João 6

Jesu wakasanina zhuulu zhosanwe

1 Jesu wakazubuka kutala a lweenge lwa Galilii luli ngu Taibeliyasi. 2 Alimwi mabunga mabunga a bantu akamuchilila nkambo bakabona zhitondezho nzhaakachita kwiinda mukuponya balwazhi. 3 Amane Jesu wakaunka amulundu akukkala abashichiiya bakwe. 4 Pobwe ya Pasika yaba Juuda yakalinga afaafi. 5 Jesu nakalanga wakabona imbunga ya bantu kabaza kulinguwe. Wakabuzha Filipo ati, "Ino nkuli nkushituule chinkwa chakusanina bantu boonse aba?" 6 Wakabuzha kuyanda kumusola, nkambo wakalikuzhi kale chakuchita.

7 Filipo wakamunviila ati, "Kwaamba omwi ajane kuluma kampanzhi kashoonto chilabweza maali avolwa mu myeenzhi ili chiloba."

8 Ono umwi waba shichiiya wakwe, Andulu mukwabo Saimoni Petulo, wakaamba ati, 9 "Ngoyu mwaana musankwa uchite zhinkwa zhili zhosanwe zha maila atuswi tobilo. Pesi ino inga zhaba buti zhiinji kwabana bantu baanji boonse aaba."

10 Jesu wakaamba ati, "Amubaambile bantu boonse bakkale anshi." Abusena awo akalinga bwiizu buunji. Amane bakakkala anshi, (bamasankwa bakakkala bakalinga kushika zhuulu zhosanwe). 11 Jesu wakabweza zhinkwa, wakapa kulumba kuli Leza, amane wakazhaaba kubantu bakalikushite. Wakachita bweenka a ku tuswi. 12 Ono boonse nibakakuta, wakakaambila bashichiiya bakwe ati, "Amubike antomwi zhoonse zhachaala. Kutabi nachiba chomwi chisowegwa." 13 Bakazhibika antomwi zhakashaala zhoonse akuzuzha mitaanga ili makkumi obilo atobilo ngubakashiya bakalinga kulya.

14 Ono bantu nibakabona chitondezho Jesu nchakachita, bakatalika kwaamba ati, "Kashimpe ngunguwe mushinshimi utokuza munyika!"