1 Ɛlɛnnu si ne, Sɔfo Panyi Ananias ne mbanyi biemɔ ne lɔya bie bɔ bɛfrɛ ye Tertulo wale Kaesarea. Na bɛɛbɔle Paul kwaadu wɔ amrado ne nyunu. 2 Bɛfrɛle Tertulo ne, ɔbɔle Paul sommoɛ kyɛ:

"Onuoyamfoɛ Felix, wɔ yeɛ amaa yanya asomdwie paa ɔ, na ɔnate kyɛ ɛdwene kɔ siɛ nati, sɔ maen he atu mbɔn paa, 3 na daa biala yɛmaa yɛ nye sɔ bɔ ayɛ ne paa, na yɛka ye nwo dwirɛ ɔmva ye nwo ne nekaa biala bɔ yɛwɔ ne. 4 Nakoso yɛmbena kyɛ yɛsɛkye wɔ mmerɛ, yeti yɛsrɛ wɔ, nwu yɛ anwunvo na tie yɛ kaa. 5 Yanwu kyɛ sɔ akoaa he te ebie bɔ otutu maen bo, ná otutu gua Yudafoɛ ne so anu maa bɛte atua wɔ aseɛ he aso mukoraati, na ye yeɛ ɔla Nazerɛtfoɛ kue ne noa ɔ. 6 Afei, ɔyɛle ye adwene kyɛ ogua asɔre awuro nanwo fiɛ, yeti yeɛ yɛhyele ye ne. 7 — 8 Sɛ wɔ bɔbɔ ɛneɛnea ye dwirɛ nu a, ekonwu kyɛ sommoɛ bɔ yafa yabɔ ye namukoraati te nahorɛ."

9 Na Yudafoɛ nemɔ fa tole so kyɛ, bɔ ɔka ne te nahorɛ.

10 Amrado ne bɔle ye ti ngo hyirele Paul kyɛ odwudwo, yeti ɔhane kyɛ:

"Mese paa kyɛ, ɛyɛle maen he temmufoɛ ne, afoɛ pee ɛhe, yeti ɔyɛ me fɛ kyɛ meye me noa wɔ wɔ nyunu ɔ. 11 Ngɔle Yerusalem kyɛ mekwaaso ne, kɔyɛ kyɛ ngyẽa buru-ne-nyɔ ɛhe, wɔ bɔbɔ ɛkɔhora kobisa nu kɔnea. 12 Na bannwu me lle kyɛ mene ebie su aporowaa wɔ asɔre awuro berɛ, anaakyɛ me maa mmenia yɛ basa-basa wɔ sua bɔ beyia nu nanu, anaa kuro nanu. 13 Ná kwaadu bɔ babɔ me kesaalae ne, bɛlle ye nwo adanzeɛ biala. 14 Nakoso bɔ medɛ́ meto nu wɔ wɔ nyunu yeɛ ole kyɛ, kue bɔ bɛnwa mate ne, ɛhene yeɛ ole atee bɔ mefa so me so me nana mɔ Nyameɛ ɔ, ofikyɛ bɔ Mmeraa ne ka, ɔne bɔ bahworɔ ye wɔ Adiifoɛ nemɔ nwomaa nanu ne, medɛ́ ye namukoraati medi. 15 Na anidasoɛ bɔ nne ye wɔ Nyameɛ nu yeɛ ole kyɛ, mmerɛ bie kɔwa bɔ teneneefoɛ ne abɔnefoɛ mukoraati kɔdwɔso kofi ewue nu, na mmrienzua hemɔ koso le sɔ anidasoɛ nala bie. 16 Sɔ anidasoɛ he ati yeɛ mebɔ mmɔden kyɛ ngonya ahonim pa wɔ Nyameɛ ne sona nyunu ne. 17 Afoɛ pee si ne, mmale kyɛ mebaayɛ me maen adɔyɛ, ná mebɔ afɔleɛ. 18 Mmerɛ bɔ meyɛ sɔ nningyein nemɔ ne, bɛnwuni me wɔ asɔre awuro berɛ kyɛ mate me nwo kama, nakoso né ɛlɔen biala bokka me so, na né menyɛ basa-basa koso. Yudafoɛ biemɔ bɔ bɛfi Asia yeɛ ne bɛwɔ berɛ ɔ. 19 Sɔ mmenia nemɔ po yeɛ sɛ bɛle edwirɛ bie betia me a, odikyɛ ahaa bɛba wɔ nyunu bɛbabɔ me kwaadu ɔ. 20 Sɛ ɔtte sɔ a, ma mmenia hemɔ ha bɔne bɔ bɛnwuni ye wɔ me nwo, mmerɛ bɔ ne ngyi Sanhendrin ne nyunu ne, 21 sana edwirɛ komapɛ bɔ ndeane nu wɔ bɛ nyunu berɛ ngane ne, na yeɛ ole kyɛ: ‘Awufo tingyele nati yeɛ ɛnɛ bɛbu me atɛn ne.’"

22 Né Felix se Atee nanwo dwirɛ pee, yeti otuli bɛ dwirɛ ne hyɛle kyẽa, yeɛ ɔhane kyɛ: "Sɛ Lisia bɔ ɔte sahene ne ba a, yeɛ ngobua ɛmɔ dwirɛ ne ɔ." 23 Na ɔha hyirele sogyaniɛ panyi ne kyɛ ɔnea ye so, nakoso ɔma ye ahofadie kaa, na bɛma ye nnamvo atee maa bɛyɛ nningyein biemɔ bɛma ye.

24 Ngyẽa bie si ne, Felix ne ɔye Drusila wale, né ɔye ne te Yudaniɛ. Felix maa bɛfale Paul bɛwale, na ɔmaa ɔhane Kristo Yesu nu gyidie nwo dwirɛ hyirele ye. 25 Nakoso, mmerɛ bɔ Paul ka tenenee, ahosodi ne atemmuo bɔ ɔkɔwa nanwo dwirɛ ne, esuronyi hane Felix, na ɔha hyirele ye kyɛ: "Kesaalae de kɔ, sɛ menya atee a, ngɔmaa bɛkɔfrɛ wɔ bieku." 26 Sɔ mmerɛ namu, ne ye nye la so kyɛ Paul kɔma ye sikaa. Ɛhene ti, né ɔtaa maa bɛfrɛ ye maa ɔne ye bɔ ngɔmmɔ. 27 Nakoso afoɛ nyɔ si ne, Porkio Festo sili Felix gya nu; na ɔnate kyɛ ne Felix pena kyɛ onya anuonyam wɔ Yudafoɛ nemɔ nyunu nati, ɔyakyile Paul wɔ prizin berɛ.