ಖುದ್ದನಿ ಜವಾಬ್ದಾರಿ
1 ಯಹೊವಾ ವರಿಯಕ್ಕ ವಾಕ್ಯಾ ಮನೆ ದಿದ್ಯೊ 2 ಬಾಪೊ ಕ್ಹಾಟಾ ದ್ರಾಕ್ಷಯೊ ಕ್ಹಾದ್ಯಾ, ಬಚ್ಚಾವೊನಾ ದಾತೊ ಜು಼ಮ್ಮ ಧರಲ ಕವಾನು ವಡಪ ತುಮೆ ಇಸ್ರಾಯಲ ದೆಶನಾಹುತಿ ಕವಾನು ಕಾ?
3 ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮಾರಾ ಕ್ಹಮ್ಮಬಿ, ತುಮೆ ಎ ವಡಪನೆ ಇಸ್ರಾಯಲಮಾ ಹಜಿ ಉಚೌ ನೈ. 4 ಹಮ್ನಾ ಘನಾ ನರ ಜಾನವರೊ ಮಾರಾಜ ವ್ಹೈ; ಬಾಪೊ ಸುವೈ, ಬಚ್ಚಾ ಸುವೈ, ನರನಾ ಜಾನವರೊ ಕ್ಹಾರಾ ಮಾರಾ ಅದಿಮಾ ಛೆ; ಪಾಪ ಕರಾನು ಜಾನವರ ಮರಸ.
5 ಯಕ್ಲೊ ಸದ್ದರ್ಮಿ ಥೈನ ನಿತಿನಾ ಫೈಸಲಾವೊನೆ ಕರಿನ 6 ಡೊಂಗರೊನಾ ಉಪ್ಪರ ಎಡಿ ಕ್ಹಾಯೆವಾಚಿ ಇಸ್ರಾಯಲನಾ ವಂಶವಾಲಾನಾ ವಿಗ್ರಹಕನ ದೆಕೆವಾಚಿ ಬಾಜು಼ವಾಲಾನಿ ಬೈಕೊನೆ ಕೆಡಸೆವಾಚಿ 7 ಭಾರಿ ಥಯೆಲ ಬಾಕಡಿನಾ ಕ್ಹಾತೆ ಮಳೆವಾಚಿ ಕಿನೆಜ ತ್ರಾಸ ದಿದೆವಾಚಿ ಸಾಲಾಕರೆಲವಾಲೊ ವತ್ತಿನೆ ಬಿಗಿ ಧರೆವಾಚಿ ಕಿನು ಸೊತ್ತನೆ ಅಪಹರಸಿನ ಭುಕ್ಕ ಲಾಗಲವಾಲಾನೆ ಅನ್ನ ಘಾಲಿನ ಉಗಾಡೊ ರ‍್ಹಯಲವಾಲಾನೆ ಝಾಡಿ ವರಾಡಿನ 8 ಸಾಲಾನೆ ಬಡ್ಡಿ ಲಿದೆವಾಚಿ ಫೈದಾನೆ ದೊಕ್ಡಾ ದಿದೆವಾಚಿ ಅನ್ಯಾಯನೆ ಹತ್ತ ಘಾಲೆವಾಚಿ ವಾದಿ ಹರಯಕ್ಕ ವಾದಿನೆ ಚೊಕಿತರಾ ಫೈಸಲೊ ಕರೊ 9 ಮಾರಾ ನಿಯಮೊನೆ ಪಾಲ್ಸಿನ ಮಾರಾ ನಿಯಮೊನೆ ಪಾಲ್ಸಿನ ಚಾ಼ಲ್ಯಾರೆ ಹವೊ ಚೊ಼ಕು ಕಾಮ ಕರಾಲೊ ಥಾವಾನೆ ಜಿವ್ಸಸ ಎಜ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. 10 ಹವೊ ಪಡ್ದಲ ದಿಕ್ರಾನೆ ಹಮ್ನಾ ಕದಲ ಕೆಟ್ಟ ಕಾಮೊಮಾ ಸುತಬಿ ಕರೊ 11 ಚೊಕಾ ಕಾಮೊಮಾ ಸುತಬಿ ಕರೆವಾಚಿ ಡೊಂಗರೊಪರ ಎಡಿನೆ ಕ್ಹೈನ ಬಾಜು಼ ವಾಲಾನಿ ಬಾಕ್ಡಿನೆ ಕೆಡ್ಸಿನ 12 ದಿನ ದರಿದ್ರನೆ ತ್ರಾಸ ಕರಿನ ಮನಕ್ಹೊನಾ ಸೊತ್ತನೆ ಅಪಹರಸಿನ ಸಾಲಾ ದಿವಾಲಾನೆ ವತ್ತಿನೆ ಬಿಗಿ ಧರಿನ ವಿಗ್ರಹವೊಕನ ಡೊಳೊ ಉಚೈನ ಅಸಹ್ಯ ಕಾಮೊನೆ ಕರಿನ 13 ಸಾಲಾನೆ ಬಡ್ಡಿಲಿನ ಫೈದಾನೆ ದೊಕ್ಡಾದಿನ ಬಲಾತ್ಕಾರಿ ರಗತ ಚುವಾಲೊ ರ‍್ಹಯಾರೆ ಜಿವ್ಸಸ? ಆಂ ಕೆಟ್ಟ ಕಾಮೊ ಕರಲವಾಲೊ ಮರಸಜ; ತಿನಾ ಮೌತನೆ ತೆಜ ಕಾರಣ ವ್ಹೈ.
