João 21

Yisu miimonehele huli bayihi ba nde hu dyanga la Tibelyade

1 Mwana a taangu yivyoho, Yisu abwemonehele huli bayihi ba nde ŋa muvanga a dyanga la Tibelyade. Mono buni nde hamonihili: 2 Simoni Peetelo, Tomasi, nga kuumbu «Vasa», Natanayeli musi Kana hu Ngalili, baana ba Zebedayi na bayihi ba nde boole bakima, baakuukimi mbuha mosi. 3 Simoni Peetelo ayabisi bo: «Me kadwe hu ulobo.» Bo baaleeli nde: «Bisu kaka na we luuyene». Bo baayeni na baakoti mu luungu. Ka butsuhu mo buuna, bo a baabahi batswi ve.

4 Ŋa busi bwakiidi, Yisu aba ateleme ŋa simu la dyanga. Ka bayihi a baayaabi ti, wuuna aba ni Yisu ve. 5 Yisu afuuli bo: «Baana ba me, benu na byudya?» Bo baafutili nde: «Naana!» 6 Nde aleeli bo: «Bwahaani lihi hu tsyelo a mbahala a luungu na benu sa libaha batswi.» Bu bo baabwahi lihi, bo a baatwali uduta lo ve, mu tooni a batswi bunzuhisini✝21.6 Luk 5.4-7 . 7 Na muyihi wu Yisu haba hatondo, ni uleele Peetelo: «Nde ni Pfumu!» Bu Simoni Peetelo hayuhi ti «nde ni Pfumu», nde apoti ikutu mu luungu la nde, mu tooni ati nde aba pene, na nde abwidi mu mamba. 8 Bayihi bana baayidi mu luungu, na ubaasamba mu lihi li laaba la luula mu batswi. Bo aba batahuha na simu, peleve mu kama (100) li mataka.

9 Bu bo baatoodi ŋa simu, baasutihi, ŋaana bo baamoni mbaahu yi baaba baasuusala batswi na mapa. 10 Yisu aleeli bo: «Behaani kabu li batswi mu baa benu limiibaha.» 11 Simoni Peetelo abwekoto mu luungu na aduti hu simu, lihi li laluula mu kama maku mataanu na batswi batatu (153) ba banene. Tso bu batswi baaba ba banzuhisini, lihi a laatudihi ve.