Deuteronômio 17

1 Mose ɔɣere Israel mabi sɔ: Midaasu nantsuĩ ɣee sɛrɛrerɔ̃ wɔ ira ɔnina iso misɔrɛ mitã Bosate mi Ɣaa, ala nnɛmɔ to iaɖe imusuora i ɔ̃ anɔ.

2 Si ɔrɛrɛ̃ ɔwɛ̃ ɣee ɔrɔ̃go ɔwɛ̃ i ɔmagɛ̃ ɔrere wɔ i Bosate to ɔtã mi ame, to ɔbara iranyanyariã i Bosate anɔ ne, ɔtu Ɣaa ndamu, 3 si ɔta ɔya i wũ mmaraisi iso ne ɔturi wɔmɔ ɔ̃ɔsumu maɣaa mama, ne ɔbɔitikarɔ̃ ɔtã ma ɣee kuɣɛ̃ ɣee ɔgbaleti ɣee awãmi wa i kuɖokpo ne, 4 si matã mi itɔ̃me nɛgbe itsue ne, iyɔ mifafarɛ ne ame kukaakɔ. Si iɖe ɔnukuare sɔ ɔbara imusuora nɛgbe i Israel ne, 5 iyɔ mikɔ ɔrɛrɛ̃ ɣee ɔrɔ̃go wɔ lobara iranyanyariã nɛgbe, miɖi mibɔ i mi ɔmagɛ̃ kayogodɔ̃, si mipɛ wũ ata si ɔkpi. 6 Ikote sɔ maturi inyɔ ɣee itɛ loaɖe aɖansiɛ fiɛ miaɖue ɔturi. Ɣɛɛ miibaɖue ɔturi kuwɛ̃ si ɔturi ɔwɛ̃ kere loɖe aɖansiɛ. 7 Mma loɖe aɖansiɛ ikote sɔ maaɖekatɔ̃ i ɔ̃ iɖue ame, iyɔ maturi tsɔra ka maapia ma nrɔɔ̃ i ne ame. Ikote sɔ miatuĩdza iranyanyariã i mi ndɛ̃.

Mmara i Atɔ̃mekaɣɛkɔ̃ Iso

8 Mose ɔsɔgu sɔ: Si atɔ̃me ɔba i mi atɔ̃mekaɣɛkɔ̃ - lɛ ituriɖue ɣee atɔ̃me ikpadzɛ̃ i kaɣɛkɔ̃ ɣee ita ibo i ɔturi iso fiɛ atɔ̃me ba ɔle aɖo matɔ̃meɣɛdze itaisia ne, misu wã mikɛlɛgu i ngbegɔ Bosate mi Ɣaa to ɔ̃aɖi. 9 Mikɛlɛ masɔrɛdze ma nɖe ma Levise gu tɔ̃meɣedze wɔ nɣɛ i kanya ku ɔwi wɔmɔ ame kɔrɛ. Misu mitã ma si maabo i ne ame masiaita matã mi. 10 Ikote sɔ miabara misia i nnɛ iso masiaita matã mi, i kakɔi ga i Bosate aaɖi. Minyɔ sɔ mibara i irabiara nɛ maasɔ̃ mi sɔ mibara iso. 11 Mibara i mmara mɛ masɛ mate mi gu nnɛ masɛ masiaita iso matã mi kukaakɔ. Midaasɛnɛkɛ̃ i nnɛ maaɣere mi iso mikɛlɛ kuɖearɔ̃ iso ɣee kubena iso. 12 Si ɔrere ɔsɛ̃ nnɛ i tɔ̃meɣɛdze ɣee sɔrɛdze wɔ nsɛ ɔya ɔsumu Bosate mi Ɣaa ɔsiaita ne, ikote sɔ maaɖue wũ. Ikote sɔ miaɖi iranyanyariã i Israel. 13 Maturi ɔɖuɖu to maanɔ fiɛ maanigã, iyɔ kuwɛ̃ iisibasɛ̃ itɔ̃me itaisia ana.

Asɛra i Igara Iso

14 Si miɔbo i karɔ̃ ga i Bosate mi Ɣaa to ɔ̃atã mi fiɛ miɔfɔ karɔ̃, ka misi i mmɔ, ne miɣɛ sɔ, "Mitã bosɛ igara botã so lɛ nɖebi ɔɖuɖu mɛ loki milɔ bo awe." 15 Minyɔ sɔ nwɔ miaɖi sɔ miasɛ sigara ne, ɔɖe nwɔ i Bosate mi Ɣaa sɛ ɔɖi. Ikote sɔ ɔ̃aɖe mi mɔmɔ ɔnyii. Midaasɛ ɔfɔ sigara mitã so, nwɔ loiɖe ɔnyii Israelse. 16 Igara ne, iikote sɔ ɔ̃abie apɔngɔ gbodzoo ɔtã so ɣee ɔtã maturi ɔkpese makɛlɛ Egipte karɔ̃ iso, si masɛ maana wã mabua. Ala Bosate ɔɔɣere mi sɔ, "Midaakpese misɛ i ɔri wɔmɔ iso ana." 17 Igara daayiri marɔ̃go gbodzoo, si iiɖe ngbɔ mato maakã ɔ̃ ɔtu mayura. Iikote sɔ ɔ̃abie sikãrɛtɛa gu sikãfudza ɔfu kpi ɔtã so.

18 Si igara ɔba i iyara iso i ɔ̃ sigarakaɖekɔ̃ ne, ikote sɔ ɔ̃atsɛrɛ mmara mɛgbe ɔsia i ɔko iso ɔtã so, ɔbɔrɛgu i masɔrɛdze, mma nɖe ma Levise ɔre ame. 19 Ikote sɔ iase i ɔ̃ kɔrɛ fiɛ ɔ̃aka wũ i ɔ̃ agbanayi ɔɖuɖu ame, si ɔ̃asuã kumɛgɔ ɔ̃awarɛ Bosate ɔ̃ Ɣaa ku kunigã. Ana ne si ɔ̃asiai mmara mɛgbe atɔ̃me ɔɖuɖu gu asɛ̃ra wagbe kukaakɔ. 20 Si ɔ̃ibanyɔ so sɔ ɔlɛ ɔɖo ɔ̃ manyii si ɔ̃ibafiriki i mmara kɔrɛ ɔkɛlɛ kuɖearɔ̃ ɣee kubena iso. Iyɔ ma gu ɔ̃ ɔkparɛ aaɖe sigara ifɔ ɔwi dzoroo i ɔ̃ sigarakaɖekɔ̃ i Israel.