MOSE V 31

Yosua To Ɔ̃akpese Israel Tɔ̃ɖedze i Mose Kama

1 Ne Mose ɔbɔrɛ ɔsɛ ɔ̃aɖe Israel kaɖe ɔɖuɖu akaɖe wagbe ɔɣɛ sɔ, 2 "Kiniɔ loɔfɔ akɔ kulafa gu sinyɔ ne ɔso loisibawo mi ɔkɔ. Bosate ɔɔɣere me sɔ, 'Aibawara Yordan ɔwore.' 3 Bosate mi Ɣaa mɔmɔ to ɔ̃aɖe mi katɔ̃ ɔwara Yordan ɔwore. Ɔto ɔ̃awɔra nɖebi mɛ mpia i mi katɔ̃ fiɛ miafɔ ma nrɔ̃. Yosua ana to ɔ̃aɖe mi katɔ̃ ɔkɔ mi ɔwaragu mi lɛ kumɛgɔ i Bosate ɔɣɛ. 4 Bosate to ɔ̃abara ma lɛ kumɛgɔ ɔbara Sixon gu Og ma Amorise magara ma ɔwɔragu ma karɔ̃. 5 Bosate to ɔ̃asu ma ɔpia i mi nrɔɔ̃ ame fiɛ ikote sɔ miabara ma, ara ɔɖuɖu wa loɣere mi. 6 Miwe ɔle si miwe katetere. Midaanigã ɣee midaati mikpakpa ala ma ɔso. Ala Bosate mi Ɣaa sɛgu mi fiɛ ɔ̃awegu mi fiɛ ɔ̃ibarui ɔnyua mi ɣee ɔsɛ̃ mi kuiyikuiyi ɔso."

7 Kere ne Mose ɔkpere Yosua ɔɣedza fiɛ ɔɣere wũ i Israel kaɖe ɔɖuɖu anɔ sɔ, "We ɔle si awe katetere, alasɔ ikote sɔ aakɔ maturi magbe, abogu i karɔ̃ ga i Bosate ɔkã ndamu ɔtã ma mawa sɔ ɔ̃atã ma ame. Ana ne ikote sɔ aaɣɛ karɔ̃ atã ma lɛ ma kaɖekɔ̃. 8 Bosate mɔmɔ to ɔ̃aɖe mi katɔ̃ ɔkɔ mi fiɛ ɔ̃awegu mi. Ɔ̃ibarui i mi kɔrɛ fiɛ ɔ̃ibanyua mi ɔsɛ kuiyikuiyi. Midaanigã fiɛ ifɔ̃ daamɔɛ̃ mi miyu katetere."

Mmara Ika

9 Ne ɔso Mose ɔtsɛrɛ mmara mɛgbe fiɛ ɔsu ɔtã masɔrɛdze gu Israel makpakpa ɔɖuɖu. Masɔrɛdze nɖe Levi mabibirɛrɛĩ, mma losore Bosate ndamu aɖaka ne. 10 Kere ne Mose ɔɣere masɔrɛdze gu makpakpa sɔ, "Ikɔ kɔdzɛva biara kawirikɔ̃, ikɔ nɛ masɛ masu kuso matsɛ ne, i Kukpakɛ ame Iyiɖea ame ne, 11 si Israel kaɖe ɔɖuɖu ɔba i Bosate mi Ɣaa anɔ i ngbegɔ ɔ̃aɖi ne, miaka mmara mɛgbe teteree sɔ Israel mabi si manɔ. 12 Misa maturi kanya - marɛrɛ̃, marɔ̃go gu mabi si mawe i mmɔ gu mafɔ ma ɔɖuɖu mpia i mi simagɛ̃ ame, si mawe i mmɔ si maakã atsue fiɛ maasuã kumɛgɔ maanigã Bosate mi Ɣaa fiɛ maasiai mmara ɔɖuɖu mɛgbe atɔ̃me kukaakɔ. 13 Ikote sɔ ma mabi ma loiɣe mmara mɛgbe aanɔ me. Ne maasuã kumɛgɔ maanigã Bosate mi Ɣaa ayi kumɛgɔ mipia ngbã i karɔ̃ ga mito miawara Yordan ɔwore miafɔ ame."

Maɣɛ Israel Ɔtsuele Masɛ

14 Bosate ɔɣere Mose sɔ, "Kiniɔ ne, fɔ kukpi ɔwi ɔɔbore ɔbo. Kpere Yosua si miba i Isarɛ Ikpayo kɔrɛ i ngbegɔ loasɛra Yosua." Ne ɔso Mose gu Yosua ɔba i Isarɛ Ikpayo ame.

