Josué 14

ಜೊರ್ದಾನ್ ನ್ಹಯಿಚೊ ದಿಸ್ ಬುಡ್ತಲ್ಯಾ ದಿಕ್ಕಾಚೊ ಜಾಗೊ ವಾಟೆ ಹೊಲ್ಲೆ

1 ಮೊಟೊ ಯಾಜಕ್ ಎಲಿಯಾಜರ್, ನುನಾಚೊ ಲೆಕ್ ಜೊಶ್ವಾ ಅನಿ ಇಜ್ರಾಯೆಲಾಂಚಿ ಘರಾನಾಂಚಿ ಮುಖಂಡಾ, 2 ಸರ್ವೆಸ್ಪರಾನ್ ಮೊಯ್ಜೆಚ್ಯಾ ವೈನಾ ಹುಕುಮ್ ದಿಲ್ಲ್ಯಾ ಸಾರ್ಕೆ, ಜೊರ್ದಾನಾಚ್ಯಾ ದಿಸ್ ಬುಡ್ತಲ್ಯಾ ದಿಕ್ಕಾಚ್ಯಾ ಕಾನಾನ್ ದೆಸಾಕ್ ಚಿಟಿ ಘಾಲುನ್, ಇಜ್ರಾಯೆಲಾಂಚ್ಯಾ ಸಾಡೆ ನ್ಹವ್ ಕುಳಿಯಾಕ್ನಿ ವಾಟುನ್ ದಿಲ್ಯಾನಿ. 3 ಹುರಲ್ಲ್ಯಾ ದೊನ್ ಅನಿ ಅರ್ದ್ಯಾ ಕುಳಿಯಾಕ್ನಿ, ಮೊಯ್ಜೆನುಚ್ ಜೊರ್ದಾನಾಚ್ಯಾ ತಿಕ್ಡಿನ್ ವಾಟೊ ದಿಲ್ಲ್ಯಾನ್ ಖರೆ ಲೆವಿಯಾಕ್ನಿ ತೆಂಚ್ಯಾ ಮದ್ದಿ ಜಾಗೊ ದಿವ್ಕ್ ನಸಲ್ಲ್ಯಾನ್. 4 ಜುಜೆಚೆ ಮನಸ್ಸೆ ಅನಿ ಎಫ್ರಾಯಿಮ್ ಮನ್ತಲಿ ದೊನ್ ಘರಾನಾ ಹೊಲ್ಲಿ, ಲೆವಿಯಾಕ್ನಿ ಉಲ್ಲಿ ಶಾರಾ ಅನಿ ತೆಂಚ್ಯಾ ಗೊರಾಡೊರಾಕ್ನಿ ಚಾರೊ ತವ್ಡೆಚ್ ಸೊಡುನ್ ಅನಿ ಕಾಯ್ಬಿ ಗಾವ್ಕ್ ನಾ. 5 ಸರ್ವೆಸ್ಪರಾನ್ ಮೊಯ್ಜೆಕ್ ಹುಕುಮ್ ದಿಲ್ಲ್ಯಾ ಸಾರ್ಕೆಚ್ ಇಜ್ರಾಯೆಲಾನಿ ಜಾಗೊ ವಾಟುನ್ ಘೆಟ್ಲ್ಯಾನಿ.

