1 यहोवा का यो वचन मेरे धोरै पोहच्या 2 "हे माणस की सन्तान, के तू उस हत्यारे नगर का न्याय न्ही करैगा? के तू उसका न्याय ना करैगा? उस ताहीं उसके सारे घिनोणे काम बता दे, 3 अर कह, परमेसवर यहोवा न्यू कहवै सै: हे नगर तू अपणे बीच म्ह हत्या करै सै जिसतै तेरा बखत आवै, अर अपणा ए नुकसान करण अर अशुद्ध होण कै खात्तर मूरत बणावै सै। 4 जो हत्या तन्‍नै करी सै, उसतै तू दोषी ठहरया, अर जो मूरत तन्‍नै बणाई सै, उनके कारण तू अशुद्ध होग्या सै; तन्‍नै अपणे अन्त के दिन ताहीं धोरै कर लिया, अर अपणे पिछले साल्‍लां ताहीं पोहच ग्या सै। इस कारण मन्‍नै तेरे ताहीं जात्ति-जात्ति के माणसां की ओड़ तै बदनाम्मी का अर सारे देशां के ठट्ठे का कारण कर दिया सै। 5 हे बदनाम, हे सोर सराबा तै भरे होए नगर, जो धोरै अर जो दूर सै, वे सारे तेरे ताहीं मजाक म्ह उड़ावैंगे।"

6 "देख, इस्राएल के प्रधान माणस अपणे-अपणे बल कै मुताबिक तेरे म्ह हत्या करण आळे होए सैं। 7 तेरै म्ह माँ-बाप निकम्मे जाणे गये सैं; तेरे बीच परदेशी पै अंधेर करया गया; अर अनाथ अर बिधवा तेरे म्ह पीसी गई सैं। 8 तन्‍नै मेरी पवित्र चिज्जां ताहीं निकम्मा जाण्या, अर मेरे विश्रामदिनां ताहीं अपवित्र करया सै। 9 तेरै म्ह लुच्‍चे माणस हत्या करण नै तावळे होए, अर तेरे माणसां नै पहाड़ां पै भोजन करया सै; तेरे बीच महापाप करया गया सै। 10 तेरे म्ह पिता की देह उघाड़ी गई; तेरे म्ह ऋतुमती जनान्‍नी तै भी भोग करया गया सै। 11 किसे नै तेरे म्ह पड़ोसी की जनान्‍नी कै गैल घिनोणा काम करया; अर किसे नै अपणी बहू ताहीं बिगाड़कै महापाप करया सै, अर किसे नै अपणी भाण यानिके अपणे पिता की बेट्टी ताहीं भ्रष्ट करया सै। 12 तेरे म्ह हत्या करण कै खात्तर उननै रिसवत ली सै, तन्‍नै ब्याज अर सूद लिया अर अपणे पड़ोसियाँ ताहीं पिस-पिसकै अन्याय तै फायदा ठाया; अर मेरे ताहीं तन्‍नै भूला दिया सै, प्रभु यहोवा की याए वाणी सै।"

13 "इस करकै देख, जो फायदा तन्‍नै अन्याय तै ठाया अर अपणे बीच हत्या करी सै, उसतै मन्‍नै हाथ पै हाथ दे मारया सै। 14 अंत म्ह जिन दिनां म्ह तेरा न्याय करुँगा, के उन म्ह तेरा दिल मजबूत अर तेरे हाथ स्थिर रह सकैगें? मन्‍नै यहोवा नै ए यो कह्या सै, अर इसाए करुँगा। 15 मै तेरे माणसां नै जात्ति-जात्ति म्ह तित्तर-बितर करुँगा, अर देश-देश म्ह छितरा देऊँगा, अर तेरी अशुद्धता नै तेरे म्ह तै नाश करुँगा। 16 तू जात्ति-जात्ति के देखदे होए अपणी ए नजर म्ह अपवित्र ठहरैगा; फेर तू जाण लेवैगा के मै यहोवा सूं।"