14 ಹಮ್ನಾ ತೆ ಪಡದಲ ದಿಕ್ರೊ ಬಾಪ ಕಲ ಪಾಪೊನೆ ಕ್ಹಾರಾ ದೆಕಿನ ಬುಚ್ಕಿನ ಹವಾ ಕಾಮೊ ಕರೆವಾಚಿ 15 ಡೊಂಗರೊಪರ ಎಡಿ ಕ್ಹಾಯೆವಾಚಿ ಇಸ್ರಾಯಲನಾ ವಂಶನಾ ವಿಗ್ರಹವೊನ ದೆಕೆವಾಚಿ ಬಾಜು಼ವಾಲಾನಿ ಬೈಕೊನೆ ಕೆಡ್ಸೆವಾಚಿ 16 ಕಿನೆಬಿ ತ್ರಾಸ ದಿದೆವಾಚಿ ವತ್ತಿನೆ ಪುಚ್ಚೆವಾಚಿ ಕಿನಾ ಸೊತ್ತನೆ ಅಪಹರಸಿನ ಭುಕ್ಕ ಲಾಗಲವಾಲಾನೆ ಅನ್ನ ದಿದೆವಾಚಿ ಉಗಾಡಾ ರ‍್ಹಯಲವಾಲಾನೆ ಝಾಡಿ ವರಾಡಿನ 17 ಗರಿಬನಾ ಉಪ್ಪರ ಹತ್ತ ಕರೆವಾಚಿ ಬಡ್ಡಿ ಪುಚ್ಚೆವಾಚಿ ಫೈದಾನೆ ದೊಕ್ಡಾ ದಿದೆವಾಚಿ ಮಾರಾ ವಿದಿಯೊನೆ ಕರಿನ ಮಾರಾ ನಿಯಮೊ ಪಾಲಶಾರೆ ಮಾರಾ ಬಾಪನಾ ಅಧರ್ಮನಾ ನಿಮಿತ್ತ ನೈ ಮರ್ತೊ, ಜಿವಸಸ. 18 ಇನೊ ಬಾ ಕ್ಹುದ್ದನಾ ಕ್ಹಾಂದಾನಾ ಘನೊ ಅರದಿನ ಛಿಲ್ಲಿನ ಕ್ಹುದ್ದನಾ ಕ್ಹಾಂದಾನಾ ವಚ್ಮಾ ಕೆಟ್ಟ ಕಾಮೊ ಕರಲಕ್ಹು ಕಾರಣ ಹಮ್ನಾ, ಇನಾ ಅಧರ್ಮಕ್ಹುಜ ಮರಸ. 19 ತೆನೈಸೊ ತುಮೆ ಬಾನಾ ದೊಷ ಫಲನೆ ದಿಕ್ರೊ ಕಿಮ್ಮ ಅನುಭವಿಸತೊ ನೈ ಕೈನ ಅಪೆಕ್ಷೆ ಕರೊಸಿತೊ? ದಿಕ್ರೊ ನಿತಿನಾ ಫೈಸಲಾನೆ ಕರಿನ ಮಾರಾ ವಿದಿಯೊನೆ ಚಾಲಿನ ಕರ್xಯಾರೆ ಜಿವ್ಸಸ. 20 ಪಾಪಕರಾಲೊಜ಼ ಮರಸ; ದಿಕ್ರೊ ಬಾಪನಾ ದೊಷನಾ ಫಲನೆ ಅನುಭವ ಕರಸ, ಬಾಪ ದಿಕ್ರಾನು ದೊಷನಾ ಫಲನೆ ಅನುಭವ ಕರಸ; ಶಿಷ್ಟ ಶಿಷ್ಟನು ಫಲ ಶಿಷ್ಟನುಜ಼, ದುಷ್ಟ ದುಷ್ಟನೊ ಫಲ ದುಷ್ಟನುಜ.
