XÓ NI̱GI̱ꞋDU̱U̱N-MUU 26

Isaák na̱ka̱ ná Jerár

1 Nda̱wa̱á a̱ꞌkhue̱n niríga̱ ewe ná mbaa rúꞌkhue̱n, mbáá máꞌ ewe xóo rí niríga̱ nákhí mbiꞌi rí nixtáa Abraám. Ikhaa jngó ni̱ka̱ Isaák ná mbaa Jerár, ná xtáa máꞌ Abimelék, xa̱bo̱ tsí naꞌthán-ñájúún mbo̱ filistéo̱. 2 Jamí ikhín nikujmaa Ana̱ꞌlóꞌ Mikhuíí inuu̱, jamí waꞌtháa̱n: «Ma̱xádxa̱taa-lá ná Ejípto̱, araxtaa máꞌ mbaa ná rí ma̱tha̱a̱nꞌlo̱ꞌ ikhúúnꞌ. 3 Araxtaa máꞌ naꞌcho̱o̱ ná mbaa ríge̱ꞌ, jamí ma̱xtáá ga̱jma̱á nindxa̱a̱ꞌ, xúꞌkhue̱n máꞌ ma̱ne̱ tsakun-rámáá. Numuu rí ikháán máꞌ jamí xa̱bia̱a̱ꞌ ma̱xnu̱ú xúgíí mbaa ríge̱ꞌ, jngó xkuaꞌnii ma̱ne̱-mbánuu awan rí ni̱xu̱ꞌdá-mina̱ꞌ ga̱jme̱ꞌ ana̱a̱ꞌ Abraám. 4 Ma̱ne̱ rí ma̱mi̱diúún mi̱ndaꞌkho xa̱bia̱a̱ꞌ asndo xóo a̱ꞌgua̱án mikhu, jamí ma̱xnúu̱ xúgíí mbaa ríge̱ꞌ. Xúꞌkhue̱n máꞌ ga̱jma̱á numúú xa̱bia̱a̱ꞌ ma̱gu̱ma-tsakun-ráma xúgíí xuajen inuu numba̱a̱. 5 Numuu rí Abraám nidxawuu̱nꞌ rí ni̱thu̱u̱n, jamí neꞌne-mbánuu̱ rí ni̱xna̱-ñájuu̱n, xúꞌkhue̱n máꞌ neꞌne-mbánuu̱ xtángawo̱ꞌ, mangaa máꞌ rí ni̱sngóo̱».

6 Ikhaa jngó nixtáa Isaák ná Jerár. 7 Xómáꞌ xa̱bo̱ tsí júwá máꞌ ikhín nu̱ra̱xíi̱ ga̱jma̱á numuu a̱ꞌgui̱i̱. A̱ꞌkhue̱n ikhaa̱ niꞌthúu̱n: «Dxáguíꞌ ñajuu̱n», numuu rí namíñuu̱ gáꞌthée̱n rí a̱ꞌgui̱i̱ ñajuun. Na̱ju̱mu̱u̱ rí xa̱bo̱ tsí júwá ikhín ma̱ja̱ñúu̱ góne̱ ga̱jma̱á numuu Rebéka̱, numuu rí phú tsiꞌyá wáa giaxu̱u̱. 8 Nda̱wa̱á ído̱ rí ni̱ka̱-ranújngoo máꞌ mbiꞌi rí xtáa̱ ikhín, a̱ꞌkhue̱n rí Abimelék, tsí naꞌthán-ñájúún mbo̱ filistéo̱, niyaxi̱i̱ ná mbá iduu guꞌwá, ndiꞌyoo̱ rí Isaák naꞌne xkaꞌtsoo Rebéka̱.