2 Begyu-dɩrɛ 1

Eliya ma Egyu Ahasiya

1 Egyu Ahabi diku dɩɩ gama fɔ, Mowabi gɩfɩɩ gɩɩ bɛnɩ bɛ tɔ be yela Isareli gɩfɩɩ gii koro. 2 Duwi dɩkɩ Ahasiya gɛtɛ è di Isareli wogyu-fon fɔ e ye wabansʋrʋ gɛtɛ wʋ̀ sa Samariya fɔ gatala ɛ bɛ nʋ̀n gɛtʋnkwaa, gɛ e pira kpaan. Ɛwʋ gɛ ɛ sa bɛnɩ alan, <<Ɩ san Ekuron bete bookpen Baali-Sebubi wanɩ, yàà ma lila ɩ nʋn alɛ nan tɔ n ye miin geyeba nyagɩ gaanɩ?>> 3 Mɔ Wurubwarɛ wɔsalɛ ɛ dɔ̀ Tisibe-te Eliya alan, <<Tɔ san ma tuma bɛnɩ gɛtɛ Samariya wogyu ɛ sa lɛ, fɔ àà lila bɛ alan, <Gesilɛ Wurubwarɛ ɛn ma Isareli, gɛ ɩɩ fɔrɔ Ekuron wokpen Baali-Sebubi wakʋn yàà ma lila ade lɛ loo?> 4 Gɛlɛ wuu koro Yahwe ɛɛ dɔ̀ alan, <An nan tɔ a ye àà geyeba nyagɩ gaanɩ, diku gɛ aà ku!> Gɛ Eliya ɛ da. 5 Gɛtɛ bɛnɩ-salɛ fɔ be biri bɛ ba egyu-dɩrɛ wakʋn fɔ, e lila bɛ alan, <<Anʋn yii koro gɛ i biri bilen gɛlɛ?>> 6 Gɛ bɛ dɔ̀ wɔ alan, <<Ete ɛkɩ e be tuma tɩ, gɛ ɛ dɔ̀ tɩ alɛ ti biri tɩ san egyu-dɩrɛ gɛtɛ ɛ sa tɩ fɔ wakʋn, fɔ tàà ma dɔ̀ wɔ alɛ Yahwe alan, <Gesilɛ Wurubwarɛ ɛn ma Isareli, gɛ ɩɩ fɔrɔ Ekuron wokpen Baali-Sebubi anɩ yàà ma lila nʋn lɛ loo? Gɛlɛ wuu koro an nan tɔ a ye aa geyeba nyagɩ gaanɩ, diku gɛ aà ku!> >> 7 Ɛwʋ gɛ egyu fɔ e lila bɛ alan, <<Lan gɛ ete gɛtɛ e tuma yɩ gɛ e lila yɩ gɛlɛ gaade nyayɩ fɔ è we?>> 8 Gɛ be tiri wuunyun alan, <<Ete fɔ ɛ̀ sa bɛnan baakpa yɩɩ gɛgba, gɛ ɛ̀ ban gɩnan-kpa giililɛ.>>Gɛ egyu fɔ alan, <<Eliya Tisibe-te fɔ gɛ wù di.>> 9 Ɛwʋ gɛ ɛ sa bɩtà bʋʋ bɛtàlɛ akpilin anyɔɔ ma fwo (50) ma bɔɔndɩrɛ Eliya wakʋn. Ɔkʋna wʋtɔkɔ fɔ, Eliya è si odon wuu duyu, gɛ bɩta bʋʋ bɛtàlɛ bɔɔndɩrɛ fɔ ɛ bʋn ɛ san waakʋn ɛ ma dɔ̀ wɔ alan, <<Oo, Wurubwarɛ wɔnɩ, egyu alɛ waran ba!>> 10 Gɛ Eliya ɛ dɔ̀ bɩtà bʋʋ bɛtàlɛ bɔɔndɩrɛ fɔ alan, <<Gengyi ǹ di gɛ Wurubwarɛ wɔnɩ bɩrɛ fɔ, ɔtan wu ye gatala wʋ be kuma awɔ ma aa bɛnɩ akpilin anyɔɔ ma fwo fɔ powu!>> Ɛwʋ gɛ ɔtan wu ye gatala wu be kuma ɛwɔ ma wɔ bɛnɩ akpilin anyɔɔ ma fwo fɔ wu wolo disere-kɩlɩn.

