1 Crônicas 17

Wurubwarɛ ɛ dɔ̀ ade ɛ sɩ̀ ɛ tɛ Dafidi

1 Gɛtɛ Dafidi e wura e si wo digyu-kpaara daanɩ fɔ, ɛ dɔ̀ Wurubwarɛ wɔtabʋrʋlɛ Natan alan, <<Nya gɛtɛ nmɩ ǹ sa seda iyon yii dikwo daanɩ, mɔ Yahwe Dikola dɩɩ dɩdaka fɔ bɩrɛ dɩ̀ dɔ Dɩyan dii Dikwo daanɩ.>>

2 Gɛ Natan e tiri wuunyun ɛ tɛ Dafidi alan, <<Ade-kamasɛ gɛtɛ ɩ̀ sa aamɩnlɛ waanɩ fɔ, mɛ yɩ, yema Yahwe ɛ̀ fɩya ma awɔ.>>

3 Ɛwʋ gɛ odente wʋtɔkɔ, Yahwe ɛ dɔ̀ Natan wo koro ɛ dɔ̀ alan,

4 << San ma dɔ̀ mɩɩnsaranyan Dafidi alɛ Yahwe alan, <Nka awɔ nan sere dikwo a tɛ mɩ nan sara daanɩ. 5 Ye sɩyɛɛ gɛtɛ na tiri Isareli bete na ye Egyipiti bè ye ma ǹdò lɛ, mɩn ta sara dikwo daanɩ n nya. Ntɛ tɔ n ye gɛ Dɩyan dii Dikwo dɩkɩ daanɩ n san dido daanɩ, ye gɛsarakʋn gɩkɩ gaanɩ san gido gaanɩ. 6 Ɔkʋn-kamasɛ gɛtɛ na fɩya ma Isareli bete na san fɔ, miin te lila boogyegeyelɛ ɛkɩ gɛtɛ na tiri ɛ̀ɛ̀ nya mɩɩn bɛnɩ boo koro fɔ alan, <<Anʋn yii koro gɛ an sere seda dikwo tɛ mɩ?>> >

7 <<Okoro, dɔ̀ mɩɩnsaranyan Dafidi alan, <Nmɩ Yahwe, Ɔkɛma powu Wuute fɔ alan, na kpèlè wɔ̀ na ye bɛnan boo geton, ma bɛnan bɔɔ gɛnya gaanɩ gɛtɛ àà bɛ mɛ mɩɩn bɛnɩ Isareli bete boogyegeyelɛ. 8 Na fɩya ma awɔ ɔkʋn-kamasɛ gɛtɛ a san fɔ, gɛ na berema aa bɛkyʋnlɛ powu na ye aa bʋnʋn. Nkele nan yɛ aa diyere dàà ye anlɛ gɛtʋnkwaa gii begyu bɛndɩrɛ-bɛndɩrɛ fɔ. 9 Gɛ nan tɛ mɩɩn bɛnɩ Isareli bete gɛsarakʋn, fɔ nan yɛ bɛ bàà sara dʋkɔ, fɔ bàà wura ɛbɛ-gbagba bɔɔ gɛsarakʋn, gɛtɛ ɛnɩ ɛkɩ ɛn nan nɩ ha bɛ. Duyu-kɛma dɩɩ bɛnɩ bɛn nan ni wura bɛ nyanla bɛ anlɛ gɛtɛ bɛ mɛ bɛ bɛ da fɔ, 10 ma ade gɛtɛ bɛ mɛ bɛ ye sɩyɛɛ ɔkʋna gɛtɛ na tiri mɩɩn bɛnɩ Isareli boo begyegeyelɛ fɔ. Nan di aa bɛkyʋnlɛ powu boo koro.

<< <Ntɛ dɔ̀ wɔ̀ n tana alɛ, nmɩ Yahwe nan sere bugyu bʋʋ dɩkpaara ntɛ awɔ ma aadu waanɩ. 11 Gengyi aawi ɩ̀ nɩma, gɛ à ku fɔ, nan tiri aadu waanɩ wʋʋnɩ ɛkɩ, awɔ-gbagba aabi-teni ɛkɩ èè di bugyu sere aa gɩsɩrɩ. gɛ nan yɛ wo bugyu buu gedi bàà sere ɩkpaa. 12 Ɛwɔ nan sere Dikwo ɛ tɛ mɩ, gɛ nan yɛ wo gigyu-bɩya gàà sere ɩkpaa gakpaakpa. 13 Nan mɛ wote, gɛ ɛɛ̀ mɛ miinbi. Mɩn nan kere wo gelen n ya, anlɛ gɛtɛ na kere gelen ɛbɛ gɛtɛ be gyegeye wɔ̀ na ya fɔ. 14 Mɔ fɔ nan yɛ ɛ̀ɛ̀ mɛ mɩɩn bɛnɩ ma miin bugyu buu gedi buugyegeyelɛ gakpaakpa. Gɛ wo bugyu buu gedi baà sara gakpaakpa.> >>

15 Ɛwʋ gɛ Natan ɛ ma kasɩ ade-tirilɛ-wùlàlɛ gɛtɛ e we fɔ ɛ tɛ Dafidi.

