1 Samuel 18

Saul Ɔkpɛ̃gu David Sirerɛ

1 Gɔ David ɔɔɖegu Saul ika ɔro kama ne, Yonatan ɔbara mawɛ̃ ku David i siwarã ame, fiɛ ɔɖɔɛ wũ lɛ ɔ̃ mɔmɔ awe. 2 Ita i iyi nɛmɔ iso ne, Saul ɔfɔ David ɔwe i kɔrɛ, ɔ̃isiɖi wũ ɔri sɔ ɔkpese ɔkɛlɛ kaa i ɔ̃ ɔse iyo. 3 Ne Yonatan ɔkã ndamu ɔnyikanya ku David alasɔ ɔɖɔɛ wũ lɛ ɔ̃ mɔmɔ. 4 Yonatan ɔɖi awu tagbaraa wa ɔpia ɔtã David. Ana ne ɔtã David ɔ̃ kato awu ta ɔ̃ ipɛmi gu kuta gu ɔ̃ kafiami.

5 Irabiara nɛ Saul ɔpia David sɔ ɔbara ne ɔsɛ ɔbara ne kukaakɔ ire iti. Ala ne ɔso ne, Saul ɔtã wũ siɖebia kɔlɛa i ɔ̃ makpakpãdze ndɛ̃. Nnɛgbe ɔwe makpakpɛ̃dze ɔɖuɖu gu ta Saul makpakpa ɔmɛrɛ̃.

6 Ɔwi wɔ i makpakpɛ̃dze ɔɔkpese mato maba kaa gɔ David ɔɔɖoe Filistise ne, marɔ̃go ɔbɔrɛ i Israel simagɛ̃ ɔɖuɖu ame maba maasarɛgu Igara Saul. Mato maka aka matɔ ku isoɣɔ, mato masa akasa gu akasa agbã mama. 7 Gɔ mato matɔ ne, mato maɖi ɔnɔ sɔ,

"Saul ɔɔɖoe ɔ̃ kukpi,

fiɛ David ɔɔɖoe ɔ̃ kukpi kuweo."

8 Saul iiɖɔɛ nnɛ maka maɣɛ, ɔso ɔna sikpã gbaã. Ne ɔɣere so sɔ, "Mato maɣɛ sɔ David ɔɔɖoe maturi kukpi kuweo ɣɛɛ mme ne kakpi kawɛ̃ kere. Ikuti kɛkɛĩ mato maamɔɛ̃ wũ sigara!" 9 Ita i ɔwi wɔmɔ iso ne Saul ɔkarã sirerɛ inɔ kukaakɔ i David iso.

10 Kaɖesɛã ne siwarã nyanyariã dzɛ lobɔrɛ i Ɣaa kɔrɛ ɔba i Saul iso ku ɔɣiɛ. Ɔtsɛ kanyaiɖi ibara ara lɛ iti loɔbo wũ aku i ɔ̃ iyo, gɔ David to ɔsa siwɛ̃ sango lɛ kumɛgɔ ɔsɛ ɔbara. Ifele ɔwe i 11 Saul kɔrɔ̃ ɔluwɛ̃ ɔwɛrɛ̃ ne ɔɣere so sɔ, "Loatsue David lomatãra i ibere iso." Ɣɛɛ David ɔtere ne kanya ikpɛ inyɔ.

12 Saul ɔtsɛ David inigã alasɔ Bosate ɔwegu David ɣɛɛ Bosate ɔɔre kama i Saul kɔrɛ. 13 Ne ɔso Saul ɔtã David ɔrui i ɔ̃ kɔrɛ fiɛ ɔbara wũ makpakpɛ̃dze kakpi kawɛ̃ ɔkpakpa, ne David ɔkɔ makpakpɛ̃dze i ma kakpã ame. 14 Irabiara nɛ ɔbara ne ɔna isaruɛ gbaã alasɔ Bosate ɔwegu wũ. 15 Gɔ Saul ɔnya kumɛgɔ i David ɔna isaruɛ ne, ɔnigã wũ ɔbua. 16 Ɣɛɛ ɔbiara i Israel gu Yuda ɔɖuɖu ɔɖɔɛ David, alasɔ ɔkɔ ma makpakpɛ̃dze masɛ kakpã kukaakɔ.