17 फेर यहोवा का यो वचन मेरे धोरै पोहच्या 18 "हे माणस की सन्तान, इस्राएल का घरान्‍नां मेरी नजर म्ह धातु का मैल* होग्या सै; वे सारे के सारे भट्ठी के बिचाळै के पीतळ अर राँगे अर लोहे अर शीशे की तरियां बणगे; वे चाँदी के मैल कै बराबर होगे सैं। 19 इस कारण प्रभु यहोवा उनतै न्यू कहवै सै: इस करकै के थम सारे के सारे धातु के मैल के बराबर बणगे सो, अंत म्ह देक्खो, मै थारे ताहीं यरुशलेम कै भित्तर कठ्ठा करण पै सूं। 20 जिस तरियां माणस चाँदी, पीतळ, लोहा, शीशा, अर राँगा इस करकै भट्ठी के भित्तर बटोरकै राक्खै सैं के उननै आग म्ह फूँक कै पिघळावैं, उस तरियां मै थमनै अपणे छो अर जळजळाहट तै कठ्ठा करकै ओड़ैए धरकै पिंघळा दियुँगा। 21 मै थारे ताहीं ओड़ै बटोरकै अपणे रोष की आग तै फूँकूँगा, अर थम उसके बीच पिंघळाए जाओगे। 22 जिस तरियां चाँदी भट्ठी के बीच म्ह पिंघळाई जावै सै, उसे तरियां थम उसके बीच म्ह पिंघळाए जाओगे; फेर थम जाण ल्योगे के जिसनै म्हारै पै अपणी जळजळाहट भड़काई सै, वो यहोवा सै।"

23 फेर यहोवा का यो वचन मेरे धोरै पोहच्या 24 "हे माणस की सन्तान, उस देश तै कह, तू इसा देश सै जो शुद्ध न्ही होया, अर जळजळाहट के दिन म्ह तेरे पै बारिस न्ही होई; 25 तेरे नबियाँ नै तेरे म्ह राजद्रोह की साजिस करी, उननै गरजण आळे शेर की तरियां शिकार पकड्या अर प्राणियाँ ताहीं खा डाल्या सै; वे धरे होए अनमोल धन नै छीन लेवै सैं, अर तेरै म्ह घणी जनानियाँ ताहीं बिधवा कर दिया सै। 26 उसके याजकां नै मेरे नियम-कायदे का मतलब खींच-खांचकै लगाया सै*, अर मेरी पवित्र चिज्जां ताहीं अपवित्र करया सै; उननै पवित्र-अपवित्र का कुछ भेद न्ही मान्या, अर ना औरां तै शुद्ध-अशुद्ध का भेद सिखाया सै, अर वे मेरे विश्रामदिनां के बारे म्ह बेफिकर रहवै सैं, जिसतै मै उनके बीच अपवित्र ठहरूँ सूं। 27 उसके प्रधान भेड़िया की तरियां शिकार पकड़ै, अर अन्याय तै फायदा ठाण खात्तर हत्या करै सैं अर प्राण घात करण नै तावळे रहवैं सैं। 28 उसके नबी उनके खात्तर कच्‍ची पुताई करै सैं, उनका दर्शन पाणा झूठ सै; यहोवा के बिना कुछ कहे भी वे न्यू कहकै झूठ्ठी पुच्छा बतावै सैं के ‘प्रभु यहोवा न्यू कहवै सै।’ 29 देश के आम आदमी भी अंधेर करै अर पराया धन छीन लेवै सैं, वे दीन-दरिद्र नै पीस्सै अर न्याय की चिन्ता छोड़कै परदेशी पै अंधेर करै सैं। 30 मन्‍नै उन म्ह इसा माणस ढूँढ़णा चाह्या जो बाड़े नै सुधारै अर देश कै खात्तर नाके म्ह मेरै स्याम्ही इसा खड़या हो के मन्‍नै उस ताहीं नाश न्ही करणा पड़ै, पर इसा कोए न्ही मिल्या। 31 इस कारण मन्‍नै उनपै अपणा रोष भड़काया अर अपणी जळजळाहट की आग तै उन ताहीं भस्म कर दिया सै; मन्‍नै उनकी चाल उन्हे कै सिर पै बोहड़ा दी सै, परमेसवर यहोवा की याए वाणी सै।"