XÓ NI̱GI̱ꞋDU̱U̱N-MUU 17

Awan rí ni̱gi̱ꞌdoo Ana̱ꞌlóꞌ ga̱jma̱á Abrám

1 Abrám gíꞌdoo akho̱ skíñú gu̱wa̱ꞌ-nítsu i̱kho̱ (99) tsiguu̱, ído̱ nikujmaa Ana̱ꞌlóꞌ Mikhuíí inuu̱ jamí waꞌtháa̱n:

—Ikhúúnꞌ ñaju̱nꞌ Ana̱a̱ꞌ Mikhuíí tsí Gíꞌdoo Xúgíí Tsiakhe̱. Ga̱ꞌne mbá jmbu a̱kia̱a̱nꞌ rí ma̱ra̱xtaa ná inu̱ꞌ. 2 Ikhúúnꞌ ma̱gúꞌdo̱ꞌ mbá awan ga̱jma̱á nindxa̱a̱ꞌ, jamí ma̱ne̱ rí ma̱mi̱diúún guéño xa̱bia̱a̱ꞌ.

3 A̱ꞌkhue̱n rí Abrám nismáti̱go̱o̱ niꞌgí inuu asndo mbayíí, jamí Ana̱ꞌlóꞌ niꞌthán xóó:

4 —Ríge̱ꞌ ñajuun awan rí nagúꞌdo̱ꞌ ga̱jma̱á nindxa̱a̱ꞌ, rí ikháán ma̱nindxa̱a̱ꞌ anu̱ú xa̱bo̱ tsí mbaꞌa inúú. 5 Jamí ná-xáꞌne mbiꞌyaaꞌ Abrám rá, rí xúge̱ꞌ ma̱ꞌne mbiꞌyaaꞌ Abraám, numuu rí ikhúúnꞌ ni̱ꞌgíín rí ma̱nindxa̱a̱ꞌ anu̱ú xa̱bo̱ tsí mbaꞌa inúú. 6 Ma̱ne̱ rí ma̱mi̱diúún guéño xa̱bia̱a̱ꞌ, jamí ná majia̱a̱nꞌ máꞌ ikháán ma̱gu̱ma xuajen mba̱ꞌo̱ xúꞌkhue̱n máꞌ ma̱ga̱jnúú thúngaa mba̱ꞌu̱u̱n. 7 Jamí na̱ꞌgílo̱ꞌ awan ga̱jma̱á nindxa̱a̱ꞌ ikháán, xúꞌkhue̱n máꞌ xa̱bia̱a̱ꞌ tsí ma̱guwá inaaꞌ, mangaa máꞌ xa̱bíi̱n ikhii̱n, rí jámuu ñajuun awan ríge̱ꞌ. Ikhúúnꞌ ma̱nindxu̱ꞌ Ana̱a̱ꞌ Mikhuíí, jamí xúꞌkhue̱n máꞌ Anu̱ú mangiin xa̱bia̱a̱ꞌ tsí ma̱gu̱mii nda̱wa̱á. 8 Jamí ma̱xna̱a̱ꞌ ikháán, xúꞌkhue̱n máꞌ mangiin xa̱bia̱a̱ꞌ tsí ma̱guwá inaaꞌ, mbaa ná ngraꞌaaꞌ, mbá xúgíí mbayuu Kanaán, rí jámuu magóó ra̱ya̱xíi̱ ne̱, jamí ikhúúnꞌ ma̱nindxu̱ꞌ Anúu̱.

