João 6

Yesʉ alɨsa bandʉ bɨhʉmbɨ bɨthano

1 Honyuma kw’aho, Yesʉ mwashabʉka engetsɨ y’iNgalilaya, kandɨ eyɨnahʉlwamo ngetsɨ ya Tiberia*6:1 Erɨndɨ ɨtsɨna ly’engetsɨ y’iNgalilaya, lɨthokene n’omuyi owalɨ hofɨ n’engetsɨ eyo ow’anahʉlwamo Tiberia, owalɨ ko lʉhande lw’obʉlengera ɨtsʉba lw’engetsɨ eyo.. 2 Muhindano w’abandʉ bangɨ mobamʉkwama, kʉshangwa abandʉ abo mobashʉnga bɨmɨnyɨkalo ebyo akanganaya mw’ilamya abakoni. 3 Aho Yesʉ mwɨrʉkɨra ko kɨthwa hagʉma n’abɨga bʉwe na mobikala eyo. 4 N’ekɨro kɨkʉlʉ ky'ePasaka y’aBayuta kyabyaga nɨ kɨrɨ hofɨ. 5 Yesʉ abere ashʉmba amesho, mwashʉnga muhindano mʉnene wa bandʉ niamuhikira. Aho mwabʉtsya Filipo athɨ: «Hayi ho thwangagʉla kalyo k’erɨrɨsa abandʉ aba?» 6 Mwanegena athyo nɨathega Filipo yo kɨnwa kʉshangwa abyaga nietsi ekyo akola. 7 Filipo mwamʉshʉbɨtsya athɨ: «Namo thwangagʉla mikati ya bɨtsere magana abɨrɨ bya faranga*6:7 Ebɨtsere by’esofaranga byo byahʉlwa hano, byagenda ebyo byahʉlwamo tinari. Na tinari ngʉma yabyaga lʉhembo lwa mʉlɨmo wa mʉthobero mʉgʉma., ɨthangagonera kʉbo na mothwangahabo kɨtse-kɨtse.» 8 Oʉndɨ mwɨga mʉgʉma ye Ndereya, mʉgalabo Simoni Petero mwamʉbwɨra athɨ: 9 «Hano halɨ mʉthabana awithe ku mikati ithano ya shayiri*6:9 Shayiri ni mbʉtho yangalinganibwa na bʉlo. na mahere abɨrɨ. Ewono, ebyo byanga yɨra ki ko bandʉ bangana n’aba?» 10 Yesʉ mwanegena athɨ: «Mʉbwɨre abandʉ bikale ahishi.» Ahandʉ aho habyaga bɨthɨ bɨngɨ. Aho abandʉ mobikala. Abayira bo babyaga aho, babyaga hofɨ bɨhʉmbɨ bɨthano. 11 Honyuma kw’aho, Yesʉ mwatsɨmba emikati eyo, mwasɨma Gongo, na mwagabɨraro ko bandʉ boshi bo babyaga aho. Na kuthyo mwagaba amahere nga ko bʉlɨ mʉndʉ abyaga alayire. 12 Babere bamamala iutha, Yesʉ mwabwɨra abɨga bʉwe athɨ: «Mʉkʉme-kʉme ebɨtse-bɨtse bithashiba, bʉshana kuthabyaga kɨtse n’ekɨgʉma kyo kyahera.» 13 Aho mobashongya-shongya ebɨtse-bɨtse by’emikati ithano y’eshayiri byo byashakaga, na mobutsutsya bɨthonga ikumi na bɨbɨrɨ.

14 Abandʉ babere bashʉnga ekɨmɨnyɨkalo Yesʉ akolaga, mobanegena bathɨ: «Ko kwenene omʉndʉ oyu nɨ omʉmɨnyeretsɨ yo wangahikire mo kɨhʉgo.»