1 ಶುರುವಾತಮಾ ಕ್ಹುದಾ ಹಬಾಳ ವರಿ ಜಿಮಿನ ತಯ್ಯಾರ ಕರ‍್ಯೊ. 2 ತೆಳಾಮಾ ಜಿಮಿನಪರ ಪದ್ದತ ಪ್ರಕಾರ ಸುಜ಼ ನ್ಹೊತು, ಕ್ಹಾರಿ ಬಗಲ ಅಂದಾರು ವ್ಹತ್ತು ಕ್ಹುದಾನಿ ಆತ್ಮಾ ಪಾನಿಪರ ಪ್ಹರಾಡಿತಿ. 3 ತೆಳಾಮಾ ಕ್ಹುದಾ, ಉಜಾಲು ಥಾವಾದೆ ಕೈನ ಕತಾಮಾ ಉಜಾಲು ಥಯು. 4 ಕ್ಹುದಾನಾ ಡೊಳೆ ತೆ ಉಜಾಲು ಚೊ಼ಕು ದಿಕ್ಹ್ಯು. ತೆಳಾಮಾ ತೆ ಉಜಾಲಾನೆ ವರಿ ಅಂದಾರನೆ ಜು಼ದು ಜು಼ದು ಕರ‍್ಯೊ. 5 ವರಿ ತೆ ಉಜಾಲಾನೆ ದಿನ್ನ ಕೈನ ಅಂದಾರಾನೆ ರಾತ" ಕೈನ ನಾಮ ಮ್ಹೆಲ್ಯೊ. ಇಮ್ಮ ಕ್ಹಾಂಜ಼ ಥೈನ ಪಾಟ ಥೈನ ಎಜ಼ ಪಸ್ಟ ದಿನ್ನ ಥಯು. 6 ಪಾಚಲ್ತೊ ಕ್ಹುದಾ ಪಾನಿನಾ ವಚ್ಮಾ ಮ್ಹೊಟು ಗುಮ್ಮಟ (ಡೊಂಗರ) ಥಾವಾದೆ ತೆ ಹೆಟು ರ‍್ಹಯಲ ವರಿ ಉಪ್ಪರ ರ‍್ಹಯಲ ಪಾನಿನೆ ಬಿಜು಼ ಬಿಜ಼ು ಕರಾದೆ ಕೈನ ಕದ್ಯೊ. 7 ಕ್ಹುದಾ ಮ್ಹೊಟು ಗುಮ್ಮಟ ಕರಿನ ತಿನಾ ಹೆಟು ರ‍್ಹಯಲ ಪಾನಿನೆ ವರಿ ಉಪ್ಪರ ರ‍್ಹಯಲ ಪಾನಿಕ್ಹು ಜು಼ದು-ಜು಼ದು ಕರ‍್ಯೊ. ತೆ ತಿಮ್ಮಜ಼ ಥಯು. 8 ಕ್ಹುದಾ ತೆ ಮ್ಹೊಟು ಗುಮ್ಮಟ ಹಬಾಳ ಕೈನ ನಾಮ ಮ್ಹೆಲ್ಯೊ. ಅಮ್ಮಜ಼ ಕ್ಹಾಂಜ಼ ಥೈನ ಪಾಟ ಥೈನ ಬೆವಾ ದಿನ್ನ ವ್ಹೈ. 9 ತೆಳಾಮಾ ಕ್ಹುದಾ, ಹಬಾಳನಾ ಹೆಟು ರ‍್ಹಯಲ ಪಾನಿನೆ ಯಕ್ಕ ಜ಼ಗಾ ಮಳಾದೆ ವರಿ ಕ್ಹುಕ್ಹಿ ಜ಼ಗಾ ದಿಕ್ಹಾದೆ ಕೈನ ಕದ್ಯೊ; ತೆ ತಿಮ್ಮಜ಼ ಥಯು. 10 ಕ್ಹುದಾ ಕ್ಹುಕ್ಹಿ ಜ಼ಗಾನೆ ಜಿ಼ಮಿನ" ಕೈನ ಯಕ್ಕ ಜ಼ಗಾ ಮಳಲ ಪಾನಿನೆ ಸಮುಂದರ ಕೈನ ನಾಮ ಮ್ಹೆಲ್ಯೊ. ತೆ ತಿನೆ ಚೊ಼ಕು ವ್ಹೈ ಕೈನಜ಼ ದೆಕ್ಯೊ. 