ಕಾಲೆಬಾಕ್ ಹೆಬ್ರೊನ್ ದಿಲ್ಲೆ

6 ಜೊಶ್ವಾ ಗಿಲ್ಗಾಲಿತ್ ರ್‍ಹಾತಾನಾ ಜುದೆವಾಂಚ್ಯಾ ಘರಾನಾಚೆ ತೆಜ್ಯಾಕ್ಡೆ ಯೆಲೆ, ತೆಂಚ್ಯಾತ್ಲ್ಯಾ ಕೆನಿಜ್ಜಿಯಾ ಜೆಪುನ್ನೆಚೊ ಲೆಕ್ ಕಾಲೆಬಾನ್ ತೆಕಾ, ಸರ್ವೆಸ್ಪರಾನ್ ಕಾದೆಶ್ ಬರ್ನೆಯಾತ್ ಅಮ್ಚ್ಯಾ ದೊಗ್ಯಾಂಚ್ಯಾ ವಿಶಯಾತ್ ದೆವಾಚೊ ಮಾನುಸ್ ಮೊಯ್ಜೆಕ್ ಸಾಂಗಟಲ್ಲೆ ತುಕಾ ಗೊತ್ತುಚ್ ಹಾಯ್. 7 ಮಾಕಾ ಸರ್ವೆಸ್ಪರಾಚೊ ಸೆವಕ್ ಮೊಯ್ಜೆನ್ ಹ್ಯೊ ದೆಶ್ ಫಿರುನ್ ಬಗುಕ್ ಕಾದೆಶ್ ಬರ್ನೆಯಾಕ್ನಾ ಧಾಡಲ್ಲ್ಯಾ ತನ್ನಾ ಮಿಯಾ ಚಾಳಿಸ್ ವರ್ಸಾಚೊ ಹೊತ್ತೊ, ಅನಿ ಮಿಯಾ ತೆಕಾ ನಿಯತ್ತಿ ಜವಾಬ್ ಹಾನುನ್ ದಿಲೊ. 8 ಮಾಜ್ಯಾ ವಾಂಗ್ಡಾ ಯೆಲ್ಲ್ಯಾ ದುಸ್ರ್ಯಾ ಭಾವಾನಿ ಲೊಕಾಕ್ನಿ ಭಿಂವಸ್ಲ್ಯಾನಿ, ಮಿಯಾತರ್ ಮಾಜೊ ದೆವ್ ಸರ್ವೆಸ್ಪರಾಚ್ಯಾ ವರ್‍ತಿ ಫುರಾ ವಿಶ್ವಾಸ್ ಥವ್ನ್ ಖರೆಚ್ ಸಾಂಗ್ಲೊ. 9 ಮೊಯ್ಜೆನ್ ಮಾಕಾ ತ್ಯಾ ದಿಸಿ ತಿಯಾ ಫುರಾ ಮನಾನ್ ಮಾಜ್ಯಾ ದೆವಾಕ್ ಫುರಾ ಮನಾನ್ ವಿಶ್ವಾಸ್ ಕರಲ್ಲ್ಯಾ ಸಾಟ್ನಿ ತಿಯಾ ಫಿರಲ್ಲೆ ದೆಶ್ ತುಕಾ ಅನಿ ತುಜ್ಯಾ ಪಿಳ್ಗಿಕ್ ಶಾಶ್ವತಾಕ್ ಕರುನ್ ದಿತಾ ಮನುನ್ ಮಾಕಾ ಆನ್ ಘಾಲುನ್ ಸಾಂಗ್ಲಾ. 10 ಸರ್ವೆಸ್ಪರಾನ್ ಹಿ ಗೊಸ್ಟಿಯಾ ಮೊಯ್ಜೆಕ್ ಸಾಂಗಟಲ್ಲ್ಯಾಕ್ನಾ ಇಜ್ರಾಯೆಲ್ ಲೊಕಾ ಡಂಗ್ಳಿತ್ ಫಿರಿತ್ ಹೊತ್ತಿ ದಿಸಾ ಮಿಳ್ವುನ್ ಚಾಳಿಸಾರ್ ಪಾಂಚ್ ವರ್ಸಾ ದಾಟ್ಲಿ, ಸರ್ವೆಸ್ಪರಾನ್ ಅಪ್ನಿ ಸಾಂಗಟಲ್ಲ್ಯಾ ಸಾರ್ಕೆಚ್ ಹ್ಯಾ ಸಗ್ಳ್ಯಾ ಎಳಾರ್ ಮಾಕಾ ಝಿತ್ತೊ ಥವ್ಲಾ, ಅತ್ತಾ ಮಾಕಾ ಆಯ್ಸಿರ್ ಪಾಂಚ್ ವರಿಸ್ ಹೊಲಾ. 