21 ತೆನೈಸೊ ದುಷ್ಟ ತೆ ಕರಾನಾ ಪಾಪೊ ಕ್ಹಾರಾ ಛೊಡಿನ ಮಾರಾ ವಿದಿಯೊನೆ ಚಾಲಿನ ನಿತಿನ್ಯಾಯನಾ ಕರ‍್ಯಾರೆ ನೈ ಮರತೊ, ಜಿವ್ಸಸ. 22 ತೆ ಕರಲ ಕಯು ಅಪರಾದ ವ್ಹೈ ತಿನಾ ಇಸಾಬನೆ ಸೆರಸ, ತೆ ಕರಾನಾ ಸದ್ದರ್ಮಕ್ಹು ತೆ ಜಿವ್ಸಸ. 23 ಕರ್ತಾ ಥಯಲ ಯಹೊವಾ ಅಮ್ಮ ಕವಸ ದುಷ್ಟನಾ ಮೌತತಮಾ ಮನೆ ಸುಜ಼ ಫೈದೊ ನೈ ರ‍್ಹೈತಬಿ ಕ್ಹುಶಿ ಛೆ? ತೆ ತಿನಾ ಕೆಟ್ಟ ವಾಟೊನೆ ಛೊಡಿನ ಜಿವ್ಸಾನು ಮನೆ ಕ್ಹುಶಿ ವ್ಹೈ. 24 ತೆನೈಸೊ ಶಿಷ್ಟ ತಿನಾ ಶಿಷ್ಟತನಾನೆ ಛೊಡಿನ ಅಧರ್ಮನೆ ಕರಿನ ದುಷ್ಟ ಕರಾನಾ ಕೆಟ್ಟ ಕಾಮೊ ಕರ‍್ಯಾರೆ ತೆ ಜಿವ್ಸಸ? ತೆ ಕರಲ ಕಯಾ ಚೊಕಾ ಕಾಮೊ ತಿನಾ ಇಸಾಬನೆ ನೈ ಸೆರ್ತಾ, ತೆ ಕರಾನಾ ಪಾಪೊಕ್ಹುಜ ತೆ ಮರಸ.
25 ತೆನೈಸೊ ತುಮೆ ಕರ್ತಾನು ಕ್ರಮ ಸಮಾ ನತ್ತಿಕೈನ ಕವಾಡಾಸ; ಇಸ್ರಾಯಲನಾ ವಂಶವಾಲಾ, ಮಾರಾ ಕ್ರಮನೆ ಸಮಾ ನತ್ತಿಸು? ತುಮಾರು ಕ್ರಮ ಸಮಾ ನತ್ತಿ ತೆಕ್ಲುಜ. 26 ಶಿಷ್ಟಾ ತಿನು ಶಿಷ್ಟತನ ಛೊಡಿನ ಅಧರ್ಮನೆ ಕರಿನ ತಿಮಾಜ ಮರ್ಯಾರೆ ತಿನಾಜ ಅಧರ್ಮಕ್ಹುಜ ಮರು ಲಾಗ್ಯು. 27 ದುಷ್ಟ ತೆ ಕರಲ ದುಷ್ಟ ಕಾಮೊನೆ ಛೊಡಿನ ನಿತಿ ನ್ಯಾಯನೆ ಕರ‍್ಯಾರೆ ತಿನೊ ಜಲಮ ವಚಾ಼ಡಿ ಲಿವಸ. 28 ತೆ ವಿಚಾರ ಕರಿನ ತೆ ಕರಾನು ಅಪರಾದೊನೆ ಛೊಡಲಕ್ಹು ನೈ ಮರ್ತೊ, ಜಿವ್ಸಸ. 29 ತೆನೈಸೊ ಇಸ್ರಾಯಲ ವಂಶವಾಲಾ ಕರ್ತಾ ಕ್ರಮನೆ ಸಮಾ ನತ್ತಿ ಕೈನ ಕವಾಡಾಸ; ಇಸ್ರಾಯಲ ವಂಶವಾಲಾ, ಮಾರು ಕ್ರಮ ಸಮಾ ನತ್ತಿಸು? ತುಮಾರು ಕ್ರಮ ಸಮಾ ವ್ಹೈ.
30 ಇಮ್ಮ ರ‍್ಹತಾಮಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಇಸ್ರಾಯಲ ವಂಶವಾಲಾ, ತುಮಾರಾ ತುಮಾರಾ ಚಾಲನಾ ತಕ್ಕ ತಿಮ್ಮಜ಼ ಮಿ ತುಮೊನೆ ತಿರ್ಪ ಕರುಸ; ಅಧರ್ಮ ತುಮೊನೆ ನಾಶ ಕರೆವಾಚಿ ಫರಿನ ತುಮಾರಾ ಅಪರಾದೊನೆ ಛೊಡಿಪಡೊ. 31 ತುಮೆ ಕರ್ತಾ ಆಯಲ ಅಪರಾದೊನೆ ತುಮಾರಾಮಾತು ಛೊಡೈನ ತುಮಾರಾ ಮನಸೊನೆ ಸ್ವಬಾವನೆ ಚೊಕಾ ಕರಲಿವೊ; ಇಸ್ರಾಯಲನಾ ವಂಶವಾಲಾ , ತುಮೆ ಕಾ ಮರ್ತಾ ನೈ? 32 ಮರಾಲಾನಾ ಮೌತಮಾ ಮನೆ ಕ್ಹುಶಿ ನತ್ತಿ; ಪಾಪೊಕ್ಹು ಫರಿನ ಜಿವ್ಸೊ; ಆಂ ಕರ್ತಾ ಯಹೊವಾನಿ ವಾತ ವ್ಹೈ.