Dafidi wonyun-tiri

16 Ɛwʋ gɛ Dafidi ɛ san ɛ ma sara Yahwe bʋnʋn, gɛ e tiri onyun alan,

<<Oo, Yahwe Wurubwarɛ, ɛnyan gɛ ǹ di, gɛ ɛnyan ɛbɛ gɛ mɩɩn dɩkpaara dɩɩ bɛnɩ bè di, gɛ aa mɛ ade-dɩrɛ nyayɩ a tɛ mɩ lɛ? 17 Oo Wurubwarɛ, ma gɛtɛ a mɛ kpekpesi gba fɔ, nkyɛ wʋʋn ta kʋtɩ wɔ̀ gba, a biri a dɔ̀ ade gɛtɛ aà nɩ mɛ gɩsa ma gɩsarama wʋkɩ a tɛ nmɩ aasaranyan mɩɩn dɩkpaara. Oo Yahwe Wurubwarɛ, a ka mɩ anlɛ ɛnɩ-gbaa ɛkɩ.

18 Ade-mɔmɔ gɛ nmɩ Dafidi nan nɩ̀ talɩ n dɔ̀ wɔ̀ gɛtɛ a sa nmɩ aasaranyan gingyebi lɛ? Yema à nyɩ̀ nmɩ aasaranyan. 19 Oo, Yahwe, nmɩ aasaranyan miin koro ma aa gelenbi gii koro gɛ a mɛ ade-dɩrɛ nyayɩ, gɛ a tiri ade dɔ̀lɛ sɩ̀lɛ-dɩrɛ nyayɩ a wùlà lɛ.

20 <<Oo, Yahwe, ade gɛtɛ tɩ nʋn ma taaten powu fɔ yii koro, ɛkɩ ɛn ma anlɛ awɔ. Aako-kwan n di Wurubwarɛ. 21 Gɛ Gɩfɩɩ-mɔmɔ n nɩ sa gɛtʋnkwaa gaanɩ anlɛ aa bɛnɩ Isareli bete, gɛtɛ awɔ Wurubwarɛ a tiri bɛ a ye gɩdɩɩ gaanɩ a ba mɛ awɔ-gbagba aa bɛnɩ? A mɛ apenterenbide ma ade ma gɩsaa a ka a di diyere. A tiri aa bɛnɩ Isareli bete a ye Egyipiti, gɛ a berema bɩfɩɩ-fon a ye bɔɔ bʋnʋn. 22 Oo Yahwe, a ka Isareli a mɛ awɔ-gbagba aa bɛnɩ gakpaakpa, gɛ awɔ Yahwe a bɛ mɛ boo Wurubwarɛ. 23 Oo Yahwe, Nkele yɛ ade gɛtɛ a dɔ̀ a sɩ̀ ka dama nmɩ aasaranyan ma miindu waanɩ wʋʋ bɛnɩ boo koro fɔ yàà ba waanɩ. Mɛ anlɛ gɛtɛ a dɔ̀ a sɩ̀ fɔ. 24 Gɛlɛ fɔ, aa diyere daà ye gepepe, gɛ bɛnɩ baà dɔ̀ alɛ <Yahwe, Isareli bete boo Wurubwarɛ gɛtɛ è di Ɔkɛma powu Wuute fɔ n di Isareli wo Wurubwarɛ!> Ɛwʋ fɔ nmɩ aasaranyan Dafidi mɩɩn dɩkpaara daà yela kin-kin aa bʋnʋn baanɩ.

25 Gɛ awɔ, miin Wurubwarɛ na tiri a wùlà nmɩ aasaranyan alɛ aà sere digyu-kpaara a tɛ mɩ ma miindu waanɩ wʋʋ bɛnɩ wuu koro gɛ na wura oturu n te tiri onyun n tɛ wɔ̀ lɛ. 26 Oo Yahwe, awɔ n di Wurubwarɛ! A dɔ̀ ade a sɩ̀ gɛtɛ aà mɛ ade-kpara nyayɩ yiidu a tɛ nmɩ aasaranyan. 27 Nkele wu di wɔ̀ gʋnʋn gɛtɛ àà hira nmɩ aasaranyan miindu wʋʋ bɛnɩ, fɔ bàà sara aa bʋnʋn baanɩ gakpaakpa. Oo Yahwe, gɩnyan gɛtɛ a hira fɔ, a hira gɩ gakpaakpa.>>