11 Wʋ mɛ gɛlɛ fɔ, egyu fɔ e biri ɛ sa bɩtà bʋʋ bɛtàlɛ akpilin anyɔɔ ma fwo (50) ma bɔɔndɩrɛ Eliya wakʋn. Gɛ bɩtà bʋʋ bɛtàlɛ bɔɔndɩrɛ fɔ ɛ dɔ̀ Eliya alan, <<Wurubwarɛ wɔnɩ, egyu alɛ waran ba bilenten!>> 12 Gɛ Eliya ɛ dɔ̀ bɩtà bʋʋ bɛtàlɛ bɔɔndɩrɛ fɔ alan, <<Gengyi ǹ di gɛ Wurubwarɛ wɔnɩ bɩrɛ fɔ, ɔtan wu ye gatala wu be kuma awɔ ma aa bɛnɩ akpilin anyɔɔ ma fwo fɔ powu!>> Ɛwʋ gɛ ɔtan wu ye gatala wu be kuma ɛwɔ ma wɔ bɛnɩ akpilin anyɔɔ ma fwo fɔ wu wolo disere-kɩlɩn.

13 Wʋʋ gama fɔ, egyu fɔ e biri ɛ sa bɩtà bʋʋ bɛtàlɛ bɔɔndɩrɛ-siyefɛ ɛkɩ ma wɔ bɛnɩ akpilin anyɔɔ ma fwo (50) Eliya wakʋn. Bɩtà bʋʋ bɛtàlɛ bɔɔndɩrɛ-siyeefɛ nyawɔ bɩrɛ, ɛ san Eliya bʋnʋn gɛ ɛ waran e kura wakpin yii koro, gɛ ɛ fɔ wɔ alan, <<Oo Wurubwarɛ wɔnɩ, ntɛ fɔ wɔ gɛ, we ɛtɩ ma bɛnɩ akpilin anyɔɔ ma fwo nyabɛ gɛtɛ tì di aa bɛsaranyan lɛ tii gutunkoro. 14 Nya! Ɔtan wu ye gatala wu be kuma bɩtà bʋʋ bɛtàlɛ bɔɔ bɛndɩrɛ bɛnyɔɔ-gyangbasɛ fɔ ma bɔɔ bɛnɩ powu. Mɔ we miin gutunkoro, fɔ àà yɛ nan sara nkpa.>> 15 Ɛwʋ gɛ Wurubwarɛ wɔsalɛ fɔ ɛ dɔ̀ Eliya alan, <<Kara yɛ gɩsaa gàà ton wɔ̀, ɛyɩ ma ɛwɔ ɩ waran ɩ san.>> Okoro Eliya ɛ tɔ gɛ ɛbɛ ma ɛwɔ bɛ waran bɛ san egyu fɔ wakʋn. 16 Gɛ ɛ dɔ̀ egyu fɔ alan, <<Yahwe alan, <Gesilɛ Wurubwarɛ ɛn ma Isareli, gɛ ɩɩ fɔrɔ Ekuron wokpen Baali-Sebubi anɩ, yàà ma lila ɩ nʋn lɛ loo?> Ade nyayɩ gɛtɛ a mɛ lɛ yii koro, an nan tɔ a ye aa geyeba nyagɩ gaanɩ, diku gɛ aà ku!> >> 17 Okoro Ahasiya e ku, anlɛ gɛtɛ Yahwe ɛ dɔ̀ ɛ tɛ Eliya alɛ ɛ dɔ̀ fɔ. Gɛ gɛtɛ Ahasiya en wo ebi-tenibi okoro, wonobi Yoram gɛ bɛ ka bɛ sɩ̀ bugyu be sere wɔ gɩsɩrɩ, Yuda wogyu-dɩrɛ Yehosafati wobi Yehoram bugyu buu gedi wʋʋ gɩkyan-nyɔɔfɛ gaanɩ. 18 Bɛ ŋwara ade-kurumakyɛɛ powu gɛtɛ egyu-dɩrɛ Ahasiya ɛ mɛ powu fɔ bɛ sa Isareli begyu bɔɔ gɩkpa gaanɩ.