यहेजकेल 15

बेकार अंगूर की बेल का उदाहरण

1 फेर यहोवा का यो वचन मेरे धोरै पोहच्या, 2 "हे माणस की सन्तान, सारे दरखतां म्ह अंगूर की बेल*15:2 अंगूर की बेल उरै तुलना वास्तव म्ह दाखलता अर दरखतां की न्ही उनकी लाकड़ियाँ म्ह सै। की के खासियत सै? अंगूर की डाळी जो जंगळ के दरखतां कै बिचाळै पैदा होवै सै, उस म्ह के गुण सै? 3 के कोए चीज बणाण खात्तर उस म्ह तै लाकड़ी ली जावै, या कोए बरतन टांगण कै खात्तर उस म्ह तै खूँटी बण सकै सै? 4 वा तो ईंधण बणाकै आग म्ह झोंकी जावै सै; उसके दोन्‍नु सिरे आग तै जळ जावै, अर उसके बीच का हिस्सा भस्म हो जावै सै, के वा किसे भी काम की सै? 5 देख, जिब वा बणी थी, जिब भी वा किसे काम की ना थी, फेर जिब वा आग का ईंधण होकै भस्म होगी सै, फेर किस काम की हो सकै सै? 6 इस करकै प्रभु यहोवा न्यू कहवै सै, जिस तरियां जंगळ के दरखतां म्ह तै मै अंगूर की बेल नै आग का ईंधण कर देऊँ सूं, उसे तरियां मै यरुशलेम के निवासियां नै नाश कर दियुँगा। 7 मै यरुशलेम के माणसां के खिलाफ होऊँगा, अर वे एक आग म्ह तै लिकड़कै फेर दुसरी आग का ईंधण हो जावैंगे*15:7 आग का ईंधण हो जावैंगे वे आग म्ह तै लिकड़े सैं फेर भी आग उननै भस्म कर देवैगी। उरै उनकी हालत दर्शाई गई सै।; अर जिब मै उनतै मुँह मोड़ ल्यूँगा, फेर थम जाण ल्योगे के मै यहोवा सूं। 8 मै अपणे माणसां का देश उजाड़ दियुँगा, क्यूँके उननै मेरे तै धोक्खा करया सै, प्रभु यहोवा की याए वाणी सै।"