15 Kere ne Bosate ɔte so i Ikpayo ame lɛ idɔdɔ nɛ lomini, ne idɔdɔ ɔya i Ikpayo kayogodɔ̃ kabɔrɛnya kato. 16 Ne Bosate ɔɣere Mose sɔ, "Ka ato aba aakɛlɛ aawarãgu fɔ mawa, iyɔ iibana ɔpã ne, maturi magbe to maasɛ maaɖe asɔrɔ̃ gu kafɔrɔ̃ ga ame, mato maabo maɣaa mama. Mato maasɛ̃ me maatu ndamu mɛ lobaragu ma. 17 Iyi nɛmɔ ne loto loanagu ma sikpã fiɛ loanyua ma losɛ. Loakɔla wũ anɔ i ma kɔrɛ fiɛ mato maawɔra ma. Amɔrɛã gu kukpakpi gbodzoo to aaba i ma iso. Iyi nɛmɔ ne mato maakarɛ sɔ, 'Iiɖe bo Ɣaa lonyua bo ɔsɛ, ɔso i kukpakpi gɔgbe to kuba i bo iso ɣɛɛ?' 18 Gbaã ne loakɔla wũ anɔ ku iyi nɛmɔ, ala ma ɔtile ɔɖuɖu iti gɔ mapɛ mafiriki masumu maɣaa mama ɔso.

19 "Kiniɔ ne mitsɛrɛ kuka gɔgbe misɛ so. Si miate Israel mabi si mitã mala maɔka kɔ̃, sɔ iaɖe aɖansiɛ i ma iso itã me. 20 Ɔwi wɔ loɔkɔ ma lobogu i karɔ̃ sɛɛ ku iɖa iso, kã lokã ndamu loɣɛ losɛ sɔ loasu lotã ma mawa ne. Si maɔna ara fiɛ maɔɖe ara mami mana so ne, mato maapɛ kama mafirikira fiɛ maatsɛ maɣaa mama isumu, mato maasɛ̃ me fiɛ maatu wũ ndamu. 21 Si amɔrɛã gu kukpakpi gbodzoo ɔba i ma iso ne, kuka gɔgbe atɔ̃me to kuaɖe aɖansiɛ i ma iso. Ala ma ɔkparɛ ana iibaɣara kɔ̃ ɔso. Ka loɣe nnɛ mpia i ma ame fiɛ mato maabara, nane fiɛ loakɔ ma lobogu i karɔ̃ ga loɣɛ losɛ ku ndamu ikã iso." 22 Ne ɔso Mose ɔtsɛrɛ kuka gɔgbe ɔsɛ ku iyi nɛmɔ. Ne ka ɔte Israel mabi kuka ne.

23 Ne Bosate ɔtã Yosua wɔ nɖe Nun ɔbibirɛrɛĩ mmarra sɔ, "We ɔle si awe katetere alasɔ fɔ nto aakɔ Israel mabi akɛlɛgu i karɔ̃ ga loɣɛ losɛ ku ndamu ikã iso. Ne Mme wũ mɔmɔ loawegu mi."

24 Gɔ Mose ɔro mmara mɛgbe atɔ̃me itsɛrɛ ɔpia i ɔko ame, ita i karɔ̃kasɛkɔ̃ isɛ iabo kawirikɔ̃ ne, 25 ɔtã ma Levise ma nsɛ masore Bosate ndamu aɖaka silɔ sɔ, 26 "Misu Mmara Ɔko wɔgbe misɛ i Bosate mi Ɣaa ndamu aɖaka kuruɛ. Mmɔ ɔ̃ase lɛ aɖansiɛ i mi iso. 27 Ala loɣe kumɛgɔ miba atsuele fiɛ miisɛ miwarɛ Bosate ɔso. Si miisɛ miwarɛ Bosate gɔ lopia ngbã i mi kɔrɛ ne, loɣe sɔ mi idaawarɛ wũ to iakɛlɛ kato iɖo si loɔkpi kama! 28 Misira mi kumele makpakpa ɔɖuɖu gu mi karabaramatɔ̃ɖedze ɔɖuɖu kanya i wũ anɔ i ngbe. Loapia ma atɔ̃me wagbe i kutsue, si kato gu karɔ̃ si maɖe aɖansiɛ i ma iso matã me. 29 Loɣe sɔ wũ kukpi kama ne, mito mianina pelepele mianyua ngbã isɛ lɛ kumɛgɔ loɣere mi sɔ mibara. I ɔwi wɔ loaba ame ne, kukpakpi to kuaba i mi iso alasɔ mito miabara iranyanyariã i Bosate anɔ. Bosate to ɔ̃ana sikpã i aranyanyariã wa mibara iti."

30 Ne Mose ɔɣɛ kuka gɔgbe atɔ̃me, ita i karɔ̃kasɛkɔ̃ isɛ iabo kawirikɔ̃ i Israel maturi ɔɖuɖu atsue ame.