17 Saul ɔɣere David sɔ, "Nya wũ ɔbibirɔ̃gomi kpakpare, Merab i ngbe. Loasu wũ lotã-ɔ ayiri; tɔtɔ ne kpɛ̃ Bosate kakpã ku kagbegbe tã me." Alasɔ Saul ɔɣere so sɔ, "Loibaɖi kɔrɔ̃ losia wũ iso. Ma Filistise si mabara nnɛmɔ!"

18 Ɣɛɛ David ɔkarɛ Saul sɔ, "Nna loɖe, be nɖe wũ iyomaturi ɣee wũ ɔse kalɛ i Israel kaɖe ame sɔ loakpese igara ɔmase?" 19 Ɣɛɛ gɔ ɔwi ɔɣo sɔ Saul aasu Merab, ɔ̃ ɔbibirɔ̃gomi ɔtã David ɔyiri ne, ɔsu wũ ɔtã Adriel, ɔrɛrɛ̃ wɔ lobɔrɛ i Mexola.

20 Kiniɔ ne, Saul ɔbibirɔ̃gomi Mixal ɔwe i kuɖɔɛ ame ku David, gɔ maɣere Saul masegu i ne iso ne ɔna isoɣɔ.

21 Saul ɔbara adzuni sɔ, "Loasu wũ lotã wũ, si ɔ̃akpese iyebi ɔtã David iyɔ ne ma Filistise kɔrɔ̃ asia wũ iso." Ne ɔso Saul ɔɣere David sɔ, "Kiniɔ ɔri ɔkpɛ nyɔare ɔɔbusi sɔ aakpese wũ ɔmase."

22 Ne Saul ɔtã ɔ̃ maɖabo silɔ sɔ, "Miɖe David ika iwɛrɛ ame miɣere wũ sɔ, 'Nyɔ, igara sɛ ɔɖɔɛ-ɔ fiɛ ɔ̃ maɖabo ɔɖuɖu sɛ maɖɔɛ-ɔ; kiniɔ kpese ɔ̃ ɔmase.' "

23 Maɣere David atɔ̃me wagbe. Ɣɛɛ David ɔɣɛ sɔ, "Ɔnyɔ mito sɔ ira kosoi iɖe sɔ aakpese igara ɔmase? Wɛrɛba kere loɖe fiɛ kuwɛ̃ iiɣe me."

24 Gɔ Saul maɖabo ɔɣere wũ nnɛ i David ɔɣɛ ne, 25 Saul ɔtã mmuai sɔ, "Miɣere David sɔ, ' Igara iito ɔbie ɔrɔ̃go iti ara iɖo ma Filistise kulafa akurinyaĩ siko, ne loaɖe wũ matsirise ibara itikuso ne.' " Saul adzuni wa ɔbara loɖe sɔ ma Filistise si maɖoe David.

26 Ɔwi wɔ i maɖabo ɔɣere David atɔ̃me wagbe ne, ɔna isoɣɔ sɔ ɔ̃akpese igara ɔmase. Ne ɔso fiɛ ɔwi wɔ masɛ aaɣo ne, 27 David ɔkɔ ɔ̃ makpakpɛ̃dze masɛ maaɖoe ma Filistise alafa anyɔ ne ɔsu ma akurinyaĩ siko ɔbɔ ne. Maka wã ɔɖuɖu ayi ɔsu ɔtã igara gɔ David ka ɔ̃akpese igara ɔmase. Ne Saul ɔsu ɔ̃ ɔbibirɔ̃gomi Mixal ɔtã David ɔyiri ne.

28 Gɔ i Saul ɔtsue sɔ Bosate ɔwegu David fiɛ ɔ̃ ɔbibirɔ̃gomi Mixal ɔɖɔɛ David ne, 29 Saul ɔnigã wũ ɔbua, fiɛ ɔkpese David tsirise i ɔ̃ agbanayi tsɔra ame.

30 Ma Filistise makpakpɛ̃dze makpakpa ɔla maɔsɛ kakpã, ayi kumɛgɔ mabara ngbɔ ne, David sɛ ɔna isaruɛ ɔɖo Saul makpakpa tsɔra. Ne ɔso David ɔba ɔ̃afɔ iyere.