11 ತೆ ಥಯಲ್ಪರ ಕ್ಹುದಾ, ಜಿ಼ಮಿನ ಚ಼ಾರೊ, ನ್ಹಾನಾ ಝಾಡೊ, ಬಿಯ್ಯಾ ಛೊಡಾನಾ ತರಕಾರಿನಾ ಝಾಡೊ ವರಿ ಬಿಯ್ಯಾ ರ‍್ಹಯಲ ಫಲ್ಲನಾ ಝಾಡೊ ತ್ಯುನಾ ತ್ಯುನಾ ಜ಼ಾತನಾ ಅನುಸಾರ ಬೆಳಸಾದೆ" ಕೈನ ಕದ್ಯೊ. ತೆ ತಿಮಜ಼ ಥೈಯು. 12 ಜಿಮಿನ ಪರ ಚ಼ಾರೊ ವರಿ ನ್ಹಾನಾ ಝಾಡೊ ಹುಟ್ಯಾ ಕ್ಹಾರಾ ತರಾನಾ ಬಿಯ್ಯಾ ರ‍್ಹಯಲ ತರಕಾರಿನಾ ಝಾಡೊ ಬೆಳದ್ಯಾ; ವರಿ ಕ್ಹಾರಾ ತರಾನಾ ಬಿಯ್ಯಾ ರ‍್ಹಯಲ ಫಲೊನಾ ಝಾಡೊ ದಿಕ್ಹ್ಯಾ. ಕ್ಹುದಾ ತೆ ಚೊ಼ಕು ವ್ಹೈ ಕೈನ ದೆಕ್ಯೊ. 13 ಅಮ್ಮಜ಼ ಕ್ಹಾಂಜ಼ ಥೈನ ಪಾಟ ಥೈ ತೆ ತನವಾ ದಿನ್ನ ಥಯು.

14 ತೆಳಾಮಾ ಕ್ಹುದಾ, ಹಬಾಳಮಾ ಉಜಾಲು ಥಾವಾದೆ ಕೈನ ಕದ್ಯೊ; ತೆ ದಿನ್ನ ರಾತನೆ ಜು಼ದು ಜು಼ದು ಕರಾದೆ; ತೆನೈಸೊ ತೆ ದಿನ್ನೊನೆ ವರಿ ವರಕ್ಹನೆ, ಕಾಲನೆ ವಳಕ ಥೈನ ದೆಕಾಡಾದೆ; 15 ವರಿ ಜಿಮಿನ ಪರ ಉಜಾಲು ದಿವಾನಾಹುತಿ ತೆ ಹಬಾಳಮಾ ದಿವ್ವಾ ನಿಂಗತ ದಿಕ್ಹಾದೆ ಕೈನ ಕದ್ಯೊ, ತೆ ತಿಮ್ಮಜ಼ ಥೈಯು. 16 ಇಮ್ಮ ಕ್ಹುದಾ ಸುರ್ಯೊ ವರಿ ಚಂದಪ್ಪಾನೆ ಸೃಷ್ಟಿ ಕರ‍್ಯೊ. ಸುರ್ಯಾನೆ ದಿನ್ನ ಆಳಾನಾಹುತಿ ವರಿ ಚಂದಪ್ಪಾನೆ ರಾತ ಆಳಾನಾಹುತಿ ವರಿ ಚಿಕ್ಕಿಯೊನೆಬಿ ಸೃಷ್ಟಿ ಕರ‍್ಯೊ. 17 ತೆ ಜಿಮಿನಪರ ಉಜಾಲು ದಿವಾನಾಹುತಿ ಹಬಾಳಮಾ ಮ್ಹೆಲಿನ, 18 ದಿನ್ನ ರಾತ ಆಳಾನಾ ಹುತಿ ಉಜಾಲಾನೆ ವರಿ ಅಂದಾರಾನೆ ಜು಼ದು ಜು಼ದು ಕರಾನಾ ಹುತಿ ತಿನೆ ಕರ‍್ಯೊ. ತೆ ತಿನೆ ಚೊ಼ಕುಜ಼ ವ್ಹೈ ಕೈನ ದೆಕ್ಯೊ.

