Mateus 20

Mushinga w’abahingi mw’ɨshwa ly’emisabibu

1 «oBwamɨ bw’elʉbʉla, bushoshekanibwe na mwenye erɨshwa mʉgʉma yo watsɨndʉkaga mo mambya mw’iyashondya bahingi b’erɨshwa lɨwe ly'emisabibu. 2 Mwahʉlɨkɨrɨrana nabo ɨhembabo kɨtsere kɨgʉma kya tinari*20:2 Etinari yabyaga faranga. N’etinari ngʉma yabyaga n’ɨyɨrɨngene n’olʉhembo lwa mʉbɨtsɨ mʉgʉma. ko kɨro, na mwathʉmabo mw’ɨshwa lɨwe ly’emisabibu. 3 Mwashʉba hʉlʉka ko saha ishathu na mwashʉnga bandɨ bandʉ bo babyaga nibimene ahandʉ h’omuhindamo bʉtsɨra mʉlɨmo. 4 Mwabwɨrabo athɨ: "Nemwe kuthyo mʉgende mʉyakole mw’ɨshwa lyaye ly’emisabibu nyabahemba nga ko bɨtholere." 5 Nabo mobayayo. Omwenye erɨshwa mwashʉbahʉlʉka ko saha ndathʉ, na honyuma kw’aho ko saha mwenda, na mwakola nga ko athathanga ɨkola. 6 N’oko saha ikumi na ngʉma, mwashʉbahʉlʉka na mweya bandɨ bandʉ nibimene aho na mwabwɨrabo athɨ: "Bʉshana na ki mwimene hano ko mʉthobero woshi bʉthakola mʉlɨmo?" 7 Nabo mobamʉshʉbɨtsya bathɨ: "Kʉshangwa hathalɨ mʉndʉ w’erɨthʉha mʉlɨmo." Mwabwɨrabo athɨ: "Nemwe kuthyo mʉgende mʉyakole mw’ɨshwa lyaye ly’emisabibu." 8 Bwabere bwahika igolo, omwenye erɨshwa ly’emisabibu mwabwɨra omwimanitsi ʉwe athɨ: "Bɨrɨkɨra abahingi na ʉhe obʉlɨ mʉndʉ yo esofaranga athakolera, ʉthange ko banyuma-nyuma na ʉmalɨre ko bambere-mbere." 9 Abahingi bo bathangaga omʉlɨmo ko saha ikumi na ngʉma, obʉlɨ mʉndʉ mwahamba kɨtsere kɨgʉma kya tinari. 10 Abambere bahabawa omʉlɨmo babere bahika, mobaganɨtsya bathɨ bahamba nyɨngɨ, hewethuwe mobahabwa nabo bʉlɨ mʉndʉ kɨtsere kɨgʉma kya tinari. 11 Babere bahamba, mobarʉkʉma ko mwenye erɨshwa, 12 nɨabanegena bathɨ: "Abahingi banyuma mobakola saa ngʉma nyɨsha, bamahamba ng’ithwe thʉthakola mo mʉthobero woshi mo lishɨ ɨtsɨbʉ." 13 Hewethuwe omwenye erɨshwa mwashʉbɨtsya mʉgʉma wa kʉbo athɨ: "Mwira aye, monyɨthalɨ enyɨkʉkanga. Moʉthalɨ oʉhʉlɨkɨrɨrana nangye kɨtsere kɨgʉma kya tinari ko kɨro? 14 Tsɨmba esofaranga ʉthakolera na ʉgende. Nyaha omunyuma sɨngana n’eso wabona. 15 Nyɨthatholere ɨkola ekyo nyishashire mo bushoki bwaye? Kʉtse wamafwa mwisho kʉshangwa enyɨnakolera abandʉ bo bɨbʉya?" 16 Aho Yesʉ mwashʉba negena athɨ: "Abanyuma-nyuma bandabya bambere-mbere, n’abambere-mbere bandabya banyuma-nyuma."»