Lucas 19

Oyesu go Ojerusele

28 Ishini Oyesu ka awe ela mani kweyi ni, okwo owe ya go Ojerusele. 29 Ishini oyo pee kpo Obetafiji kpo Obetani ni, ebe kikpokyi ni aba yogwu mo Efu ko Ozetu ni, ota awogboso epa oleho kweyi ka da awa mo, 30 <<Ala gogya leke ni yo ohobu kala ni, ogoga kala, ala ba mo oyi ko odagyi gbogbo ebeni, ni ashishe se ebibye wa lo ni. Ala yo yi shini ala byo we ebeni. 31 Owoni ashe da ala oka mo, <Ojiya ni ala ba yo yi?> Ala ka da anu mo, <Adole pini ya yimu la.>>>

32 Awase ni otuwo oleho ni ga tanu byoni oka da awa ni. 33 Ni aba yo oyi ko odagyi ya yiyi ni, inoza duwoka mo, <<Ojiya ni ala ba yo oyi ko odagyi mani ya yiyi?>>

34 Akyogwu mo, <<Adole pini ya yimu la.>>

35 Aga byo oyi ko odagyi oni wa do Oyesu, ayo oshiye wa ta ikweyi ko odagyi kweyi ayo Oyesu yagye ikweyi nu. 36 Ni oyipu ki iyawu ya ga ni ase nwashika to oshiye wa ikweyi ko owe.

37 Ishini owa pee kpe ebeni owe gi kweyi ke Efu ko oZetu ni, kpiri ke ewa ka awogboso kwotu ko osho Owuso iye kpo oko nyakwu ikweyi ka awoza ki igbashi ni ama ni:

38 <<Otunehe yo kpo ose ni wa ipu ki iye ka Adole ni.>>

<<Omene yipu ki iso kweyi Igyashi wa ko Owuso!>>

39 Ashishini ka Awofarisi ni bi ipu ke ewa ni ka do Oyesu mo, <<Inofoza ka da awogboso na sha!>>

40 Okyogwu mo, <<Nyya kadala, owoni asha, awikyikpo mani ba sha ami iye.>>