1 Mose ɔɣere Israel mabi sɔ: Nwagbe nɖe asɛ̃ra gu mmara mɛ iso ikote sɔ miabara kukaakɔ, i karɔ̃ ga i Bosate mi mawa Ɣaa, to ɔ̃atã mi miafɔ iso ne. Mibara i me iso ayi kumɛgɔ misi i karɔ̃ iso. 2 Miwɔra nkɔi ɔɖuɖu mɛ i maturi ma i karɔ̃ ga mito mifɔ, sɛ masumu ma aɣɔ pelepele, i abe kɔlɛa iso gu i abemi iso gu i kudziri biara gɔ lowarɛ akpai kayirinɔ. 3 Mibibiɛ ma isɔrɛkusege, si mikɔtɛ ata sekelea wɔsɔwɔsɔ. Mitsuedza ma Asera kuɣɔrɔ̃go sidziri si misɛ̃ ma aɣɔ arapɔa mitu si minukutu ma ayere miɖi i nkɔi mɛmɔ.

4 Iikote sɔ miasumu Bosate mi Ɣaa i ɔri wɔ iso masɛ masumu ma aɣɔ. 5 Ɣɛɛ mikɛlɛ kakɔi ga i Bosate mi Ɣaa aaɖi i kumele ɔɖuɖu ndɛ̃ i karɔ̃ ame, ngbegɔ ɔ̃asia ɔ̃ Iyere itã ɔ̃ kawekɔ̃. Mmɔ ikote sɔ miakɛlɛ ne. 6 Mmɔ miasɛgu mi araifɛ̃ asɔrɛ gu asɔrɛ gu mi ikaweova gu karatã igbaɔ ga mikã misɛ miatã Bosate gu mi kuɖuɛ karatã gu mi manantsuĩ gu masɛrɛ abi ɖeakatɔ̃. 7 Mmɔ ne, i Bosate mi Ɣaa anɔ ne, mi gu mi ayomaturi aaɖe ara fiɛ miana isoɣɔ i irabiara nɛ mina i mi kɔrɔ̃ karabara ame. Ala Bosate mi Ɣaa ɔfere mi kusɛkusɛ ɔso.

8 Midaabara lɛ kumɛgɔ bosɛ bobara i ngbe ku nɔme, ɔbiara sɛ ɔbara lɛ ikote wũ. 9 Ala miibo i ngbegɔ miana iwarã gu kaɖekɔ̃ ga i Bosate mi Ɣaa to ɔ̃atã mi ɔso. 10 Ɣɛɛ mito miawara Yordan ɔwore fiɛ miasɛ i karɔ̃ ga i Bosate mi Ɣaa, to ɔtã mi iso lɛ kaɖekɔ̃. Ne ɔ̃atã mi iwarã i mi matsirise ɔɖuɖu ma loki malɔ mi, nrɔɔ̃ ame fiɛ miawe i kaɣɔ ame. 11 Iyɔ Bosate mi Ɣaa to ɔ̃aɖi kakɔi lɛ kawekɔ̃ ɔtã ɔ̃ Iyere - mmɔ miasu irabiara nɛ loɣere mi mikɛlɛgu ne. Wã nɖe mi araifɛ̃ asɔrɛ gu mi asɔrɛ mama, mi ikaweova gu mi karatã igbaɔ gu mi ara sɛɛ ɔɖuɖu wa mikã sɔ miatã Bosate. 12 Mina isoɣɔ i Bosate mi Ɣaa anɔ i mmɔ, mi gu mi mabibirɛrɛĩ gu mabibirɔ̃gomi gu mi maɖaborɛrɛ̃ gu maɖaborɔ̃go gu ma Levise ma lobɔrɛ i mi simagɛ̃ ame, mma nna karɔ̃ kukawɛ̃ ma mɔmɔ lɛ kaɖekɔ̃. 13 Minyɔ so kukaakɔ sɔ miibasɔrɛ mi araifɛ̃ asɔrɛ, kukakɔi karere ga miɖuɛ. 14 Miasɔrɛ wã i kakɔi kawɛ̃ pɛ nga i Bosate aaɖi i mi kamele kawɛ̃ karɔ̃ ame. Mmɔ kere miabara ara ɔɖuɖu wa loɣere mi.

