1 Si kanyaɖidze ɣee nwɔ nsɛ ɔɖi arɛ karɔ̃, pia i mi ndɛ̃ fiɛ ɔɣɛ ɔsɛ sɔ iwawãra ikparĩ ɣee ibaɣii to iaba ne, 2 si ikparĩ ɣee ibaɣii nɛ ɔɣɛ ɔba i ne ame ne ɔɣɛ sɔ, "Mitã bosiai si bosumu aɣɔ mama" (maɣaa mama ma miiɣe). 3 Iikote sɔ miakã kanyaɖidze wɔmɔ ɣee kasɛãrɛ wɔmɔ atɔ̃me atsue. Bosate mi Ɣaa ɔsu wũ ɔto ɔla mi ɔnyɔ, si ɔtsue si mito miɖuɛ wũ, ku mi sikala ɔɖuɖu gu situ ɔɖuɖu. 4 Ikote sɔ miasiai Bosate mi Ɣaa fiɛ ɔ̃ ikote sɔ miawarɛ ku kunigã. Mimɔɛ̃ ɔ̃ mmara mila si miwarɛ wũ. Misumu wũ si mipɛ mimatã wũ. 5 Ikote sɔ miaɖue nwɔ nsɛ ɔɖi arɛ karɔ̃ ɣee kanyaɖidze wɔmɔ alasɔ ɔɣere mi sɔ mita miya i Bosate mi Ɣaa, nwɔ loɖi mi ɔbɔrɛgu i Egipte karɔ̃ ame iso fiɛ ɔɖi mi i sisande karɔ̃ ame. Ɔturi wɔgbe ɔbie sɔ ɔ̃akã mi, ɔɖi i ɔri wɔ iso Bosate ɔɣɛ sɔ misɛ.

6 Si fɔ mɔmɔ ɔnyibirɛrɛĩ ɣee fɔ ɔbibirɛrɛĩ ɣee fɔ ɔbibirɔ̃gomi ɣee fɔ ɔre wɔ asɛ aɖuɛ ɣee fɔ burise sɛ ɔwo-ɔ ɔtɔ ɔpia i iwɛrɛ ame, ne ɔɣere-ɔ sɔ, "Tã bosumu aɣɔ mama." (Aɣɔ wa i mi ɣee mi mawa iiɣe. 7 Ɔto ɔ̃apia-ɔ katetere sɔ misumu maturi ma lobore mamatã mi aɣɔ ɣee mma nsi i kakɔi dzoroa aɣɔ.) 8 Daanɔ ɔ̃ itɔ̃me ɣee daakã wũ atsue. Daanyɔ wũ nnya. Daatã wũ ɔri ɣee daakɔla wũ. 9 Ikote sɔ aaɖue wũ. Ɖekatɔ̃ pɛ wũ ata iyɔ maturi ɔɖuɖu aapɛ wũ ata. 10 Mipɛ wũ ata si ɔkpi alasɔ ɔbie sɔ si ɔkã mi ɔɖi i Bosate mi Ɣaa ɔri iso, nwɔ loɖi mi ɔbɔrɛgu i sisande karɔ̃ ame i Egipte. 11 Iyɔ Israel maturi ɔɖuɖu, to maanɔ fiɛ maanigã fiɛ kuwɛ̃ iisibabara iranyanyariã nɛmɔ igbã i mi ndɛ̃ ana.

12 Si minɔ maɣɛ i ɔmagɛ̃ ɔwɛ̃ iso i ndzɛ Bosate mi Ɣaa ɔtã mi, sɔ misɛ ame 13 sɔ ɔtile marɛrɛ̃ mawɛ̃ i mi kaɖe ame, ɔɔkã ma ɔmagɛ̃ ame maturi maɖi i ɔri iso, maɣɛ sɔ, "Mitã boasumu aɣɔ mama" (aɣɔ wa miiɣe), 14 iyɔ ikote sɔ miakarɛ ne ame minɔ, mifafarɛ ne ame kukaakɔ. Si iɖe ɔnukuare fiɛ masiaita sɔ inyanyara nɛmɔ ɔba i mi ndɛ̃ ne, 15 iyɔ ikote sɔ miaɖue maturi ma ɔɖuɖu i ɔmagɛ̃ wɔmɔ ame ku ipɛmi. Miwɔra ɔmagɛ̃ wɔmɔ pelepele, maturi gu ayomabɔi ɔɖuɖu. 16 Misa ɔmagɛ̃ wɔmɔ ara kanya si misu wã miasɛ i ɔmagɛ̃ itiri, si mitsuedza ɔmagɛ̃ gu irabiara i ɔ̃ ame pelepele, lɛ araifɛ̃ isɔrɛ mitã Bosate mi Ɣaa. Ikote sɔ ɔmagɛ̃ aawe i aku ame ɔwi daaro fiɛ kuwɛ̃ iisibaledza wũ iɖaɛ kuiyikuiyi. 17 Iikote sɔ maanya kuira nɛ ikote sɔ maawɔra i mi nrɔɔ̃ ame, si Bosate aafiriki i ɔ̃ sikpã teterea ame fiɛ ɔ̃anyɔ mi nnya, ɔbara mi kayiribielea fiɛ ɔ̃atã misi gbaã, lɛ kumɛgɔ ɔɣɛ ɔsɛ ku ndamu ɔtã mi mawa. 18 Ala misɛ miwarɛ Bosate mi Ɣaa fiɛ misɛ i ɔ̃ mmara ɔɖuɖu mɛ lotã mi nɔme iso fiɛ mito mibara nnɛ loya i ɔ̃ anɔ.