11 ಮೊಯ್ಜೆನ್ ಮಾಕಾ ಧಾಡಲ್ಲ್ಯಾ ತನ್ನಾ ಹೊತ್ತಿ ತವ್ಡಿಚ್ ಬಳ್ ಅತ್ತಾಬಿ ಹಾಯ್, ಲಡಾಯ್ ಕರುಕ್ ಅನಿ ಫಿರುನ್ ಖೆಳುಕ್ ಅದ್ದಿ ಹೊತ್ತ್ಯಾ ಸಾರ್ಕಿಚ್ ಬಳ್ ಹಾಯ್, ತಸೆ ರ್‍ಹಾತಾನಾ ಸರ್ವೆಸ್ಪರಾನ್ ತ್ಯಾ ದಿಸಿ ಮಾಕಾ ದಾಕ್ವಲ್ಲೊ ಹ್ಯೊ ಮಡ್ಡಿಚೊ ಜಾಗೊ ಮಾಕಾ ದಿ. 12 ಹಿತ್ತೆ ಮೊಟಿ ಮೊಟಿ ಲೊಕಾ ರ್‍ಹಾತ್ಯಾತ್ ಅನಿ ಹೆಜಿ ಶಾರಾ ಮೊಟಿ ಅನಿ ಕೊಟೆನಿ ಭರಲ್ಲಿ ಹಾತ್ ಮನುನ್ ತ್ಯಾ ಎಳಾರ್ ತಿಯಾ ಆಯ್ಕ್ ಲೈ ನ್ಹಯ್, ತೆಂಕಾ ಸಗ್ಳ್ಯಾಕ್ನಿ ಅಪ್ನಾಚ್ಯಾ ಗೊಸ್ಟಿಸಾರ್ಕೆ ಪಳ್ಸುಕ್ ಸರ್ವೆಸ್ಪರ್ ಮಾಕಾ ಮಜತ್ ಕರ್ತಾ ಮನ್ತಲಿ ಆಶ್ಯಾ ಕರುನ್ ಘೆವ್ನ್ ಹಾಂವ್ ಮಟ್ಲ್ಯಾನ್. 13 ತನ್ನಾ ಜೊಶ್ವಾನ್ ಜೆಪುನ್ನಾಚೊ ಲೆಕ್ ಕಾಲೆಬಾಕ್ ಆಶಿರ್ವಾದ್ ದಿವ್ನ್, ಹೆಬ್ರೊನ್ ಶಾರ್ ತೆಜ್ಯಾ ಸ್ವತಾಕ್ ದಿಲ್ಯಾನ್. 14 ಕೆನಿಜ್ಜಿಯಾಚ್ಯಾ ಜೆಪುನ್ನೆಚೊ ಲೆಕ್ ಕಾಲೆಬ್ ಇಜ್ರಾಯೆಲಾಂಚೊ ದೆವ್ ಸರ್ವೆಸ್ಪರಾ ವರ್‍ತಿ ಫುರಾ ವಿಶ್ವಾಸ್ ಥವಲ್ಲೊ ಹೊತ್ತ್ಯಾ ಸಾಟ್ನಿ, ತೆಕಾ ಹೆಬ್ರೊನ್ ಸ್ವಂತಾಚಿ ಆಸ್ತಿ ಹೊವ್ನ್ ಗಾವ್ಲೆ, ಆಜ್ ಪತರ್ಬಿ ತೆ ತೆಚೆಚ್ ಹೊವ್ನ್ ಹಾಯ್. 15 ತೆಚೆ ಪೈಲೆಚೆ ನಾವ್ ಕಿರ್ಯಾತ್ ಅರ್ಬ್, ಅರ್ಬ್ ಮನ್ತಲೊ ಮೊಟ್ಟ್ಯಾ ಮಾನ್ಸಾತ್ನಿಬಿ ಮೊಟೊ, ಝಗ್ಡೊ ಸರುನ್ ದೆಶ್ಯಾತ್ ಸಮಾಧಾನ್ ಹೊಲೆ.