1 Gɛtɛ Filisiti bete be gye Wurubwarɛ Dikola dɩɩ dɩdaka fɔ be were fɔ, bɛ ka dɩ be ye Ebenesa, bɛ san Asidodi. 2 Gɛ bɛ ka Dikola dɩɩ dɩdaka fɔ bɛ ma sɩ̀ bookpen Dagon dikwo daanɩ, gɛ bɛ ka dɩ bɛ sɩ̀ wɔ bɩlan baanɩ. 3 Gɛtɛ Asidodi bete bɛ lama kere-kpalɛ gɛgyɩgyan fɔ, ekpen Dagon ɛ nʋ̀n e tin wɔ bʋnʋn buu koro gɛtʋnkwaa Yahwe Dikola dɩɩ dɩdaka fɔ dɩɩ bʋnʋn. Bɛ tɔ̀là Dagon, gɛ be birima wɔ bɛ sɩ̀ wo geserekʋn. 4 Mɔ gɛtɛ Kere gi biri gɩ kpa gɛgyɩgyan gɛ bɛ lama fɔ, Dagon e biri ɛ nʋ̀n e tin wɔ bʋnʋn buu koro gɛtʋnkwaa Yahwe Dikola dɩɩ dɩdaka fɔ dɩɩ bʋnʋn. Wo duyu di kebi, gɛ walɔ i sila ɩ̀ dɔ dikpen-kwo fɔ diitunu. Wo koro giiko na kuruma. 5 Gɛlɛ wuu koro gɛ bè ye ma ǹdò, Dagon bekpente oo, ɛnɩ-kamasɛ gɛtɛ ee gyu Dagon dikpen-kwo gɛtɛ dɩ̀ sa Asidodi fɔ, ɛn taa kyikya otunu fɔ.

6 Yahwe wowurufa wʋ ba Asidodi bɛnɩ, ma ɛbɛ gɛtɛ bɛ̀ gbɛma dʋkɔ fɔ boo koro. Ɛ yɛ gɩsaa gi gyu bɛ, gɛ ɛ yɛ beserelɛ be sere-sere ditele fɔ dɩɩ bɛnɩ ma ɛbɛ gɛtɛ be silin bɛ be tuma fɔ powu. 7 Gɛtɛ Asidodi bete be we ade gɛtɛ i sere fɔ, bɛ dɔ̀ alan, <<Isareli wokpen dɩdaka nyadɩ dɩn nan nɩ sara taakʋn nfan. Yema ekpen fɔ ɛ ka owurufa tii koro gɛ ɛ ka owurufa tiikpen Dagon mɔ wo koro.>> 8 Okoro be kpèlè Filisiti begyu-dɩrɛ powu be tuma, gɛ be lila bɛ alan, <<Lan gɛ taà mɛ Isareli bete bookpen dɩdaka fɔ?>>

Be tiri wuunyun alan, <<Ɩ yɛ taà ka Isareli wokpen dɩdaka fɔ tɩ san Gati.>> Okoro bɛ ka Isareli wokpen dɩdaka fɔ bɛ san.

9 Mɔ ye ɔya gɛtɛ Dɩdaka fɔ dɩ ma gyu Gati fɔ, Yahwe wowurufa wʋ tɔ ditele dɩtɔkɔ dii koro gɛ be gyu gɩsaa-dɩrɛ. Ɛ yɛ beserelɛ be sere-sere ditele fɔ dɩɩ bɛnɩ powu, bɛndɩrɛ ma bebi powu. 10 Okoro bɛ ka Wurubwarɛ Dikola dɩɩ dɩdaka fɔ bɛ san Ekiron.

Gɛtɛ Wurubwarɛ Dɩdaka fɔ dɩ̀ bɔ dii gyu Ekiron fɔ, Ekuron bete bɛ gbɛrɛ afala bɛ dɔ̀ alan, <<Bɛ ka Isareli wokpen dɩdaka fɔ bɛ ba nfan, bàà be wolo ɛtɩ ma tɩɩ bɛnɩ. 11 Okoro be kpèlè Ekiron begyu be tuma gɛ bɛ dɔ̀ bɛ alan, <<Ɩ ka Isareli wokpen dɩdaka fɔ ɩ san. I birima dɩ ɩ san dɩɩlɛ, nka gɛlɛ fɔ daà be wolo ɛtɩ ma tɩɩ bɛnɩ.>> Yema diku dɩ yɛ gɩsaa-dɩrɛ gi gyu ditele fɔ daanɩ, yema Wurubwarɛ wowurufa-dɩrɛ wʋ ba boo koro. 12 Bɛnɩ gɛtɛ ben ku fɔ, beserelɛ be sere-sere bɛ, be wula gɛ boo gewula fɔ gɩ san gatala.