1 Ído̱ rí ni̱ka̱-ranújngoo máꞌ rúꞌkhue̱n, a̱ꞌkhue̱n rí Ana̱ꞌlóꞌ niꞌnii̱ mba̱ꞌyoo̱ xí jmbu a̱kui̱i̱n Abraám, jamí niꞌthúu̱n:

—Abraám.

Xómáꞌ ikhaa̱ niriꞌña̱a̱:

—Ge̱jioꞌ máꞌ xtáá.

2 A̱ꞌkhue̱n waꞌtháa̱n:

—Ayáa a̱ꞌdeáaꞌ Isaák xúge̱ꞌ, tsí mbáwíi máꞌ xtaꞌdaa, tsí nandaaꞌ xtayáá, xúꞌkhue̱n máꞌ ayu ná mbaa Moriá, jamí ataxnáxi̱i̱ ikhín rí mi̱khaa̱ xóo mbá tsi̱gi̱jia̱nꞌ ná inuu mbá júba̱ rí ma̱tha̱a̱nꞌ máꞌ ikhúúnꞌ.

3 A̱ꞌkhue̱n rí phú miꞌcha̱ ni̱tu̱xi̱i̱ Abraám, jamí nirígu̱u̱ la xíli̱i̱ xtá-ngidiuu̱ jamí nigu̱u̱n a̱jmi̱i̱ yumbée̱, mangaa máꞌ Isaák. Xúꞌkhue̱n máꞌ ni̱ru̱thii̱n ixe̱ rí ma̱jmaa ná inuu tsi̱gi̱jia̱nꞌ. A̱ꞌkhue̱n nigájnuu̱ ni̱ke̱e̱ ná waꞌtháa̱n neꞌne Ana̱ꞌlóꞌ. 4 Mbiꞌi riatsú, Abraám niyaxe̱ tsíngua̱ꞌ jamí ndiꞌyoo̱ ná ma̱ga̱níi̱. 5 A̱ꞌkhue̱n Abraám niꞌthúún yumbée: «A̱guaꞌthi̱ínlaꞌ ge̱jioꞌ gajmiálaꞌ xtá-ngidi. Ikhúúnꞌ jamí dxáma mu̱ꞌguáxo̱ꞌ asndo ná ñúꞌún, jamí mo̱ne̱-mba̱a̱xo̱ꞌ Ana̱ꞌlóꞌ, jamí ma̱tangáa̱nꞌ máꞌxo̱ꞌ inalaꞌ».

6 A̱ꞌkhue̱n rí Abraám nigo̱ ixu̱u̱ tsi̱gi̱jia̱nꞌ, xúꞌkhue̱n máꞌ niyaꞌdoo̱ ne̱ Isaák tsí a̱dée̱. Xómáꞌ ikhaa̱ ndiyée̱ agu ga̱jma̱á chílo̱. Jamí mbóó máꞌ nigóo̱ ná-a̱jmi̱i̱. 7 A̱ꞌkhue̱n rí Isaák niꞌthúun anu̱u̱:

—Táa̱.

Xómáꞌ Abraám niriꞌña̱a̱:

—Dí máꞌ iyaaꞌ rá, a̱ꞌdéꞌ.

A̱ꞌkhue̱n niꞌthán Isaák:

—Ge̱jioꞌ ríga̱ agu ga̱jma̱á ixe̱. Náá-lá xtáa mogo̱ tsí mu̱xnáxi̱i̱lóꞌ mi̱khaa rá.

8 A̱ꞌkhue̱n niriꞌña̱a̱ Abraám:

—Ana̱ꞌlóꞌ gáxjnáa mogo̱ tsí ma̱ꞌne tsi̱gi̱jia̱nꞌ, a̱ꞌdéꞌ.

Jamí mbóó máꞌ xúꞌkhue̱n igóo̱. 9 Ído̱ niguáꞌníi̱ ná rí niꞌthán Ana̱ꞌlóꞌ, ikhín nixúxe̱ Abraám xu̱nꞌ itsí, xúꞌkhue̱n máꞌ nistrámee̱ ixe̱ inuu ne̱. A̱ꞌkhue̱n niroꞌóo̱ Isaák, jamí nitámaa̱ ná inuu ixe̱. Abraám naxnáxi̱i̱ a̱dée rí manindxu̱u̱ tsi̱gi̱jña̱ꞌ. 10 A̱ꞌkhue̱n rí Abraám ndiyá chílo̱ rí ma̱ro̱thon-roꞌoo agoo a̱dée. 11 A̱ꞌkhue̱n rí Ánje̱l drígo̱o̱ Ana̱ꞌlóꞌ Mikhuíí nindxaꞌwá asndo ná mikhu, niꞌthée̱n:

—¡Abraám! ¡Abraám!

