LUKA 2

Yesʉ akanganibwa mo Nyʉmba ya Gongo

22 Honyuma kw’aho, ebɨro mobyahika byo Yosefʉ na Marɨa bangayeritsye ɨkwamana n’oMʉgomba wa Mʉsa nga kw’anegenire. Mobathwala omwana y’ɨYerʉsalemʉ bʉshana bamukanganie embere sa Nyinya-kowethʉ.*2:22 Soma Balawi 12:1-8. 23 Kʉshangwa bishakirwe mo Mʉgomba wa Nyinya-kowethʉ bɨthɨ: «Obʉlɨ mwana mʉmbere w’obʉtsana andabya wa Nyinya-kowethʉ.*2:23 Soma Ɨthoka 13:2,12.» 24 Kandɨ bahikaga bʉshana n’ɨhera obʉhere buthegekire mo Mʉgomba wa Nyinya-kowethʉ athɨ: «Hɨparara hɨbɨrɨ kʉtse makʉkʉ abɨrɨ owakɨrɨ malere.*2:24 Soma Balawi 12:8.»

25 Mo mʉgʉlʉ oyo mo muyi w’ɨYerʉsalemʉ mwabyaga mʉndʉ mʉgʉma erɨtsɨna lɨwe nɨ yo Simioni. Simioni oyo abyaga mʉndʉ athʉnganene niubahire Gongo. Agenda alɨndɨrɨra Mushabuli w’ekɨhanda ky’aBaisiraeli. oMʉthɨma Mwerʉ abyaga hagʉma naye. 26 Kandɨ mwamukumbulira kw’athɨndafwe athetsi alola kʉ Kirisito yo wandathʉmwa na Nyinya-kowethʉ. 27 Simioni mwashondolwa n’oMʉthɨma Mwerʉ, mwɨngɨra mo Nyʉmba ya Gongo. Ababuthi ba Yesʉ mobamʉlethamo akolerwe ng’oMʉgomba wa Mʉsa kw’anegenire. 28 Simioni mwangɨrɨra omwana mo minwe yɨwe, mwasingya Gongo n’ɨnegena athɨ:

29 «Nyinya-kowethʉ, wamabereretsya endagane awe.

Hano wahera wanganyirika ingye mʉgombe awe nyɨfwe mo bʉholo.

30 Kʉshangwa ingye owene-wene nyamayɨshʉngɨra mo mesho aye oMushabuli wamathʉma.

31 Wamamuthegekania abye Mushabuli embere s’abandʉ boshi

32 oMushabuli ono yo kyakakala kyandakoletsya ko bandʉ boshi abandʉ b’ebɨhanda,

kandɨ n’ɨye yo wandaletha olʉkengerwa ko bandʉ bʉwe Isiraeli.»

Erɨmɨnyerera lya Simioni.

33 Ebɨnwa Simioni anegenaga kʉ Yesʉ mobyashwekya ababuthi bʉwe. 34 Honyuma kw’aho, Simioni mwagashanɨrabo. He mwabwɨra Marɨa nyinya w’omwana athɨ: «Shʉnga! Omwana ono athabʉthwa bʉshana athoye bandʉ bangɨ mo Isiraeli n’imania bangɨ mʉbo. Kandɨ andabya kɨmɨnyɨkalo kyo kɨthoka kʉ Gongo kyo bandʉ bangɨ bandathɨnda. 35 Kʉshangwa emɨganɨtsye ya bandʉ bangɨ yo yibishire yandamɨnyɨkala. Nawe wowene Marɨa wandagalwa nga mʉndʉ bathathobola mʉthɨma mu muyali.»

Mʉmɨnyeretsɨ Ana asɨma Gongo

36 Kandɨ habyaga mʉkekʉlʉ mʉmɨnyeretsɨ erɨtsɨna lɨwe nɨ yo Ana. Abyaga mwalɨ wa Fanʉele w’omo lʉganda lwa Aseri. Ye Ana oyo mwamala omwe mo mɨaka ɨrɨnda bʉsha, iba ʉwe mwafwa. 37 Honyuma kw’aho, mwabya mʉshʉmbakatsɨ ihika kʉ mɨaka makumi mʉnanɨ n’ine. Athagenda athoka mo Nyʉmba ya Gongo, omo agendaga akolera Gongo kɨro na mwɨshɨ n’iyima akalyo n’ɨshaba. 38 Ana oyo mwahika mo kathambi ako, mwathanga ɨsɨma Gongo. Agenda asɨmola emyatsɨ ya Yesʉ ko bandʉ boshi bagenda abalɨndɨrɨra ko Gongo andashabʉla abandʉ b’ɨYerʉsalemʉ mo malɨgo wabo.