 ଓଡ଼ୋଃ ଇନିଃକେ ସାବ୍କିଦ୍ତେ କୁଆଁରେ ଉୟୁଃକିୟାକ, ଏନ୍ କୁଆଁରେ ଦାଆଃ କା ତାଇକେନା।
25 ଏନ୍ତେ ଇନ୍କୁ ଜମ୍ ନାଙ୍ଗ୍ ଦୁବ୍ୟାନାକ ଇମ୍ତା ଚିମିନ୍ କିରିଙ୍ଗ୍ ଆଖ୍ରିଙ୍ଗ୍ତାନ୍ ଇଶ୍ମାଏଲ୍ କିଲିରେନ୍ ହଡ଼କକେ ନେଲ୍କେଦ୍କଆକ। ଇନ୍କୁ ଉଁଟ୍ ଚେତାନ୍ରେ ବୁଗିନ୍ ସହାନ୍ତେୟାଃ, ମାସ୍ଲା ଜିନିଷ୍ ଓଡ଼ୋଃ ଗାନ୍ଦ୍ରାସ୍ ଲାଦିକେଦ୍ଲଃ ଗିଲିୟଦ୍ଏତେ ମିସାର୍ ଦିଶୁମ୍ତେ ସେନଃ ତାଇକେନାକ। 26 ଯିହୁଦା ଆୟାଃ ହାଗାକକେ କାଜିକେଦ୍କଆ, "ଆବୁଆଃ ହାଗାକେ ଗଏଃକେଦ୍ତେ ଇନିୟାଃ ମାୟୋମ୍ ଉକୁଲେରେ ଚିନାଃ ନାମେୟାଁବୁ ? 27 ଦଲା, ଆବୁ ଇନିଃକେ ନେ ଇଶ୍ମାଏଲ୍ କିଲିରେନ୍ ହଡ଼କତାଃରେ ଆଖ୍ରିଙ୍ଗ୍ ତାଇୟାବୁ, ଇନିୟାଃ ବିରୁଧ୍ରେ ତିଃଇ କାବୁ ରିମିଏୟା, ଚିୟାଃଚି ଇନିଃ ଆବୁଆଃ ମିଆଁଦ୍ ମାୟୋମ୍ରେନ୍ ହାଗା ତାନିଃ।" ନେ କାଜିରେ ଯୋଷେଫ୍ଆଃ ହାଗାକ ମିଦ୍ମନ୍ୟାନାକ। 28 ମିଦିୟନ୍ରେନ୍ ଏନ୍ କିରିଙ୍ଗ୍ ଆଖ୍ରିଙ୍ଗ୍ତାନ୍ ହଡ଼କ ହେପାଦ୍ତେ ହିଜୁଃୟାନ୍ ଇମ୍ତା ଯୋଷେଫ୍ଆଃ ହାଗାକ ଇନିଃକେ କୁଆଁଏତେ ଅଡଙ୍ଗ୍କିଃଲଃ ମିଦ୍ହିସି ରୁପା ଟାକାତେ ଇଶ୍ମାଏଲ୍ କିଲିରେନ୍ ହଡ଼କତାଃରେ ଆଖ୍ରିଙ୍ଗ୍କିୟାକ। ଏନ୍ତେ ଏନ୍ ହଡ଼କ ଇନିଃକେ ମିସାର୍ ଦିଶୁମ୍ତେ ଇଦିକିୟାକ।
29 ରୁବେନ୍ କୁଆଁତାଃ ହିଜୁଃ ରୁହାଡ଼୍ୟାନ୍ଲଃ ଯୋଷେଫ୍କେ କୁଆଁରେ କା ନେଲ୍କେଦ୍ତେ ଇନିଃ ଦୁକୁୟାନ୍ଲଃ ଆୟାଃ ଲିଜାଃକେ ଚେଚାଃକେଦା। 30 ଇନିଃ ହାଗାକତାଃ ରୁହାଡ଼୍କେଦ୍ତେ କାଜିକେଦ୍କଆ, "ଏନ୍ ହନ୍ ଏନ୍ତାଃରେ ବାଙ୍ଗାଇୟା, ଆଇଙ୍ଗ୍ ନାହାଃଁ କତାଃ ସେନାଇଙ୍ଗ୍ ?"
