Lucas 8

Muhintsa va Jayilosi antsilipulwa na mudala amponetswa

40 Yesu hoavaga kuwuya kuhuma ku mwambu kwa Vajelasi, vanu wolofu vakamulibulitsaje kwa wusangalo kwasawuli vavaga vangumutsindila. 41 Iho akatsaje munu yumwe litawa lyake Jayilosi, yo avaga chilongotsi va nyumba ya kitang’anila Vayawudi, akafugamaje ha magulu ga Yesu na kumugongoletsa abite kukaye kwake, 42 kwasawuli avaga na muhintsa va wiyeka yo avaga na myaka kumi na jivili, avaga antamika ndalahela na avaga habehi na kutajika. Yesu hoavaga am’bita, lilugu lya vanu lya mutifyaga mbali tseka. 43 Baho havaga na mudala yoakodekaga na kuhuma danda kwa chipindi cha myaka kumi na jivili. Yo asintsile finu fyake fyeka kwa vaganga, lechelelo siaponitswe. 44 Akaifyatanitsaje kuhumila kuchigosi kwa Yesu, akadometsaje mwenda gwa Yesu, luvala lulo danda yila yikadugaje. 45 Yesu akaputsaje, "Nani yo andomitse?" Vanu veka vakamukanilaje, lechelelo Petulo akalongaje, "Mutwa ihano hana vanu wolofu yo vangukutifya chila lubali." 46 Lechelelo Yesu akalongaje, "Hana munu andomitse, kwasawuli mbwene wuvetso wangu lunyumile." 47 Mudala yula avaga kutsela kuta siafuluche afihame, akahumilaje kuno ankakama, akagwaje kwa kipuna ha magulu ga Yesu. Akihalaje ha vanu kuta, kwasawuli yachi mbaka alamwe kumudometsa, na hila fyoaponile wutamwa wake. 48 Yesu akamulonjelaje, "Muhintsa vangu litumbilo lyako likuponitse. Ubite kwa wusichimafu." 49 Yesu hoavaga ang’acha kulonga, akatsaje mutantsi kuhuma kukaye ya Jayilosi yula chilongotsi va nyumba ya kwitang’anila Vayawudi, akamulonjelaje Jayilosi, "Uleche kumukoda Mudahitsi, muhintsa vako mwanga atajiche." 50 Lechelelo Yesu hoavaga kuhulika lulongwa ulo akamulonjelaje Jayilosi, "Witumbile hela, uleche kuwona muloto, muhitsa vako akuvamumi." 51 Yesu ho avaga kufika ha nyumba ya Jayilosi, akavalemetsaje vanu vanji kwinjila hamwe na mwene, lechelelo inje na Petulo, na Yakobo, na Yohana, hamwe na dade na yuve va muhintsa yula. 52 Muda ugo vanu veka vavembaga na kumulomboketsela muhintsa yula. Yesu akavalonjelaje, "Muleche kuvemba! Muhintsa yuno siafweye ndaya ila avasise." 53 Vanu vakamuhekaje Yesu kwasawuli vatselaga kuta yula muhintsa afweye. 54 Lechelelo Yesu akamwibataje liwoko, na akamulonjelaje fikami kuta, "Muhintsa vangu lamuche." 55 Wumi wake yula muhintsa wukamupiluchilaje, nayo akinukaje luvala lulo. Yesu akavalonjelaje valeli vake vamupele chinu cha kulya. 56 Valeli vake vakatinukaje ndalahela, lechelelo Yesu akavalemetsaje valahogola vamulonjele munu yoyuve ndongwa tsila tsiltsotsihumye.