15 Ɣɛɛ miba ɔri miɖue mabɔi i mi simagɛ̃ ame miɖe sina kumɛgɔ mibie. Miawo ɔɖe kumɛgɔ kanya i Bosate sɛ ɔtã mi, si iɖe ɖui ɣee kasɔlɔ i kusɛkusɛ gɔ i Bosate mi Ɣaa sɛ ɔtã mi kanya. Mi ɔɖuɖu aawo mabɔi magbe ɔɖe, misekele oo ɣee miisekele i kubarara kanya. 16 Ɣɛɛ ikote sɔ miibaɖe ima ɣɛɛ misɔrɛ̃ ima mifere i karɔ̃ lɛ ndu awe. 17 Iikote sɔ miaɖe geɖebu ɔraɖui ikaweova ɣee mi ndã ɣɛtɛ gu nnɔĩ ɣee mi manantsuĩ ɣee masɛrɛ abi ɖeakatɔ̃ ɣee ira irere mikã ndamu sɔ miatã ɣee kuɖuɛ karatã ɣee karatã igbaɔ, i mi simagɛ̃ ame. 18 I ne kanya ne, mi gu mi mabibirɛrɛĩ gu mi mabibirɔ̃gomi gu mi maɖaborɛrɛ̃ gu maɖaborɔ̃go gu ma Levise ma lobɔrɛ i mi simagɛ̃ ame ne - ikote sɔ miaɖe wã i Bosate mi Ɣaa anɔ, i kakɔi kawɛ̃saã ga i Bosate mi Ɣaa to ɔ̃aɖi. Miana isoɣɔ i Bosate mi Ɣaa anɔ, i mmɔ ku irabiara nɛ misu mi nrɔɔ̃ mibara. 19 Minyɔ so kukaakɔ sɔ miakpa ma Levise anya, ayi kumɛgɔ kanya mipia ngbã i karɔ̃ iso.

20 Si Bosate mi Ɣaa ɔɔtã mi karɔ̃ ɔmɔ kabua, lɛ kumɛgɔ ɔɣɛ ɔsɛ ne fiɛ mibie sina teteree fiɛ miɣɛ sɔ, "Nto lobie sina." Iyɔ miawo sina ɔɖe lɛ kumɛgɔ mibie. 21 Si kakɔi ngbegɔ i Bosate mi Ɣaa ɔɖi sɔ ɔ̃ Iyere aawe ɔdzoro iɣede i mi kɔrɛ ne, ɔwi ɔrere wɔ mibie ne miawo nantsuĩ ɣee sɛrɛ ɔɖue i mabɔi ma Bosate ɔtã mi ame lɛ loɣere mi. Iyɔ miawo sina ɔɖe i mi mɔmɔ ɔmagɛ̃ ame lɛ kumɛgɔ miɖuɛ. 22 Ɔrere wɔ losekele ɣee loisekele i kubarara kanya aawo sina dzɛmɔ ɔɖe, lɛ kumɛgɔ ɔ̃awo ɖui ɣee kasɔlɔ ɔɖe. 23 Ɣɛɛ minyɔ sɔ miibaɖe ima, alasɔ ima nɖe ngbã. Iikote sɔ miaɖe sina ku ngbã. 24 Iikote sɔ miaɖe ima, misu ne mifere i karɔ̃ lɛ kumɛgɔ nsɛ masu ndu mafere i karɔ̃. 25 Midaaɖe ne, si ialɛgu mi gu mi mabiama alasɔ ka mito miabara nnɛ loya i Bosate anɔmi ame.

26 Ɣɛɛ misu mi karatã sekelea gu irere nɛ mikã ndamu misɛ sɔ miatã Bosate mikɛlɛgu kakɔi kawɛ̃ ga ɔto ɔ̃aɖi. 27 Misu mi araifɛ̃ asɔrɛ mitã Bosate mi Ɣaa i ɔ̃ isɔrɛkasege iso, sina gu ima wã anyɔ ɔɖuɖu. Mi asɔrɛ ima ne ikote sɔ miasu ne mifere i Bosate mi Ɣaa isɔrɛkasege kuruɛ. Ɣɛɛ miawo sina ɔɖe. 28 Minyɔ kukaakɔ sɔ miabara i asɛra ɔɖuɖu wa nto lotã mi iso, si ialɛgu mi gu mi mabiama ku ɔwi biara. Alasɔ mito miala miɔbara nnɛ lokote gu nnɛ nlɛ iBosate mi Ɣaa anɔ.

29 Bosate mi Ɣaa to ɔ̃awɔra nɖebi maturi i mi katɔ̃ mma ka mito miba miakpɛ̃gu miafɔ ma karɔ̃. Ɣɛɛ si miɔsa ma miɖi, ne misɛ i ma karɔ̃ iso 30 si maɔwɔra maturi mamɔ i mi katɔ̃ kama ne, minyɔ so kukaakɔ sɔ miibafafarɛ kuira i ma aɣɔ iso, mipia so i kukpakpi ame miɣɛ sɔ, "Nda i nɖebi mɛgbe sɛ misumu ma aɣɔ? Si bo wũ boabara kumɛɔ ame." 31 Iikote sɔ miasumu Bosate mi Ɣaa i ɔri wɔ iso mato masumu ma aɣɔ. Ala masɛ mabara ara ɔɖuɖu wa igbã i Bosate iisɛ ɔɖuɛ fiɛ ɔtsiri ɔso. Masɛ matsuedza ta ma mabibirɛrɛĩ gu mabibirɔ̃gomi lɛ asɔrɛ i ɔtɔ ame matã ma aɣɔ.

32 Minyɔ sɔ mibara i mmara ɔɖuɖu mɛ lotã mi iso, midaaɖi kuira ɣee mibua kuiwɛ̃ i me iso.