31 ଏନ୍ତେ ଇନ୍କୁ ମିଆଁଦ୍ ମେରମ୍ ଗଏଃକେଦ୍ତେ ମେରମ୍ରାଃ ମାୟୋମ୍ରେ ଯୋଷେଫ୍ଆଃ ଲିଜାଃକେ ତୁପୁକେଦାକ। 32 ଇନ୍କୁ ଇନିୟାଃ ଏନ୍ ରାକାମ୍ ରାକାମ୍ ରାଙ୍ଗ୍ରେନ୍ ଲିଜାଃକେ ଇଦିକେଦ୍ତେ ଆପୁତେକେ କାଜିକିୟାକ, "ଆଲେ ନେଆଁ ନାମାକାଦାଲେ, ନେଆଁ ଆମାଃ ହନ୍ଆଃ ଲିଜାଃ ତାନାଃଚି ନାହାଁଲାଃ ଏନା ନେଲେମେ ?"
33 ଇନିଃ ଏନା ନେଲ୍ଉରୁମ୍କେଦ୍ତେ କାଜିକେଦା, "ହେଗି, ନେଆଁଦ ଆଇଁୟାଃ ହନ୍ରାଃ ଲିଜାଃ ତାନାଃ, ବିର୍ରେନ୍ ଜେତା ଜାଁତୁ ଇନିଃକେ ଜମ୍କିୟା, ସାର୍ତିଗି ଆଇଁୟାଃ ହନ୍ ଯୋଷେଫ୍କେ ଟୁକ୍ଡ଼ା ଟୁକ୍ଡ଼ା ରିକାକାଇୟା !"
34 ଯାକୁବ୍ ଆୟାଃ ଲିଜାଃ ଚେଚାଃକେଦାଏ ଓଡ଼ୋଃ ବାସ୍ତାରାଃ ଲିଜାଃ ତୁସିଙ୍ଗ୍କେଦ୍ତେ ଆୟାଃ ହନ୍ ନାଙ୍ଗ୍ ପୁରାଃ ମାହା ଜାକେଦ୍ ଏୟମ୍କେଦାଏ। 35 ଇନିୟାଃ ସବେନ୍ ହନ୍କଡ଼ା ଓଡ଼ୋଃ ହନ୍କୁଡ଼ିକ ଇନିଃକେ ହିଜୁଃକେଦ୍ତେ ଜୀଉରାଡ଼େଃରେୟାଃ କାଜିକ କାଜିକିୟା, ମେନ୍ଦ ଇନିଃ ଜୀଉରାଡ଼େଃ କାଏ ନାମ୍କେଦା। ଇନିଃ କାଜିକେଦାଏ, "ଆଇଙ୍ଗ୍ ଏୟମ୍ତାନ୍ଲଃ ହନ୍ତାଃ ତପାଗାଡ଼ାତେ ସେନାଃଇଙ୍ଗ୍।" ନେ’ଲେକା କାଜିକେଦ୍ତେ ଯୋଷେଫ୍ରାଃ ଆପୁତେ ହନ୍ତେକଡ଼ା ନାଙ୍ଗ୍ ରାଆଃ ତାଇକେନାଏ।
36 ନେ’ଲେକାତେ ଏନ୍ ମିଦିୟନ୍ରେନ୍ ହଡ଼କ ଯୋଷେଫ୍କେ ଇଦିକେଦ୍ତେ ମିସାର୍ ଦିଶୁମ୍ରେନ୍ ପୋଟିଫର୍ ନୁତୁମ୍ ଫାରୋ ରାଜାରାଃ ଅଡ଼ାଃ ହରତାନ୍ ହଡ଼କଆଃ ହାକିମ୍ତାଃରେ ଇନିଃକେ ଆଖ୍ରିଙ୍ଗ୍କିୟାକ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)