9 A̱ꞌkhue̱n rí Ana̱ꞌlóꞌ niꞌthúun mbu̱júu Abraám:

—Xómáꞌ ikháán rá, ma̱tha̱ne̱-mbáníí awan drígo̱ꞌ, xúꞌkhue̱n máꞌ mone̱-mbáníí xa̱bia̱a̱ꞌ tsí ma̱guwá inaaꞌ, mangiin máꞌ xa̱bo̱ ri̱jiúu̱n. 10 Jamí ríge̱ꞌ ñajuun awan drígo̱ꞌ rí ma̱tha̱ne̱-mbáníí ikháán, xúꞌkhue̱n máꞌ mone̱-mbáníí xa̱bia̱a̱ꞌ nda̱wa̱á: Mbá xúgíin xa̱bekha rí ikháa̱nꞌlaꞌ gíꞌmaa mu̱guaꞌdáálaꞌ tsina-jndi. 11 Tsina-jndi ñajuun rí mo̱thon-rígú xtóo idxu̱u̱ xuyalaꞌ, jamí ikhaa ríge̱ꞌ ñajuun rí masngájma awan rí nawanálóꞌ. 12 Mbámbáa xa̱biya̱ tsí ikháa̱nꞌlaꞌ gíꞌmaa ma̱gi̱ꞌdoo tsina-jndi ído̱ gáꞌne migiñuu mbiꞌi rí ni̱gu̱maa, xúꞌkhue̱n máꞌ mo̱ne̱laꞌ asndo jámuu mbiꞌi. Ikhaa máꞌ gágu̱máá tsí ni̱gu̱maa guꞌwáá, xúꞌkhue̱n máꞌ mangaa tsí ra̱ꞌkháa xa̱bia̱a̱ꞌ tsí niratsi̱i̱ ga̱jma̱á mbúkha̱a̱ꞌ inuu xa̱bo̱ tsí na̱ꞌkha̱ i̱mba̱ xuajen. 13 Gíꞌmaa ma̱gi̱ꞌdoo tsina-jndi tsí ni̱gu̱maa ná guꞌwáaꞌ, jamí xúꞌkhue̱n máꞌ tsí waꞌtsi̱i̱ ga̱jma̱á mbúkha̱a̱. Xkuaꞌnii nawanúu awan drígo̱ꞌ ná xuyalaꞌ rí awan jámuu mbiꞌi ñajuun. 14 Jamí xa̱biya̱ tsí ra̱gíꞌdoo tsina-jndi, tsí tóthon-rígú xtóo idxu̱u̱ xuyuu, ikhaa xa̱bo̱ tsúꞌkhue̱n mi̱xkriya̱a̱ꞌ awúun xuajiuun, numuu rí táꞌne-mbánuu̱ awan drígo̱ꞌ.

15 Ana̱ꞌlóꞌ niꞌthúun xóó Abraám:

—Tsí a̱ꞌgia̱a̱ꞌ, ná-xáꞌne mbiꞌyuu̱ Saraí, rí Sára̱ gáꞌne mbiꞌyuu̱ xúge̱ꞌ rá. 16 Ma̱ne̱ tsakun-rámaa̱, jamí ma̱ne̱ rí ikhaa̱ ma̱ꞌne ku̱maa̱ mbáa a̱ꞌdeáaꞌ. Phú gakon rí ma̱ne̱ tsakun-rámaa̱, rí asndo ikhaa̱ ma̱nindxu̱u̱ ru̱dúún xa̱bo̱ xuajen mba̱ꞌo̱, jamí ná inuu̱ ikhaa̱ ma̱ga̱jnúú thúngaa tsí mba̱ꞌu̱u̱n.

17 A̱ꞌkhue̱n rí Abraám nismáti̱go̱o̱ rí niꞌgí inuu asndo mbayíí, jamí ninduꞌwée̱ rí nindxaꞌwá-mine̱e̱ꞌ: «Mbáa xa̱biya̱ tsí gíꞌdoo witsu skíñú (100) tsiguu ma̱gu̱maa mbáa a̱dée ráꞌ. Jamí Sára̱, gíꞌdoo máꞌ akho̱ skíñú gu̱wa̱ꞌ (90) tsiguu, mago̱-éda ja ráꞌ». 18 A̱ꞌkhue̱n Abraám niꞌthúun Ana̱ꞌlóꞌ:

—Rí phú máján xí ma̱gaaꞌ ma̱xtáa mújúun Ismaél ná inaaꞌ no rá.

