Lucas 1

Mwatsɨ w’erɨbʉthwa lya Yesʉ

26 Ko mʉgʉlʉ obʉkʉle bwa Lisabeti bwabere bwahika ko mwetsɨ w’endathʉ, Gongo mwathʉma malaɨka Ngabulieri mo muyi w’iNasareti, mo kɨhʉgo ky’iNgalilaya, 27 ko mʉnyere mʉgʉma agenda ahʉlwamo Marɨa. Marɨa oyo agenda athahibwa na muyira mʉgʉma nɨ yo Yosefʉ, w’omo lʉganda lw’omwamɨ Tawiti. 28 Malaɨka oyo mwahika ho Marɨa abyaga n’ɨmʉketsya athɨ: «Bwakyere he Marɨa! Moga! Nyinya-kowethʉ mwakʉha lʉkogo kandɨ alɨ hagʉma nawe.» 29 Marɨa abere onvwa ekɨnwa eki mwahononokala. Mwathanga ɨyɨbʉtsya athɨ: «Engetsyo eyi inegenire yithi ki?»

30 He malaɨka mwamʉbwɨra athɨ: «Marɨa ʉthʉbahaga kʉshangwa Gongo amakʉha lʉkogo. 31 Waheka bʉkʉle, wandabʉtha mwana wa bʉtsana, wandamʉlʉkamo Yesʉ. 32 Andabya mʉkʉlʉ na andahʉlwamo Mʉgala wa Gongo yo ʉlɨ elʉgʉlʉ w’ebyoshi. Na Nyinya-kowethʉ Gongo andamʉha obwamɨ bwa Tawiti ishe-kʉlʉ ʉwe. 33 Andathegeka aBaisiraeli bo kera na kera, n’obuthegeki bʉwe bʉthɨndahwe.»

34 Marɨa mwabʉtsya malaɨka athɨ: «Ebi bya thokekana bɨthɨ ingye Nyithetsi nyamɨnya bayira?» 35 Malaɨka mwamʉshʉbɨtsya athɨ: «oMʉthɨma Mwerʉ andakukimirako, n’akagala ka Gongo w’elʉgʉlʉ w’ebyoshi kandakʉshwɨka ng’ekithuthu. Bʉshana n’eki omwana wandabʉtha andabya mubuyirire kandɨ andahʉlwamo Mʉgala wa Gongo. 36 Hene, Lisabeti w’omo lʉganda lwawe, na mwanahera mʉkekʉlʉ kandɨ yo wabyaga mʉgʉmba naye nɨ mʉkʉle wa myetsɨ ndathʉ alindire ɨbʉtha mwana wa bʉtsana. 37 Kʉshangwa hathalɨ kyo kɨnalemana embere sa Gongo.»

38 Aho, Marɨa mwanegena athɨ: «Ingye nyɨrɨ mukoli wa Nyinya-kowethʉ, binyibyeko nga ko ʉthanegena.» Honyuma kw’aho malaɨka mwayɨgendera.