Atos 16

10 Luvala lula Pawulo hoavaga kuwona nduntsuchilo itso, tukasupanitsaje kivika chang’ani kubita Machedoniya kuno tutselye kuta Mulungu atuchemile tukalonje Ndongwa Nofu uko nako.

Lidiya ankwantsa kumutumba Chilisito

11 Tukawukaje ku Tulova tukakwinaje mu meli tukabitaje mbaka hono hakafu ho hapilimwe na malenga ho hanchemwa Samotilake, na hamilawu yiyage tukafikaje ku muji gwa Niyapoli. 12 Tukawukaje uko na kubita mbaka ku Fwilipi, ha muji mukomi gwa Machedoniya go gwavaga mu wuntsajila wa Valoma. Tukikalaje uko siku nunga. 13 Siku ya Kwesela tukahumaje kivala kwa muji, tukabitaje mulubali lwa bahali na twatyaga kuta ho hono ho vitang’anilaga Vayawudi kumusuka Mulungu. Tukikalisaje na kwantsa kulongana na vadala vatunga wovavaga vakong’ine kuko. 14 Hagati ha vadala iwo wo vatuhulikitsaga kwavaga na mudala yumwe yo aditaga kota fyo an’gana Mulungu, litawa lyake achemwaga Lidiya munyakaye va kuhuma ku Siyatila. Mudala uyo avaga mugutsi va myenda ja lanji ya tsambalawu ja galama ngomi na Mulungu avaga adisile atsitumbe ndongwa tsila tso alongaga Pawulo. 15 Mudala uyo hamwe na vanu va mukaye yake ho vavaga kubatitswa, akatugongolaje, "Manyi mundiche heni kuta ndamwe kumutumba Mutwa, mutse mwikale mu nyumba yangu." Na hetwe tukabitaje.

Pawulo na Sila vanvikwa mu nyumba ya vawopwa

16 Siku yimwe hotwavaga tum’bita hono hahalaga ha kusalila, mupogotsi yumwe muhintsa yo avaga na lisoka lya wulagutsi. Nayo avapelaga vatwa vake magobole molofu kwa kulagula. 17 Ihyo yula muhintsa akamufwataje Pawulo na hetwe kuno an’yova, "Iva vanu wo vatantsi va Mulungu va kilanga wo vangutuvikulila ndongwa tsa wukulusi."