19 ಅಮ್ಮ ಕ್ಹಾಂಜ಼ ಥೈನ ಪಾಟ ಥೈನ‍ ಚಾರವಾ ದಿನ್ನ ಥಯೊ. 20 ತೆಳಾಮಾ ಕ್ಹುದಾ ಕ್ಹಾರಾ ತರಾನಾ ಜಿವಜಂತೊ ಪಾನಿಮಾ ಭರಾದೆ; ಪಕ್ಷಿಯೊ ಹಬಾಳಮಾ ಭರಾದೆ ಕೈನ ಕದ್ಯೊ. 21 ಅಮ್ಮ ಕ್ಹುದಾ ಖಾಸ ಪ್ರಾಣಿಯೊನೆ ಪಾನಿಮಾ ಭರೆಲ ತರಾ ತರಾನಾ ಜಿವಿಯೊ ರಕ್ಯಾ ರ‍್ಹಯಲ ತರಾ ತರಾನಾ ಪಕ್ಷಿಯೊ, ತ್ಯುನಾ ಜಾತನಾ ಅನುಸಾರ ಸೃಷ್ಟಿ ಕರ‍್ಯೊ. ತೆ ತಿನೆ ಚೊಕುಜ಼ ವ್ಹೈ ಕೈನ ದೆಕ್ಯೊ. 22 ತೆನೈಸೊ ಕ್ಹುದಾ, ತ್ಯುನೊನೆ ತುಮೆ ಘನ್ನಾ ಥೈನ ಜಾಸ್ತ ಥಾವೊ. ಪಾನಿಮಾನಾ ಪ್ರಾಣಿಯೊನಿ ಸಂತತಿ ಜಾಸ್ತ ಥೈನ ಸಮುಂದರ ಭರಾದೆ; ಪಕ್ಷಿಯೊನೆ ತುಮಾರಿ ಸಂಕ್ಯಾ ಜಾಸ್ತ ಥಾವಾದೆ ಕೈನ ಆಶಿರ್ವಾದ ಕರ‍್ಯೊ. 23 ಅಮ್ಮ ಕ್ಹಾಂಜ಼ ಥೈನ ಪಾಟ ಥೈ ಎಜ಼ ಪಾಂಚ಼ವಾ ದಿನ ಥಯು.

24 ವರಿ ಕ್ಹುದಾ, ಜಿಮಿನಮಾತಾ ಕ್ಹಾರಿ ತರಾನಾ ಜಿವ ಜಂತು ಹುಟ್ಟಾದೆ; ನ್ಹಾನಾ ಮ್ಹೊಟಾ ರಾಕಾನಾ ಜಾನವರೊ, ಜಂಗ್ಲಿ ಜಾನವರೊ ಹುಟ್ಟಾದೆ ಕದ್ಯೊ". ತೆ ತಿಮ್ಮಜ಼ ಥಯು. 25 ಕ್ಹುದಾ ಎ ಕ್ಹಾರಿ ತರಾನಾ ಜಾನವರೊನೆ ಸೃಷ್ಟಿ ಕರ‍್ಯೊ. ತೆ ತಿನೆ ಚೊಕುಜ಼ ವ್ಹೈ ಕೈನ ದೆಕ್ಯೊ. 26 ತೆಳಾಮಾ ಕ್ಹುದಾ, ಅಪ್ನಾ ಸ್ವರುಪಮಾ ತ್ಯುನಾ ಹೊಲಿಕೆ ಥಯಲ ಮನಕ್ಹೊನೆ ಕರಿಯೆ ಕೈಲಿನ. ತ್ಯುನೆ ಸಮುಂದರಮ್ಮಾ ರ‍್ಹಯಲ ಮಚ಼ಲಿಯೊಪರ ಹಬಾಳಮ್ಮಾ ಉಡಾನಾ ಪಕ್ಷಿಯೊಪರ ಜಾನವರೊಪರ ಜಿಮಿನಪರ ಚ಼ಾಲಾನಾ ಜಿವಜ಼ಂತುಪರ ಕ್ಹಾರಾ ಜಿಮಿನಪರ ಅದಿಕಾರ ಕರಾದೆ".

