João 21

Jesu wabonekela ku bashichiiya bali chiloba

1 Nikwakamana Jesu wakabonekela alimwi ku bashichiiya bakwe, ku lweenge lwa Tibeliyasi. Ono mboobu mbuchakachitika. 2 Simoni Petulo a Tomasi wiitwa mpuundu a Nasaneli waku Kana mu Galilii a bana a Zebedi a bamwi bashichiiya bobilo bakalinga antomwi. 3 Saimoni Petulo wakaambila bamwi ati, "Ime ndajokela mukuzela nswi,"

alimwi bakaamba ati, "Tulaunka andiwe," abobo bakazwa ansengwe akunjila mu bwaato, pesi mashiku taaku nibakajata chili choonse. 4 Kuseeniseni, Jesu wakashika waima kumbali a maaanzhi, pesi bashichiiya taaku nibakazhiba kwaamba ngu Jesu. 5 Jesu wakabaita, nubeenzuma, "Saa taaku nchimwajata?"

Abalo bakaamba ati, "Taaku."

6 Wakabaambila ati, "Amuwaale ntangala kululyo a bwaato bwanu mulajata zhimwi." Nibakachita boo, taaku nibakalinga kuchikonzha kukwela, nkambo kakuvula kwa nswi.

7 Kumana eenka shichiiya uyo ngwakalinga kuyanda Jesu wakaambila Petulo ati, "Ngu Mwami!" Saimoni Petulo nakanva kwaamba ati, ngu Mwami, wakalivumba chisani chakwe nkambo wakalinga kufuulile wakaliwaalila mu maanzhi. 8 Bamwi bashichiiya bakachilila mu bwaato, kabaya kukwela ntangala yabo kaizwile nswi. Bakalinga afaafi, bulaanfu bwantaamu zhilimwanda omwi. 9 Nibakazwa mu maanzhi akuzubukila atala, bakabona mulilo wamakalangasha, answi kazhiyokwa awo, alimwi kwakalinga a chinkwa ambali. 10 Jesu wakabambila ati, "Amulete zhimwi nswi nzhimwazwa kujata."

11 Abobo Saimoni Petulo wakanjila mu bwaato, wakwela ntangala yomwi yalikuzwile nswi zhinene, pesi zhakalinga mwaanda amakkumi osanwe azhotatwe, pesi ntangala taaku niyakakwamuka.