1 Ɔturi wɔ mayira ɔwi gbodzoo ɣɛɛ ɔsɛ̃ ɔ̃isu kuira i ne ame ne,

ɔto ɔ̃awɔ ɔluwɛ̃ gɔ maisibawo wũ ɔsa.

2 Si maturi bɔlɔlɔa to maɖeiso ne, maturi sɛ mana isoɣɔ;

ɣɛɛ si maturi nyanyariã to maɖeiso ne, maturi sɛ matɔrɛ̃.

3 Ɔbi wɔ nsɛ ɔɖɔɛ iwola ne, ɔsɛ ɔpia ɔ̃ ɔse isoɣɔ;

ɣɛɛ nwɔ nsɛ ɔpia kulaa ku sidzetɔmarɔ̃go sɛ ɔnina ɔ̃ karana ame.

4 Igara wɔ lobara ara tɔrɔrɔa sɛ ɔsɛra kaɖe,

ɣɛɛ igara wɔ mba anɔ ibɛbɛ i sikã gu kuwɛrɛra ifɔ sɛ ɔbiɛ kã.

5 Ɔturi wɔ nsɛ ɔɣere ɔ̃ ɔnyii kasɔla kanyamɛrɛ̃ atɔ̃me

sɛ ɔɖaɛ awulɛ ɔtã so.

6 Ɔturi nyanyariã akpi nsɛ amɔɛ̃ ɔ̃ mɔmɔ,

ɣɛɛ ɔturi bɔlɔlɔa aawo aka ɔka ɔna isoɣɔ.

7 Ɔturi bɔlɔlɔa sɛ ɔsu ira i mawɛrɛba ɔkpɛ i itɔ̃meiɣɛ i ɔri iso ame,

ɣɛɛ ɔtilese iisu kuira i ne igbã iso.

8 Maɣiãrase sɛ mapia kulu i ɔmagɛ̃siare ame,

ɣɛɛ mawolai sɛ manidza sikpã.

9 Si ɔturi wolai ɔsɛ atɔ̃mekaɣɛkɔ̃ ku kadzunisɛĩ ne,

kadzunisɛĩ sɛ ɔnyagɛ̃ ɔla ɔ̃ama sima, fiɛ isobuɛ iisɛ iwe.

10 Maturiɖoese sɛ matsiri ɔturi wɔ nɖe ɔnukuarese

fiɛ maturiɖoese sɛ mabie sɔ maaɖoe ɔturi sɛɛ.

11 Kadzunisɛĩ sɛ ɔɖi ɔ̃ sikpã ɔɖuɖu ɔte lɛ kumɛgɔ ɔ̃awo,

ɣɛɛ ɔturi wolai sɛ ɔmɔɛ̃ so ɔla.

12 Si ɔɖeisoi sɛ ɔkã mila atɔ̃me atsue ne,

ɔ̃ makpakpa ɔɖuɖu to maakpese matilese.

13 Wɛrɛba gu nwɔ nsɛ ɔwedza maturi inyɛ ɔɖuɖu ɔkate i nnɛgbe ame:

Bosate nsɛ ɔtã ma inyɔ ɔɖuɖu anɔmi sɔ manya ara.

14 Si igara ɔɣɛgu mawɛrɛba atɔ̃me i ɔri wɔ loya iso ne,

ɔ̃ sigaraiyara aaya teteree ɔwi biara.

15 Ɔturi iyira ɔpɛdziri sɛ ɔtã matsue iwola,

ɣɛɛ ɔbi wɔ maɖi atsue kere ɖe kunuarɛ ɔtã ɔ̃ ɔnyi.

16 Si ɔtile to ɔkɛlɛ katɔ̃ ne, ikpi ibara sɛ ikɛlɛ katɔ̃,

ɣɛɛ maturi bɔlɔlɔa nto maanya matilese karɔkɔ̃.

17 Kpadzɛ̃ fɔ ɔbi iyɔ ɔto ɔ̃atã-ɔ isobuɛ;

fiɛ ɔ̃apia-ɔ isoɣɔ.

18 Si Ɣaa kaɖikate na i kaɖe ame ne, kaɖe iisɛ kakososo ku kã nsɛgbai;

ɣɛɛ so aaɣɔ nwɔ nsɛ ɔmɔɛ̃ mmara ɔla.

19 Maisɛ masu atɔ̃me kere mayira ɔɖabo;

alasɔ si ɔnɔkarɔ̃ ana kɔraa ne, ɔ̃ito ɔ̃abara ne.

20 Ɔriinyɔ pia kadzunisɛĩ ɔɖo ɔturi wɔ loisɛ ɔsɛ iti ame tɔtɔ;

fiɛ ɔsɛ ɔɖeikaɖe ku sinyatɔ.

21 Si ɔturi ɔpia ɔ̃ ɔɖabo sibi ta sibiɛtɛ ame ne,

ɔto ɔ̃abɔ isoma ku kawirikɔ̃.

22 Ɔturi wɔ nsɛ ɔna sikpã sɛ ɔbɔ kulu

fiɛ kanasikpaĩ sɛ kabara akpi gbodzoo.

23 Ɔturi katoikɔlɛso sɛ ibɔ wũ karɔ̃,

ɣɛɛ karɔ̃ibɔso sɛ ibɔ ɔturi kuwarɛ.

24 Ɔturi wɔ loya i yukukpe kama ne, ɔsɛ ɔtsiri ɔ̃ mɔmɔ ngbã;

ɔsɛ ɔwe i ndamu kayirinɔ fiɛ ɔna ɔri ɔwararã sɔ ɔ̃aɣɛ ɔnukuare.

25 Iturinigã aase lɛ isɛ ikpadzɛ̃ ɔturi ipia i iyebi ame,

ɣɛɛ ɔturi ɔrere wɔ nsɛ ɔsiaiti i Bosate iso aawe i kaɣɔ ame.

26 Maturi gbodzoo sɛ mabie sɔ mabo ɔɖeisoi anɔ,

ɣɛɛ Bosate nsɛ ɔɖaɛ itɔ̃me i ɔri iso ɔtã ɔturi.

27 Maturi bɔlɔlɔa sɛ matsiri mma loisɛ maɖe ɔnukuare;

matilese sɛ matsiri maturi sɛɛ.