Xómáꞌ ikhaa̱ niriꞌña̱a̱:

—Ge̱jioꞌ máꞌ xtáá.

12 A̱ꞌkhue̱n Ánje̱l niꞌthán:

—Ma̱xátha̱xkajmaa dxáma, nimbá xátha̱níi̱. Nda̱yo̱o̱ máꞌ rí natia-makuíí Ana̱a̱ꞌ Mikhuíí, numuu rí tára̱tha̱n xí ma̱xára̱xni̱iꞌ a̱ꞌdeáaꞌ tsí mbáwíi.

13 A̱ꞌkhue̱n niyaxe̱ Abraám ná tsu̱du̱u̱, ndiꞌyoo̱ mbáa mogo̱ nikhráꞌaa ga̱jma̱á chi̱jiu̱u̱ꞌ ná xtaꞌdu̱u̱ iná tsuwan. A̱ꞌkhue̱n ni̱ka̱ Abraám gáyáa mogo̱, tsúꞌkhue̱n nixnáxi̱i̱ mi̱khaa xóo xtiꞌkhuu a̱dée̱. 14 A̱ꞌkhue̱n rí Abraám nixná mbiꞌyuu júba̱ rúꞌkhue̱n «Ana̱ꞌlóꞌ Mikhuíí naxná rí ndaꞌyóo». Ikhaa jngó ri̱ga̱ ajngáa asndo máꞌ xúge̱ꞌ: «Ná júbu̱u̱ máꞌ Ana̱ꞌlóꞌ Mikhuíí ma̱ri̱gá rí ndaꞌyóo».

15 A̱ꞌkhue̱n rí Ánje̱l drígo̱o̱ Ana̱ꞌlóꞌ Mikhuíí nindxaꞌwá rí riajmu̱u̱ inuu Abraám asndo ná mikhuíí. 16 Niꞌthúu̱n:

—Ikhúúnꞌ máꞌ jmínu̱ú ni̱xu̱ꞌdá-mina̱ꞌ rí ma̱ne̱-mbánuu —iꞌthán Ana̱ꞌlóꞌ Mikhuíí—, numuu rí xáꞌnii nithane̱ rá, tára̱tha̱n xí ma̱xára̱xni̱ꞌ a̱ꞌdeáaꞌ tsí mbáwíi. 17 Ikhaa jngó phú gakon rí ma̱ne̱ tsakun-rámáá, xúꞌkhue̱n máꞌ ma̱ne̱ rí ma̱ꞌne mbaꞌiin xa̱bia̱a̱ꞌ asndo xóo a̱ꞌgua̱án, jamí asndo xóo we̱ꞌe̱ rí ri̱ga̱ rawuun iya a̱pha̱. Xómáꞌ xa̱bia̱a̱ꞌ ma̱ꞌngúún inúú xa̱bo̱ sia̱nꞌ. 18 Ga̱jma̱á majiu̱ún xa̱bia̱a̱ꞌ, ma̱gu̱ma-tsakun-ráma mbá xúgíí xuajen ná numba̱a̱, numuu rí nithane̱-mbáníí ajngóꞌ.

19 A̱ꞌkhue̱n rí Abraám nitanga̱a̱ inúú yumbée̱, jamí ni̱tu̱xúu̱n nigúu̱n mbóó máꞌ asndo ná Beerséba̱. Ikhín máꞌ niwanúu̱ nixtáa̱.

20 Ído̱ rí ni̱ka̱-ranújngoo máꞌ rúꞌkhue̱n, ni̱ꞌkha̱ ajngáa rí waꞌtháán Abraám: «Mangaa máꞌ Mílka̱ ni̱gu̱mii i̱ji̱i̱n ga̱jmáa̱ Nakór tsí dxíya̱a̱ꞌ máꞌ. 21 Ús ñajuun xa̱bo̱ ginii, tsí gua̱ꞌthe̱e̱ ñajúún Bús, xúꞌkhue̱n máꞌ anu̱u̱ Arám tsí mbiꞌyuu Kemuél, 22 xúꞌkhue̱n máꞌ Keséd, Áso̱, Pílda̱s, Jidláf jamí Betuél». 23 Betuél ñajuun máꞌ anu̱u̱ Rebéka̱. Tsíge̱ꞌ ñajúún tsí mbá migiñuu tsí neꞌne ku̱mii Mílka̱ ga̱jma̱á Nakór, dxíyo̱o̱ máꞌ Abraám. 24 Tsí músi̱i̱ Nakór mbiꞌyuu Reúma̱, jamí mangaa̱ neꞌne xuajii̱n ni̱gu̱mii i̱ji̱i̱n: Téba̱, Gaám, Táa̱s jamí Maáka̱.