27 ಅಮ್ಮ ಕ್ಹುದಾ ಮನಕ್ಹನೆ ತಿನಾ ಸ್ವರುಪಮಾ ಸೃಷ್ಟಿ ಕರ‍್ಯೊ; ವರಿ ತಿನಾ ಸ್ವರುಪಮಾ ತ್ಯುನೊನೆ ದಾಣಗೊ ಬಾಕಡಿ ಕೈನ ಸೃಷ್ಟಿ ಕರ‍್ಯೊ.

28 ತೆನೈಸೊ ಕ್ಹುದಾ ತ್ಯುನೊನೆ ಆರ್ಶಿವಾದ ದಿನ, ತಮೆ ಘನ್ನಾ ಸಂತಾನ ಥೈನ ಬೆಳದೊ; ಜಿಮಿನಪರ ಭರಿನ ತಿನೆ ಅದಿಕಾರಮಾ ಲಿವೊ; ಸಮುಂದರನಾ ಮಚ಼ಲಿಯೊಪರ ಹಬಾಳನಾ ಪಕ್ಷಿಯೊಪರ ಜಿಮಿನಪರ ಚ಼ಾಲಾನಾ ಕ್ಹಾರಾ ಜಾನವರೊಪರ ಅದಿಕಾರ ಕರಾದೆ ಕದ್ಯೊ. 29 ವರಿ ಕ್ಹುದಾ, ಹಮ್ನಾ ಕ್ಹಾರಾ ತರಾನಾ ತರಕಾರಿನಾ ಝಾಡೊ ಫಲ ದಿವಾನಾ ಬಿಯ್ಯಾನಾ ಝಾಡೊ ತುಮೊನೆ ಕ್ಹಾವಾನಾ ಹುತಿ ದಿದ್ಯೊಸ. 30 ತೆನೈಸೊ ಜಿಮಿನಪರ ಚ಼ಾಲಾನಾ ಜಾನವರೊ ಹಬಾಳಮ್ಮಾ ಉಡಾನಾ ಪಕ್ಷಿಯೊ ಜಿಮಿನಪರ ಚ಼ಾಲಾನಾ ಜಿವಜಂತು ಕವಾನಾ ಜಾನವರೊನೆ ಕ್ಹಾರಾ ಚ಼ಾರೊ ಭಾಜಿ ಪಾಲೊ ಖಾವಾನಾಹುತಿ ದಿದ್ಯೊಸ" ಕೈನ ಕದ್ಯೊ. ತೆ ತಿಮ್ಮಜ಼ ಥೈಯು. 31 ಕ್ಹುದಾ ತೆ ಸೃಷ್ಟಿ ಕರಲ ಕ್ಹಾರು ದೆಕಲಕ್ಹು ತೆ ಘನ್ನು ಚ಼ೊಕು ದಿಕ್ಹ್ಯು. ಕ್ಹಾಂಜ಼ ಥೈನ ಪಾಟ ಥೈ ಛೆವಾ ದಿನ ಥಯೊ.