João 9

Yesʉ alamya mbumi

1 Yesʉ abere anemʉtsʉka mo nzɨra, mwashʉnga mʉndʉ mʉgʉma yo wabyaga mbumi ɨthanga kw’ɨbʉthwa lɨwe. 2 Abɨga bʉwe mobamʉbʉtsya bathɨ: «Mʉkangɨrɨtsya, bʉshana na ki omʉndʉ oyu mwabʉthwamo mbumi? Nɨ bʉshana n’ebɨtsɨbʉ bɨwe kʉtse ebɨtsɨbʉ by’ababuthi bʉwe?» 3 Yesʉ mwashubya athɨ: «Omʉndʉ oyu athabʉthawa mbumi bʉshana n’ebɨtsɨbʉ bɨwe kʉtse n’ebɨtsɨbʉ by’ababuthi bʉwe. Hewethuwe abʉthawa athya bʉshana emɨkolano ya Gongo ɨmɨnyɨkale ɨtsʉkɨra ɨye. 4 Ko bʉkɨnatsene, lɨtholere nɨthwakola emɨrɨmo ya yo wanyɨthʉmaga. Kʉshangwa bwamakʉra, ko ndambi eyo omʉndʉ athangakotsya ɨshʉba kola. 5 Mo ndambi nyɨkɨnalɨ hano ishi, nyɨrɨ kyakakala kya hano ishi.»

6 Yesʉ abere amamala ɨnegena athyo, mwatsɨra mathandɨ w’ahishi, mwatsʉmba bɨtholo mo mathandɨ ayo, na mwahaka ebɨtholo ebyo ko mesho w’embumi eyo. 7 Yesʉ mwabwɨra embumi athɨ: «Genda ʉyanabe mo mesho ko kisima ky’iSiloamu*9:7 Ekisima ky’iSiloamu kyabyaga mwishi w’oluhimbo lw’omuyi w’ɨYerʉsalemʉ. Soma 2 Bamɨ 20:20, Isaya 8:6 n’ebishakirwe..» Siloamu n’ɨnegena mbʉ: yo wathʉmawa. Aho embumi eyo moyaya naba mo mesho na moyashʉbʉla n’ɨyɨhera eyɨlola.