19 A̱ꞌkhue̱n niriꞌña̱a̱ Ana̱ꞌlóꞌ:

—Gakon rí a̱ꞌgia̱a̱ꞌ ma̱ꞌne ku̱maa mbáa a̱ꞌdeáaꞌ, jamí ma̱ra̱xna̱ mbiꞌyuu̱ Isaák. Ikhaa̱ ma̱gúꞌdo̱ꞌ ga̱jme̱ꞌ awan, rí jámuu ma̱ri̱gá awan rúꞌkhue̱n ga̱jma̱á nindxu̱ún xa̱bi̱i̱ tsí ma̱gu̱mii nda̱wa̱á. 20 Mangaa ni̱dxawuun máꞌ ajngáaꞌ ga̱jma̱á numuu Ismaél. Ikhaa jngó ma̱ne̱ tsakun-rámaa̱, jamí ma̱ne̱ rí ma̱mi̱diúún guéño xa̱bi̱i̱, xúꞌkhue̱n máꞌ ma̱ꞌne mbaꞌii̱n mi̱ndaꞌkho. Ma̱nindxu̱u̱ anu̱ú tsí mbá gue̱jmi̱i̱ xa̱bo̱ ede̱, jamí ma̱ne̱ mbá xuajen rí phú mba̱a̱ ga̱jma̱á nindxu̱u̱. 21 I̱ndo̱ó máꞌ Isaák rá, tsí ma̱ꞌne ku̱maa Sára̱ xíríga̱á rí i̱mba̱ tsígu, tsúꞌkhue̱n ma̱gúꞌdo̱ꞌ awan ga̱jma̱á nindxu̱u̱.

22 Ído̱ rí wámbo̱o̱ Ana̱ꞌlóꞌ nindxákuun ga̱jma̱á Abraám, a̱ꞌkhue̱n rí ni̱ka̱a̱. 23 A̱ꞌkhue̱n rí Abraám ndiyáa Ismaél, jamí mbá xúgíin yumbáá tsí ni̱gu̱mii ná goꞌóo̱, xúꞌkhue̱n máꞌ mbá xúgíin yumbáá tsí niꞌtsi̱i̱n ga̱jma̱á mbúkha̱a̱, mbá xúgíin máꞌ xa̱bekha tsí júwá ná goꞌóo̱, a̱ꞌkhue̱n rí nixnúu̱ tsina-jndi. Ikhaa máꞌ mbiꞌi rúꞌkhue̱n ni̱ru̱thii̱n xtóo idxu̱u̱ xuñúu̱, xómáꞌ waꞌtháa̱n neꞌne Ana̱ꞌlóꞌ. 24 Akho̱ skíñú gu̱wa̱ꞌ-nítsu i̱kho̱ (99) tsiguu Abraám ído̱ rí ni̱gi̱ꞌdoo tsina-jndi. 25 Xómáꞌ Ismaél gíꞌdoo mbá gue̱tso̱ (13) tsiguu, ído̱ rí ni̱gi̱ꞌdoo tsina-jndi. 26 Mbóó máꞌ mbiꞌi rúꞌkhue̱n Abraám ga̱jma̱á Ismaél niguaꞌdáá tsina-jndi. 27 Mbá xúgíin xa̱bekha tsí júwá ná goꞌóo̱ niguaꞌdáá tsina-jndi ga̱jma̱á nindxu̱u̱ Abraám. Ikhaa máꞌ ni̱gi̱ꞌdoo yumbáá tsí ni̱gu̱maa ná goꞌóo̱, xúꞌkhue̱n máꞌ tsí waꞌtsi̱i̱ ga̱jma̱á mbúkha̱a̱ inuu xa̱bo̱ tsí na̱ꞌkha̱ i̱mba̱ xuajen.